قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا ساياسي قۋعىن-سۇرگىن جانە اشارشىلىق قۇرباندارىنا ارنالعان مونۋمەنت الدىندا وتكەن «ازالى تاريحقا تاعزىم» اتتى ميتينگكە قاتىستى، دەپ حابارلايدى قامشى اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

ميتينگكە قاتىسۋشىلار ساياسي قۋعىن-سۇرگىن قۇرباندارىن ءبىر مينۋت ۇنسىزدىكپەن ەسكە الىپ، قايتا جوندەلگەن مونۋمەنتكە گۇل شوقتارىن قويدى.

مەملەكەتتىك حاتشى 3 ميلليوننان استام ادام ساياسي قۋعىن-سۇرگىن جانە اشارشىلىق قۇربانى بولعانىن ايتتى. گ.ءابدىقالىقوۆا ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا «وتكەن حح عاسىر حالقىمىز ءۇشىن قاسىرەتكە تولى، زوبالاڭ دا زۇلمات عاسىر بولدى. بىرىنشىدەن، ۇلتتىق دامۋدىڭ ىقىلىم زاماننان جالعاسىپ كەلە جاتقان وزىمىزگە عانا ءتان جولى ءبىرجولا كۇيرەتىلىپ، قوعامدىق قۇرىلىمنىڭ بىزگە جات ۇلگىسى ەرىكسىز تاڭىلدى. ەكىنشىدەن، ۇلتىمىزعا ادام ايتقىسىز دەموگرافيالىق سوققى جاسالدى. ونىڭ جاراسى ءبىر عاسىردان بەرى ءالى جازىلماي كەلەدى. ۇشىنشىدەن، قازاقتىڭ ءتىلى مەن مادەنيەتى قۇردىمعا كەتە جازدادى. تورتىنشىدەن، ەلىمىزدىڭ كوپتەگەن وڭىرلەرى ەكولوگيالىق اپات ايماقتارىنا اينالدى» دەگەن سوزدەر ايتىلعانىنا توقتالدى.

مەملەكەتتىك حاتشى ودان سوڭ «ۇلتتىق سانا: تاريحي تاجىريبە جانە رۋحاني جاڭعىرۋ» اتتى تاقىرىپپەن وتكەن حالىقارالىق كونفەرەنسياعا قاتىستى. سونداي-اق، كونفەرەنسياعا وبلىس اكىمى ق.كوشەربايەۆ، قازاقستان حالقى اسسامبلەياسى ءتوراعاسىنىڭ ورىنباسارى – قازاقستان حالقى اسسامبلەياسى حاتشىلىعىنىڭ مەڭگەرۋشىسى د.مىڭباي، پارلامەنت ءماجىلىسىنىڭ دەپۋتاتتارى، مەملەكەتتىك ورگاندار وكىلدەرى، قازاقستان حالقى اسسامبلەياسىنىڭ، قوعامدىق كەلىسىم كەڭەستەرىنىڭ مۇشەلەرى، وڭىرلىك اسسامبلەيالار حاتشىلىقتارىنىڭ مەڭگەرۋشىلەرى، شەتەلدىك جانە وتاندىق ساراپشىلار، عىلىمي جانە زيالى قاۋىم وكىلدەرى، ساياسي قۋعىن-سۇرگىن قۇرباندارىنىڭ جانە جەر اۋدارىلعانداردىڭ ۇرپاقتارى قاتىستى.

مەملەكەتتىك حاتشى ءوز سوزىندە تاريحي سانانىڭ كوكجيەگىن كەڭەيتۋگە، سول كەزەڭنىڭ وقيعالارى مەن دەرەكتەرىنىڭ ءوزارا بايلانىستىلىعى مەن ساباقتاستىعىن كورۋگە مۇمكىندىك بەرەتىن، تاجىريبەلىك ماقساتتى كوزدەگەن كونفەرەنسيانىڭ قوعامدىق-ساياسي ماڭىزى جوعارى ەكەنىن اتاپ ءوتتى.

كونفەرەنسيادا قازىرگى زامانعى قازاقستان مەملەكەتتىلىگى تۇرعىسىنان «الاش» قۇندىلىقتارىنا، قۋعىن-سۇرگىن، اشارشىلىق جانە جەر اۋدارۋ كەزەڭىنە تاريحي تالداۋ جاساۋ تاجىريبەسى جانە باسقا دا ماسەلەلەر قارالدى.

گۇلشارا ءابدىقالىقوۆا قازاقستان تاريحىنىڭ حح عاسىردىڭ ءبىرىنشى جارتىسىنداعى قاسىرەتتى كەزەڭىن تالقىلاۋ قوعامدىق سانانى جاڭعىرتۋ ۇدەرىسىنە قوسىلاتىن ەلەۋلى ۇلەس ەكەنىن ايتتى.

كونفەرەنسيا قورىتىندىسى بويىنشا فورۋمعا قاتىسۋشىلار قازاقستان حالقىنا ارنالعان ۇندەۋ قابىلدادى.

سونىمەن قاتار، مەملەكەتتىك حاتشى «اتامەكەن» بالالار اۋىلىن ارالاپ، قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ ستۋدەنتتەر سارايىندا بولدى. 

شولۋشى: ايگەرىم تاۋباي