مەملەكەت باسشىسىنا كەزدەسۋدە اقپارات جانە كوممۋنيكاسيالار مينيسترلىگى الدىنا قويىلعان مىندەتتەردىڭ ورىندالۋى جونىندە ەسەپ بەرىلدى دەپ حابارلايدى قامشى اقپاراتتىق اگەنتتىگى akorda.kz-كە سىلتەمە جاساپ. 

نۇرسۇلتان نازاربايەۆ مەملەكەتتىك ساياساتتىڭ ءبىرقاتار باعىتى بويىنشا ساپالى اقپاراتتىق جۇمىس جۇرگىزۋدىڭ ماڭىزدىلىعىن اتاپ ءوتتى.  

– بىرىنشىدەن، اقپارات قۇرالدارىندا يندۋستريالىق-يننوۆاسيالىق دامۋ باعدارلاماسىنىڭ ىسكە اسىرىلۋى بارىسىن كورسەتۋ كەرەك. ەكىنشىدەن، «نۇرلى جول» ينفراقۇرىلىمدىق دامۋ باعدارلاماسىن ورىنداۋ جۇمىسىن ناسيحاتتاۋدى كۇشەيتۋ قاجەت. مىسالى، «نۇرلى جول» باعدارلاماسى مەن قىتايدىڭ «جاڭا جىبەك جولى» ستراتەگياسىنىڭ ۇشتاسۋىنىڭ وڭ اسپەكتىلەرى تۋرالى اڭگىمەلەپ بەرۋگە بولار ەدى. ينفراقۇرىلىمدىق دامۋ اياسىندا ءبىرىنشى جىلى – 1600 شاقىرىم، ال بىلتىر 900 شاقىرىم جول سالىندى. مەن ول تۋرالى بىرنەشە رەت ايتتىم. ءبىراق بۇقارالىق اقپارات قۇرالدارىندا بۇل فاكت جاريا ەتىلمەدى، – دەدى قازاقستان پرەزيدەنتى.

سونىمەن قاتار، مەملەكەت باسشىسى قازاقستاننىڭ ترانزيتتىك-كولىكتىك الەۋەتىن اقپاراتتىق تۇرعىدا كورسەتۋدىڭ وزەكتىلىگىنە توقتالىپ، ەل وڭىرىندەگى ينفراقۇرىلىمدىق جوبالاردىڭ ىسكە اسىرىلۋىن باق-تا جاريا ەتۋ قاجەتتىگىن اتاپ ءوتتى. 

بۇدان بولەك، نۇرسۇلتان نازاربايەۆ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋدىڭ جانە «100 ناقتى قادام» ۇلت جوسپارىنىڭ نەگىزگى ەرەجەلەرىن جۇزەگە اسىرۋ ۇدەرىسىنە اقپاراتتىق تۇرعىدان كەڭىنەن قولداۋ كورسەتۋ قاجەتتىگىنە نازار اۋداردى. 

اقپارات جانە كوممۋنيكاسيالار ءمينيسترى قازاقستان پرەزيدەنتىنە «قازاقستاننىڭ 100 جاڭا ەسىمى» جوباسىنىڭ ىسكە اسىرىلۋى جانە قوعامدىق سانانى جاڭعىرتۋدىڭ بارلىق باعىتى بويىنشا ءاقپاراتتىق-تۇسىندىرۋ جۇمىستارىنىڭ جۇرگىزىلۋ بارىسى تۋرالى باياندادى.

مەملەكەت باسشىسى كەزدەسۋ قورىتىندىسى بويىنشا ءبىرقاتار ناقتى تاپسىرما بەردى.