«نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەدتىڭ جەتەكشىلىگىمەن پارتيا دەلەگاسياسى جاپونياعا باردى. ساپاردىڭ باستى ماقساتى – حالىقارالىق جانە پارتياارالىق ىنتىماقتاستىقتى نىعايتۋ جانە ەلدىڭ باستى ساياسي كۇشى ليبەرالدى-دەموكراتيالىق پارتيامەن تىعىز قارىم-قاتىناس ورناتۋ.

جاپوندار بۇگىنگى جەتىستىكتەرىنىڭ بارلىعىنا ءدال وسى ليبەرالدى-دەموكراتيالىق پارتيانىڭ ەكونوميكالىق رەفورمالاردى ءساتتى جۇزەگە اسىرۋىنىڭ ارقاسىندا قول جەتكىزدى. بۇل پارتيا ەلدە جارتى عاسىردان استام ۋاقىت بويى باسىمدىققا يە بولىپ، بيلىك تۇتقاسىن قولىنا بەرىك ۇستاپ كەلە جاتقان باستى ساياسي كۇش. سوندىقتان ونىڭ تاجىريبەسى مەن ءجۇرىپ وتكەن جولىنان قازاقستاننىڭ ۇيرەنەرى كوپ.

سوناۋ 1955 جىلدان بەرى دامۋدىڭ داڭعىل جولىنا ءتۇسىپ، جاپون حالقىن جارقىن بولاشاققا باستاپ كەلە جاتقان پارتيا راسىمەن جاپونيانى الەمنىڭ ەڭ دامىعان ەلدەرىنىڭ الدىڭعى لەگىنە شىعاردى. بۇگىندە كۇنشىعىس ەلى دۇنيە جۇزىندە ىشكى جالپى ءونىم (ءىجو) جانە ونەركاسىپتىك ءوندىرىس كولەمى جونىنەن 3-ورىن الادى.

«مەملەكەت باسشىسىنىڭ بارلىق باستاماسىن، سونىڭ ىشىندە رۋحاني جاڭعىرۋدى جۇزەگە اسىرۋدا «نۇر وتان» پارتياسىنا ەرەكشە مىندەتتەر جۇكتەلگەن. وتكەن حح عاسىردىڭ باسىندا-اق الاش قايراتكەرلەرى جاڭا مەملەكەت قۇرۋدا جاپونيا تاجىريبەسىنەن ۇلگى الۋعا شاقىرعان. بۇل تۋرالى جاس مۇحتار اۋەزوۆ پەن سۇلتانماحمۇت تورايعىروۆ ارنايى ماقالا جازعان. سوندىقتان دا بىزگە جاپونيانىڭ بۇگىنگى عاجايىپ ەكونوميكالىق تابىستارىنىڭ باستاۋىندا تۇرعان ليبەرالدى-دەموكراتيالىق پارتيانىڭ تاجىريبەسى اسا ماڭىزدى»، – دەپ اتاپ ءوتتى مۇحتار قۇل-مۇحاممەد.

ساپارى بارىسىندا «نۇر وتان» پارتياسى ءتوراعاسىنىڭ ءبىرىنشى ورىنباسارى جاپونيانىڭ پرەمەر-مينيسترى سيندزو ابەمەن، ەلدەگى باستى ساياسي كۇش سانالاتىن بيلەۋشى ليبەرالدى-دەموكراتيالىق پارتيانىڭ باس حاتشىسى توسيحيرو نيكايمەن، جاپونيا پارلامەنتىندەگى قازاقستانمەن دوستىق ليگاسىنىڭ ءتوراعاسى تاكەو كاۆامۋرامەن كەزدەسىپ، ەكىجاقتى كەلىسسوزدەر جۇرگىزدى.

ورايى كەلگەندە ايتا كەتكەن ءجون: مۇحتار قۇل-مۇحاممەدتىڭ ءوزى دە جاپون ادەبيەتى تۋرالى زەرتتەۋ ماقالالار جاريالاعانىن بىلەمىز. مينيستر بولىپ تۇرعاندا قازاقستاننىڭ جاپونياداعى كۇندەرىن زور تابىسپەن وتكىزگەن مۇحتار مىرزانىڭ «نۇر وتانعا» كەلگەننەن كەيىن بۇل ءۇردىستى ساياسي ديالوگ دەڭگەيىنە كوتەرۋى الاش اماناتىنىڭ جاڭا عاسىردا جالعاسىن تابۋى دەپ قاراستىرعان ءجون.