مەملەكەتتىك قىزمەتتەردى الۋ جولدارىن جەڭىلدەتۋ ماقساتىندا ەلەكتروندىق ۇكىمەتتە 1 شىلدەدەن باستاپ 20 قىزمەتتى سيفرلىق قولتاڭباسىز الۋعا بولادى، دەپ حابارلايدى قامشى اقپاراتتىق اگەنتتىگى  اقپارات جانە كوممۋنيكاسيا مينيسترلىگىنە سىلتەمە جاساپ.

ءبىر رەتتىك ءقۇپياسوز ارقىلى بەرىلەتىن العاشقى قىزمەت بيىلعى جىلدىڭ ءساۋىر ايىندا ىسكە قوسىلعان سوتتالماۋى (سوتتالۋى) تۋرالى انىقتاما ەدى.

20 قىزمەتتىڭ 15ء-ى ءبىر رەتتىك ءقۇپياسوزدى پايدالانۋ ارقىلى قولجەتىمدى بولسا، قالعان 5 قىزمەت ءۇشىن پورتالدا تىركەلۋ جەتكىلىكتى.

مەملەكەتتىك ورگاندارمەن كەلەسى تانىمال قىزمەتتەر ىرىكتەلگەن: مۇلىكتىڭ بولماۋى (بولۋى) تۋرالى انىقتاما، جىلجىمايتىن مۇلىكتى تىركەۋ جانە قۇقىقتىڭ اياقتالۋى تۋرالى جەكە تۇلعالارعا انىقتاما بەرۋ، جىلجىمايتىن مۇلىككە تىركەلگەن قۇقىقتار (تىيىمدار) جانە ونىڭ تەحنيكالىق سيپاتتاماسى تۋرالى انىقتاما، جىلجىمايتىن مۇلىكتىڭ تەحنيكالىق پاسپورتىن الۋ، ازاماتتىق حال اكتىلەرىن قايتا الۋ جانە تىركەۋ جانە ت.ب.

ءبىر رەتتىك ءقۇپياسوز دەگەنىمىز ازامات بەلگىلى ءبىر قىزمەتتى الۋ ءۇشىن سۇراۋ سالعان كەزدە sms ارقىلى ۇيالى تەلەفونعا كەلەتىن حابارلاما. سۇراۋ سالۋشىنىڭ تەلەفونىنا كەلگەن تەكسەرۋشى ءقۇپياسوزدى (كود) eGov.kz پورتالىندا ەنگىزۋ قاجەت. وسى كەزدە پايدالانۋشىنىڭ ءنومىرى موبيلدىك ازاماتتار بازاسىندا تەكسەرىلىپ، بازاداعى نومىرمەن سايكەستىگى راستالىپ، سۇراۋ سالعان قىزمەتكە بىردەن جاۋاپ بەرىلەدى. موبيلدىك ازاماتتار بازاسىندا تىركەلۋ ءۇشىن پورتالدا «جەكە كابينەتكە» كىرىپ «تەلەفون» دەگەن باعاندا ۇيالى تەلەفوننىڭ ءنومىرىن كورسەتۋ قاجەت. بۇدان بولەك جسن-عا تەلەفون ءنومىرىن تىركەۋ ءۇشىن «ازاماتتارعا ارنالعان ۇكىمەت» مەملەكەتتىك كورپوراسياسىنىڭ فرونت-كەڭسەرىنە بارۋعا بولادى.

وتانداستار دارىگەردى ۇيگە شاقىرۋ، دارىگەردىڭ قابىلداۋىنا جازىلۋ،  مەديسينالىق ۇيىمعا تىركەۋگە تۇرۋ سياقتى قىزمەتتەردى ەلەكتروندى سيفرلىق قولتاڭباسىز پايدالانۋعا بولادى. بۇل جەردە مەديسينالىق ۇيىمعا تىركەلگەندەر عانا ۇيگە دارىگەردى شاقىرا الاتىنىن ەسكەرۋ قاجەت.

سونىمەن قاتار اسكەري قىزمەتىن وتكەرۋدى راستاۋ تۋرالى انىقتاما مەن جەڭىلدىكتەرى بار ادامدارعا (ۇلى وتان سوعىسىنا قاتىسۋشىلارعا، چەرنوبىل اەس-گى اپاتتى جويۋشىلارعا) انىقتامالار بەرۋ قىزمەتتەرى قولجەتىمدى بولماق.

مەملەكەتتىك قىزمەتتەردى جەڭىلدەتۋ جۇمىستارى پرواكتيۆتى مەملەكەتتى دامىتۋعا باعىتتالعان. ياعني ازاماتتاردىڭ قاتىسۋىنسىز بەرىلەتىن قىزمەتتەر سانى ۇنەمى كوبەيەتىن بولادى.