پورتۋگالدىق فۋتبولشىنىڭ سوزىنشە، «بارسەلونانىڭ» ويىنشىسى – ءمىنسىز فۋتبولشى، الايدا ارالارىندا ەشقانداي دوستىق جوق.

«رەال مادريد» فۋتبول كلۋبىنىڭ شابۋىلداۋشىسى كريشتيانۋ رونالدۋ «بارسەلونا» ويىنشىسى ليونەل مەسسي جايىندا ءوز پىكىرىمەن ءبولىستى، دەپ جازادى قامشى اقپاراتتىق اگەنتتىگى. Sport.es باسىلىمىنا بەرگەن سۇحباتىندا رونالدۋ ارگەنتينالىق ويىنشىنىڭ ءار قادامىن باقىلاپ جۇرەتىنىن ايتتى، وعان دەگەن قۇرمەتى زور كورىنەدى. الايدا دوستىق جايلى اڭگىمە بولمادى. ونىڭ ۇستىنە، رونالدۋ مەسسيدى باسەكەلەسى ەمەس، ارىپتەسى رەتىندە كورەتىنىن تىلگە تيەك ەتتى.

«مەن جاقسى ويىنشىلاردىڭ ءار قادامدارىن باقىلاعاندى جاقسى كورەمىن. ال مەسسي – ءمىنسىز فۋتبوليست. ونىڭ ويىنىنا، ءار قيمىلىنا قاراپ فۋتبول الەمىنىڭ قاشان دا بيىكتە ەكەنىن ايتا الامىن. ءبىز ءبىر-بىرىمىزدى سىيلايمىز، ءبىراق سىيلاستىعىمىز سالەمىمىزدىڭ تۇزۋلىگىمەن عانا شەكتەلەدى. بىرگە وتىرىپ، اڭگىمە دۇكەن قۇرۋ دەگەن بىزدە بولماعان. ونى دوسىم دەپ ايتا المايمىن. ليونەل – مەنىڭ ارىپتەسىم عانا». 

شولۋشى: گۇلىم جاقان