استانادا وتەتىن ەكسپو-2017 حالىقارالىق كورمەسىندە سينگاپۋر ءوز ونىمدەرىن كوپشىلىككە «شاعىن قالا – ۇلكەن يدەيالار» دەگەن ۇرانمەن ۇسىنباق. بۇل تۋرالى «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەدتىڭ اتالعان ەلگە ساپارى بارىسىندا بەلگىلى بولدى.
كورمە كەزىندە سينگاپۋر دەلەگاسياسىن قازاقستانعا ەل پارلامەنتىنىڭ سپيكەرى حاليما ياكۋب باستاپ كەلمەك. وسىعان وراي مۇحتار قۇل-مۇحاممەد ح.ياكۋبپەن ارنايى كەزدەستى. كەزدەسۋدە قوس تاراپ قازاقستان مەن سينگاپۋر قارىم-قاتىناسىنداعى وزەكتى ماسەلەلەردى تالقىلادى. مۇحتار ابرار ۇلى پارلامەنت سپيكەرىنە ۇلتارالىق جانە كونفەسسياارالىق كەلىسىمگە، توزىمدىلىككە، قازاقستان حالقىنىڭ بىرلىگىنە نەگىزدەلگەن ەلباسى ساياساتىنىڭ ماڭىزى جايىندا ماعلۇمات بەردى.
ال بۇل كەزدەسۋدەن كەيىن رەسمي سينگاپۋر مەن استانا اراسىنداعى ارىپتەستىكتىڭ ارتاتىنىنا سەنىم بىلدىرگەن ح.ياكۋب: «قازاقستان پرەزيدەنتى نۇرسۇلتان نازاربايەۆ پەن سينگاپۋردىڭ تۇڭعىش پرەمەر-مينيسترى لي كۋان يۋ نەگىزىن قالاعان ەكى ەلدىڭ ىنتىماقتاستىعى الداعى ارىپتەستىگىمىزدىڭ بەرىك ىرگەتاسى بولۋى ءتيىس. نۇرسۇلتان نازاربايەۆ ءار ءىستى ستراتەگيالىق تۇرعىدا باعامدايتىن كورەگەن ساياساتكەر. ول بولاشاقتا قازاقستاننىڭ قارقىندى دامىعان ەكونوميكاسى بار، وزى تەحنولوگيالارمەن قامتاماسىز ەتىلگەن، جاستارى ءبىلىمدى ەل بولعانىن قالايدى جانە سول ماقساتقا جەتۋ ءۇشىن قولدا بار مۇمكىندىكتىڭ بارلىعىن جاساپ كەلەدى»، – دەدى.
سونداي-اق، «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد سينگاپۋردىڭ پرەمەر-مينيسترى، حالىقتىق ىس-ارەكەت پارتياسىنىڭ باس حاتشىسى لي سيان لۋنمەن، وسى پارتيانىڭ ءتوراعاسى كحو بۋن ۆانمەن جانە لي كۋان يۋ اتىنداعى مەملەكەتتىك ساياسات مەكتەبىنىڭ رەكتورى كيشورە ماحبۋبانيمەن كەزدەستى. ودان بولەك، قازاقستاندىق دەلەگاسيا نانيان تەحنولوگيالىق ۋنيۆەرسيتەتىنىڭ روبوتتار جاسايتىن عىلىمي-زەرتتەۋ ورتالىعىندا بولدى.
بۇعان دەيىنگى پارتياگەرلەر كوبىنەسە رەسەيگە، كپسس شاپانىنان شىعا الماعان ەدينوروستارعا قاراپ الاڭدايتىن ەدى. مۇحتار مىرزانىڭ كەشە جاپونيا، بۇگىن سينگاپۋر سياقتى ازيا جولبارىستارىنا قاراي بەت بۇرعانى ابدەن دۇرىس ەكەن. قازاقستان بارىسى تەگى بولەك ورىس ايۋىنا ەمەس، وزىنە جاقىن جولبارىستارمەن قاتار جورتقانى ابزال.
