قامشى اقپاراتتىق اگەنتتىگىندە 31 مامىردا «كەيبىر ازاماتتار قىتايعا كەتكەن تۋىستارىنىڭ نەگىزسىز قامالىپ، ورالماي جاتقانىن ايتادى» اتتى ماتەريال جارىق كورىپ، قاتتى تالقىلاندى. وندا قۇجاتتىق قيىندىق كورگەن بىرنەشە ونداعان ازاماتتىڭ جۇڭگو بيلىگى دەلەگاسياسىمەن ەلشىلىك ارقىلى سويلەسىپ، بازىناسىن جەتكىزبەك بولعانى ايتىلعان. قوعام بەلسەندىسى ەركىن بەيسەكەي وسى ماسەلەگە قازاق بيلىگىنىڭ دە ارالاسىپ، جۇڭگو تاراپىنان رەسمي تۇسىنىكتەمە الۋىن تالاپ ەتەدى. ويتكەنى قىتايداعى زاڭ بۇزۋشىلىقتار ءتىپتى قازاقستان ازاماتىنىڭ ءتولقۇجاتىن تارتىپ الۋعا دەيىن جەتكەن.

«ق ر پرەمەر ءمينيسترى باقىتجان ساعىنتايەۆ مىرزاعا؛

دۇنيەجۇزى قازاقتار قاۋىمداستىعى ءتوراعاسىنىڭ ءبىرىنشى ورىنباسارى تالعات ماماشيەۆقا؛

قازاقستاننىڭ قحر-داعى توتەنشە جانە وكىلەتتى ەلشىسى شاحرات نۇرىشيەۆقا؛

دۇنيەنىڭ ءتورت بۇرىشىنا، الەمنىڭ 55 مەملەكەتىنە تاراعان قازاقتار كوشى 25 جىلدان بەرى جالعاسىپ كەلەدى. الايدا، سوڭعى جىلداردا قحر-دان ەتنيكالىق قازاقتاردىڭ اتاجۇرتقا بەتالىسى قۇجاتتىق كەدەرگىلەر ەسەبىنەن قيىنداپ كەتتى. ونداي قيىندىقتىڭ ءبىرى قىتايدان قازاقستانعا كەلىپ، ءوز وتباسىلارىن بىرىكتىرۋ ماقساتىندا قازاقستان تاراپىنان بەرىلەتىن ىقتيارحاتتى الاعان ەتنيكالىق قازاقتاردىڭ باسىنداعى جاعداي. ولار اتالعان قۇجات ارقىلى ەكى ەل اراسىندا ەمىن-ەركىن ءجۇرىپ تۇرا الۋعا ءتيىس. سول ارقىلى ءوز وتباسىلارىن قازاقستانعا كوشىرىپ، بالا-شاعاسىن ەلگە اكەلىپ، ازاماتتىق الۋىنا، وقىپ ءبىلىم الۋىنا جاعداي جاسايدى. الايدا، جۇڭگو حالىق رەسپۋبليكاسى وسىنداي قۇجاتى بار باۋىرلارىمىزعا قاتتى قىسىم جاساپ، سوڭعى ۋاقىتتا قىسىمدى كۇشەيتە ءتۇستى. اتاپ ايتقاندا ولاردىڭ جۇڭگو اۋماعىندا جۇرگەنىن پايدالانىپ، زاڭسىز تۇردە ىقتيارحاتىن تارتىپ الۋ فاكتىلەرى جيىلەدى. ءتىپتى قازاقستاننىڭ ازاماتتىعىن العان كەيبىر ادامداردىڭ دا شەتەل ازاماتى بولعانىنا قاراماستان ءتولقۇجاتتارىن تارتىپ الۋ كورىنىس الۋدا. ال، ىقتيارحات العان ازاماتتاردىڭ كوبىنىڭ وتباسى قازاقستاندا. ياعني بەيبىت زاماندا ءبىر وتباسى ەكىگە ءبولىنىپ، ەل مەن ەلدىڭ اراسىندا قالىپ جاتىر. وسىعان بايلانىستى جۇڭگو بيلىگى ەشقانداي تۇسىنىكتەمە بەرگەن جوق. ءتىپتى، قاماۋ، سوتتاۋ فاكتىلەرى بولعان. سىزدەردەن سۇرايتىنىمىز جۇڭگو بيلىگىنەن رەسمي تۇردە تۇسىنىكتەمە الساڭىزدار جانە ولقىلىقتىڭ ورنىن تولتىرسا دەيمىز.

ساناۋلى كۇننەن كەيىن ەلىمىزدىڭ داڭقىن الەمگە پاش ەتەتىن «Astana EXPO-2017» ۇلتتىق كورمەسى وتەدى. قازاق ەلىنىڭ قۋانىشىن، ماقتانىشىن پاش ەتەتىن اتالعان شاراعا كەلمەكشى بولىپ وتىرعان مىڭداعان قانداستارىمىز وسىنداي قۇجاتتىق قيىندىقتار سەبەبىنەن كەلە الماي وتىر. ولاردىڭ قۇجاتتارىن جيناپ الىپ، سەبەبىن تۇسىندىرمەستەن 1 قىركۇيەككە دەيىن بەرىلمەيدى دەگەن. ياعني، EXPO-عا قاتىسۋعا رەسمي شەكتەۋ قويىپ وتىر. قىتايداعى باۋىرلارىمىزدىڭ ادامي قۇقىقتارى تاپتالىپ جاتىر. وسىعان بايلانىستى مەملەكەتتىك دەڭگەيدە ءبىر جاۋاپ بەرىلۋىن سۇرايمىز».

قحر ءتوراعاسى سي سزينپين 7-10 ماۋسىم ارالىعىندا قازاقستانعا كەلىپ، شانحاي ىنتىماقتاستىق ۇيىمىنىڭ (شىۇ) ءسامميتى جانە «استانا ەكسپو-2017» حالىقارالىق كورمەسىنىڭ اشىلۋ سالتاناتىنا قاتىسپاق. وسى ورايدا جۇڭگو بيلىگىنەن ءبىر سۇراققا جاۋاپ الۋ ۇكىمەتىمىزگە قيىنعا سوقپاس.

ەرلان تولەۋباي