اقپارات جانە كوممۋنيكاسيالار ءمينيسترى داۋرەن ابايەۆ ۇلتتىق پانتەونعا قاتىستى پىكىر ءبىلدىردى، - دەپ حابارلايدى kaz.tengrinews.kz. 

"جەكە مەنىڭ پىكىرىم - پانتەوننىڭ قاجەتتىلىن تولىق قولدايمىن. بۇل ەلدىڭ دامۋىنا ۇلەس قوسقان ادامداردىڭ اتىن ەستە ساقتاۋدىڭ ءبىر ءادىسى. بۇدان ەش جاماندىق كورىپ تۇرعان جوقپىن. قازاقستاننىڭ ءاربىر ازاماتى، ەگەر ولار (سايكەس كەلسە)، بەلگىلى ءبىر تالاپتار بار، پانتەونعا جەرلەنۋى مۇمكىن. ەش قيىندىق كورىپ تۇرعان جوقپىن"، - دەيدى ابايەۆ جۋرناليستەرگە ءماجىلىس وتىرىسىنىڭ ۇزىلىسىندە.  ەسكە سالايىق، بۇگىن ق ر ۇكىمەتى ۇلتتىق پانتەون تۋرالى ەرەجەنى جاريالاعان بولاتىن. ەرەجە بويىنشا پانتەون اۋماعىندا جەرلەۋگە قايتىس (قازا) بولعان مىنا ساناتتاعى تۇلعالار جاتادى:

1) قازاقستان رەسپۋبليكاسىنىڭ پرەزيدەنتتەرى جانە ولاردىڭ وتباسىلارىنىڭ مۇشەلەرى؛ 2) قازاقستان رەسپۋبليكاسىنىڭ پرەمەر-مينيسترلەرى جانە ولاردىڭ ورىنباسارلارى، قازاقستان رەسپۋبليكاسى پارلامەنتى پالاتالارىنىڭ ءتوراعالارى جانە ولاردىڭ ورىنباسارلارى، قازاقستان رەسپۋبليكاسىنىڭ مەملەكەتتىك حاتشىلارى، قازاقستان رەسپۋبليكاسى پرەزيدەنتى اكىمشىلىگىنىڭ باسشىلارى، قازاقستان رەسپۋبليكاسى كونستيتۋسيالىق كەڭەسىنىڭ، قازاقستان رەسپۋبليكاسى جوعارعى سوتىنىڭ جانە قازاقستان رەسپۋبليكاسى ۇلتتىق بانكىنىڭ ءتوراعالارى؛ 3) مينيسترلەر، قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ باسشىلارى، وبلىستاردىڭ، رەسپۋبليكالىق ماڭىزى بار قالانىڭ، استانانىڭ اكىمدەرى؛       4) "حالىق قاھارمانى"، "قازاقستاننىڭ ەڭبەك ەرى" اتاقتارىنا يە بولعان تۇلعالار؛ 5) "التىن قىران"، "وتان"، "قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ"، ءۇش دارەجەلى "ەڭبەك داڭقى" وردەندەرىمەن ماراپاتتالعان ازاماتتار؛ 6) "كەڭەس وداعىنىڭ باتىرى"، "سوسياليستىك ەڭبەك ەرى" اتاقتارىنا يە بولعان ازاماتتار؛ 7) "قازاقستاننىڭ عارىشكەر-ۇشقىشى" قۇرمەتتى اتاعىنا يە بولعان ازاماتتار؛ 8) قازاقستان رەسپۋبليكاسى پرەزيدەنتىنىڭ ەرەكشە شەشىمى بويىنشا باسقا دا ازاماتتار؛ 9) پانتەوندا جەرلەۋگە جاتاتىن تۇلعالارمەن ولاردىڭ كەيىن قايتىس بولعان جۇبايلارى جەرلەنۋى مۇمكىن. سونىمەن بىرگە، قايتىس (قازا) بولعان تۇلعالاردى جەرلەۋدى ۇيىمداستىرۋدى قايتىس (قازا) بولعان ادامنىڭ جۇبايىنىڭ، جاقىن تۋىسقاندارىنىڭ نە زاڭدى وكىلىنىڭ باستاماسىمەن وبلىستاردىڭ، رەسپۋبليكالىق ماڭىزى بار قالانىڭ جانە استانانىڭ جەرگىلىكتى اتقارۋشى ورگاندارى جۇرگىزەتىنى ايتىلعان.