قازاقستان پرەزيدەنتىنە ءراسىم بارىسىندا كورەيا رەسپۋبليكاسىنىڭ توتەنشە جانە وكىلەتتى ەلشىسى كيم دە-سيك، سەربيا رەسپۋبليكاسىنىڭ توتەنشە جانە وكىلەتتى ەلشىسى ۆلادان ماتيچ، يندونەزيا رەسپۋبليكاسىنىڭ توتەنشە جانە وكىلەتتى ەلشىسى راحمات پرامونو، سونداي-اق رۋمىنيانىڭ توتەنشە جانە وكىلەتتى ەلشىسى چەزار-مانولە ارميانۋ سەنىم گراموتاسىن تاپسىردى، دەپ حابارلايدى قامشى اقپاراتتىق اگەنتتىگىنىڭ ءتىلشىسى.

مەملەكەت باسشىسى ەلشىلەردى قازاقستانداعى ديپلوماتيالىق قىزمەتىنىڭ باستالۋىمەن قۇتتىقتاپ، ولاردىڭ جۇمىسى مەملەكەتارالىق ىنتىماقتاستىقتى نىعايتۋعا باعىتتالاتىنىنا سەنىم ءبىلدىردى.

نۇرسۇلتان نازاربايەۆ ەلشىلەردىڭ قازاقستانداعى ديپلوماتيالىق ميسسياسى مەملەكەتىمىز ءۇشىن جاڭا تاريحي كەزەڭدە باستالعالى تۇرعانىن ايتتى.

– تاۋەلسىزدىگىنىڭ 25 جىلدىعىن اتاپ وتكەن قازاقستان ءوز وركەندەۋىنىڭ ءۇشىنشى كەزەڭىنە قادام باستى. سونىمەن قاتار، ەلىمىزدە يندۋستريالاندىرۋ باعدارلاماسى قارقىندى جۇزەگە اسىرىلۋدا. ءبىز باسەكەگە قابىلەتتى جاستار تاربيەلەۋ ماقساتىمەن رۋحاني جاڭعىرۋدى قولعا الدىق. وسى اتالعان باستامالارىمىزدىڭ تۇپكى ماقساتى – الەمدەگى ەڭ دامىعان 30 ەلدىڭ قاتارىنا قوسىلۋ، – دەدى مەملەكەت باسشىسى.

قازاقستان پرەزيدەنتى ەلىمىزدىڭ وڭىردەگى تۇراقتىلىق پەن قاۋىپسىزدىكتى ساقتاۋعا قاتىستى باستامالارىنا، سونداي-اق ودان ءارى دامۋ مەن ءوزارا ىنتىماقتاستىقتى قامتاماسىز ەتۋ باعىتىندا جۇزەگە اسىرعان شارالارىنا توقتالىپ، قازاقستاننىڭ سىرتقى ساياساتتاعى قىزمەتىنىڭ ناتيجەلەرىنە نازار اۋداردى.

– قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە ءوز مىندەتتەرىن تولىق ورىنداۋدا. ەلىمىز دۇنيە جۇزىندەگى تۇيتكىلدەر مەن شيەلەنىستەردى شەشۋگە بەلسەنە اتسالىسىپ كەلەدى. سولاردىڭ ءبىرى – سيرياداعى قاقتىعىس. استانادا سيريا ۇكىمەتى مەن قارۋلى وپپوزيسيا وكىلدەرى العاش رەت ءبىر ۇستەل باسىندا كەزدەستى. ساناۋلى كۇندەردەن سوڭ استانادا «ەكسپو-2017» حالىقارالىق كورمەسىنىڭ اشىلۋ ءراسىمى وتەدى. وعان الەمنىڭ 100-دەن استام وكىلى قاتىسادى. سىزدەر «ەكسپو-2017» كورمەسىن وتكىزۋگە بەلسەنە اتسالىسادى دەپ سەنەمىن، – دەدى نۇرسۇلتان نازاربايەۆ.

سونىمەن قاتار، مەملەكەت باسشىسى قولايلى ينۆەستيسيالىق احۋالدى قامتاماسىز ەتۋ، ەلىمىزدىڭ ترانزيتتىك-كولىكتىك الەۋەتىن ءتيىمدى پايدالانۋ جۇمىسىنىڭ ناتيجەسىنە توقتالىپ، شەتەلدىك بيزنەس وكىلدەرىنىڭ قازاقستانداعى جوبالاردى ىسكە اسىرۋعا قاتىسۋىنىڭ ماڭىزدىلىعىن اتاپ ءوتتى.

قازاقستان پرەزيدەنتى ەلىمىز ءوز ەگەمەندىگىنىڭ العاشقى كەزەڭىنەن باستاپ مەملەكەتارالىق دەڭگەيدە سىندارلى ديالوگ پەن ىنتىماقتاستىققا نەگىزدەلگەن ساياسات جۇرگىزىپ كەلە جاتقانىن ايتتى.

– كورەيا رەسپۋبليكاسى – قازاقستاننىڭ ازياداعى نەگىزگى سەرىكتەسىنىڭ ءبىرى. مەن سەۋلگە بىلتىرعى قاراشاداعى مەملەكەتتىك ساپارىمنىڭ ناتيجەسىن جوعارى باعالايمىن. قازاقستان ەكونوميكاسى ءۇشىن وڭتۇستىك كورەيا وڭىردەگى ءىرى ينۆەستوردىڭ ءبىرى بولىپ سانالادى. قازاقستان ديپلوماتياسىنىڭ كۇش-جىگەرى سولتۇستىك كورەياعا قاتىستى ماسەلەنى تەك بەيبىت كەلىسسوزدەر ارقىلى شەشۋگە باعىتتالعان. مەن وسى وڭىردە بەيبىتشىلىك ورنايتىنىنا سەنەمىن. ەكىجاقتى ىنتىماقتاستىقتى بارلىق سالادا ودان ءارى دامىتۋ جولدارىن تالقىلاۋ ءۇشىن پرەزيدەنت مۋن چجە ءيننىڭ قازاقستانعا ساپارمەن كەلۋىن كۇتەمىز، – دەدى نۇرسۇلتان نازاربايەۆ.

مەملەكەت باسشىسى قازاقستان مەن يندونەزيا اراسىنداعى قارىم-قاتىناستىڭ دامۋىندا ىلگەرىلەۋشىلىك بار ەكەنىن اتاپ ءوتىپ، ساياسي جانە حالىقارالىق ماسەلەلەرگە قاتىستى استانا مەن جاكارتانىڭ كوزقاراستارى ۇقساس ەكەنىنە نازار اۋداردى.

قازاقستان پرەزيدەنتى ەلدەرىمىز اراسىنداعى ساۋدا-ەكونوميكالىق بايلانىستاردى دامىتۋدىڭ الەۋەتى جوعارى ەكەنىنە توقتالىپ، بۇل باعىتتاعى ۇكىمەتارالىق جۇمىستى جولعا قويۋ قاجەتتىگىن ايتتى.

نۇرسۇلتان نازاربايەۆ سەربيا رەسپۋبليكاسىمەن قارىم-قاتىناسىمىز جۇيەلى ءارى دايەكتى تۇردە دامىپ كەلە جاتقانىن اتاپ ءوتتى. 

– ەلدەرىمىزدىڭ بايلانىسىن نىعايتۋعا سوڭعى ەكى جىلداعى جوعارى دەڭگەيدە وتكەن ساپارلار تىڭ سەرپىن بەردى. ەكىجاقتى ساياسي ديالوگ پەن ساۋدا-ەكونوميكالىق ىنتىماقتاستىقتى دامىتۋدىڭ الەۋەتى زور. سونداي-اق، «استانا-ەكسپو-2017» كورمەسىنىڭ اشىلۋ سالتاناتىنا سەربيانىڭ جاڭا پرەزيدەنتى ا.ءۆۋچيچتىڭ قاتىساتىنىن اتاپ وتكىم كەلەدى، – دەدى نۇرسۇلتان نازاربايەۆ.

مەملەكەت باسشىسى قازاقستاننىڭ رۋمىنيامەن ءوزارا ءتيىمدى ىنتىماقتاستىقتى ودان ءارى دامىتۋعا باسا ءمان بەرەتىنىن ايتتى.

قازاقستان پرەزيدەنتى رۋمىن ەكونوميكاسىنىڭ ەنەرگەتيكا سالاسىنا ەلىمىز سالعان ينۆەستيسيا مەملەكەتتەرىمىز اراسىنداعى كووپەراسيانىڭ ايشىقتى ايعاعى ەكەنىن اتاپ ءوتتى. نۇرسۇلتان نازاربايەۆ استانا مەن بۋحارەست اراسىنداعى ىنتىماقتاستىقتى سەرىكتەستىكتىڭ جوعارى دەڭگەيىنە كوتەرۋگە مۇددەلى ەكەنىمىزدى جەتكىزدى.

سوڭىندا مەملەكەت باسشىسى ديپلوماتتاردى قازاقستانداعى ميسسياسىنىڭ باستالۋىمەن تاعى دا قۇتتىقتاپ، ىنتىماقتاستىقتى نىعايتۋ جولىنداعى ىستەرىنە ساتتىلىك،  جۇمىستارىنا تابىس تىلەدى.