تابىسقا جەتكەن ەركەكتىڭ ارتىندا ءبىر مىقتى ايەل تۇرادى. يرلاندىق بوكسشى كونور ماكگرەگوردىڭ بۇگىنگى ساتتىلىگىنىڭ تاريحى سونىڭ ناق دالەلى. ول ءبىر ۋاقىتتا ەكى مارتە چەمپيون اتانىپ، بۇگىنگى تاڭدا ميلليونداردىڭ كوزايىمى بولا ءبىلدى. ءوزىنىڭ تاريحي جەڭىسىنەن كەيىن كونور سۇحباتىندا سۇيگەن جارىنا العىسىن ءبىلدىردى: «ەگەر مەنىڭ سۇيىكتىم بولماعاندا، بۇگىنگى جەتىستىكتەرىمنىڭ ءبىرى دە بولماس ەدى».

2016 جىلدىڭ قاراشاسىندا كونور ماكگرەگور جەڭىل سكالماقتاعى چەمپيون ەددي الۆارەستى جەڭگەن سوڭ UFC تاريحىندا ءبىر ۋاقىتتا ەكى دۇركىن چەمپيون اتاندى. بۇل ونىڭ ومىرىندەگى زور جەڭىس بولدى. سول كەزدىڭ وزىندە كونور تىلشىلەرگە بەرگەن سۇحباتىندا ءوزىنىڭ جەڭىسى تەك وعان ەمەس، سۇيگەن قىزى دي ديەۆلينگە دە تيەسىلى ەكەنىن ايتقان. دي ديەۆلين ءاردايىم سپورتشىنىڭ جانىندا بولعان، ونى قولداپ، تىرەۋى بولا ءبىلدى، كونور سەنىمىنەن ايىرىلعان كۇننىڭ وزىندە دي وعان سەندى.

«مەنىڭ تۇگىم بولماعان كەزدەر بولعان. تاس كەدەي ەدىم، ءبىراق سۇيىكتى قىزىم ءاردايىم مەنىڭ جانىمدا بولدى، ول مەنى تاستاعان ەمەس. ال بۇگىن ول ءۇشىن ءبارىن ىستەي الاتىنىما ماقتانامىن. ونىڭ قالاعانىن الىپ بەرە الامىن، ونىمەن بىرگە الەمدى شارلاسام دا بولادى جانە بۇلاردىڭ ءبارىن مەن قۋانا-قۋانا ىستەيمىن».

دي مەن كونور 2008 جىلى تانىسقان. قىز جىگىتكە ءبىر كورگەننەن عاشىق بولىپتى. «ول ادامنىڭ كوڭىلىن كوتەرە الادى. كوڭىل كۇيىم بولماي تۇرعاننىڭ وزىندە ونىڭ جانىندا ەرىكسىز كۇلەتىنمىن. ءبىز تانىسقان ساتتە ول جاتتىعۋ زالىنا بارىپ جۇرەتىن، ماعان ونىڭ سپورتقا دەگەن ماحابباتى، قايتپاس قايسارلىعى قاتتى ۇنادى»، دەيدى بوكسشىنىڭ سۇيىكتىسى.

ەكەۋىنىڭ كەزدەيسوق تانىستىعى 10 جىلعا سوزىلىپ كەلگەن ۇلكەن ماحابباتقا ۇلاستى. جىگىت قىزدى العاش كورگەندە-اق، «ءدال وسى قىز مەنىڭ جاقىن دوسىم، قورعاۋشىم، قولداۋشىم بولادى» دەپ ويلاعان.  

«مەن ءار كۇن سايىن ءوز ماقساتىما قادام باستىم، ءار كۇنىم دايىندىقپەن وتەتىن. ال دي ءاردايىم مەنىڭ جانىمدا بولدى، مەنىڭ ارماندارىمدى تىڭدادى، اقىلىن ايتتى. ول – مەنىڭ قورعاۋشىم. ەگەر دي بولماعاندا، مەن دە بولماس ەدىم. ونسىز ءدال ءقازىر قانداي كۇيدە بولاتىنىمدى ءتىپتى ەلەستەتە المايمىن»، دەيدى كونور.

دي كونوردىڭ ءار جەڭىسىن ماقتانىشپەن قابىلدادى، ەر ازاماتىن قاشان دا بيىكتە ۇستادى. ەڭ باستىسى، ول سۇيگەن ادامىنىڭ ساتتىلىگىنە سەندى. ءاردايىم قامقورلىق تانىتىپ ءجۇردى، اسىرەسە قالاي تاماقاتاناتىنىنا ەرەكشە كوڭىل بولەتىن، سەبەبى كەز-كەلگەن سپورتشى ءۇشىن دۇرىس تاماقتانۋ – ماڭىزدى.

چەمپيوننىڭ جانىندا بولۋ اركىمنىڭ قولىنان كەلەتىن ءىس، ال ءوز سەرىگىنە مۇلتىكسىز سەنىم ارتۋ، جەڭىلگەن جاعدايدىڭ وزىندە قولداۋ كورسەتۋ – ەكىنىڭ ءبىرىنىڭ قولىنان كەلە بەرمەس.

بۇگىندە كونوردا ءبارى بار، دي ەكەۋى كەز-كەلگەن ۋاقىتتا الەمدى شارلاپ كەتە الادى.

«مەنىڭ ديگە دەگەن العىسىم شەكسىز. ول مەن ءۇشىن ىستىققا دا، سۋىققا دا ءتوزدى. ەندىگى كەزەك مەنىكى. ونىڭ قالاعانىن ىستەپ، بارىنشا ايالاپ ۇستاۋ – مەنىڭ مىندەتىم. و سوعان لايىق». 

شولۋشى: گۇلىم جاقان