ماۋسىمنىڭ 2-دە «جاستار» سپورت كەشەنىندە وبلىس اكىمىنىڭ قاتىسۋىمەن قازاقستاننىڭ مەملەكەتتىك رامىزدەرىنىڭ 25 جىلدىعىنا ارنالعان «ۇلى دالا ەلىنىڭ رامىزدەرى جاساسىن!» اتتى فورۋم ءوتتى، دەپ حابارلايدى قامشى اقپاراتتىق اگەنتتىگى وبلىس اكىمدىگىنىڭ رەسمي سايتىنا سىلتەمە جاساپ.

فورۋمعا قاراعاندى وبلىسىنىڭ قالالارى مەن اۋداندارىنىڭ تۇرعىندارى، ەڭبەك ارداگەرلەرى، قازاقستان حالقى اسسامبلەياسىنىڭ، ەتنومادەني ۇيىمداردىڭ وكىلدەرى، دەپۋتاتتار، قوعام، مادەنيەت قايراتكەرلەرى، ستۋدەنتتەردەن قۇرالعان 3000-نان اسا ادام قاتىستى. مەرەكە مەملەكەتتىك رامىزدەردىڭ 25 جىلدىعىن بىلدىرەتىن 25 تۋ ۇستاۋشىلاردىڭ قاتىسۋىمەن ۇيىمداستىرىلعان «تۋ سيمفونياسى» بي قويىلىمىمەن باستالدى. 

فورۋمعا قاتىسۋشىلاردى وبلىس اكىمى ەرلان قوشانوۆ قۇتتىقتادى. 
- مەملەكەتتىك رامىزدەر ءاردايىم ۇلتتىڭ ماقتانىشى بولدى جانە بولادى، - دەدى وبلىس اكىمى. – ولار الەمگە ونىڭ بەينەسىن، بىرەگەيلىگىن، قۇندىلىعىن اشىپ كورسەتەدى. ءارقايسىمىزدىڭ سانامىزدا رامىزدەر وتاندى بەينەلەيدى. 

وبلىس اكىمى ەلباسىنىڭ رۋحاني جاڭعىرۋ تۋرالى ايتقان ماقالاسىنان ءسوز كەلتىردى: «تۋعان جەرگە، ونىڭ مادەنيەتى مەن سالت-داستۇرلەرىنە ايرىقشا ىڭكارلىكپەن اتسالىسۋ – شىنايى ءپاتريوتيزمنىڭ ماڭىزدى كورىنىستەرىنىڭ ءبىرى. بۇل كەز-كەلگەن حالىقتى انشەيىن بىرىگە سالعان قاۋىم ەمەس، شىن مانىندەگى ۇلت ەتەتىن مادەني-گەنەتيكالىق كودتىڭ نەگىزى».

فورۋمعا قاتىسۋشىلار وزدەرىنىڭ سوزدەرىندە مەملەكەتتىك رامىزدەر ولار ءۇشىن تاۋەلسىز ەلدىڭ، ادىلەتتىلىكتىڭ، گۇلدەنۋدىڭ جانە العا جىلجۋدىڭ بەلگىسى ەكەنىن اتاپ ايتتى. 
- مەن ءۇشىن ءبىزدىڭ رامىزدەر – جەڭىستەر مەن جەتىستىكتەردىڭ بەلگىسى، - دەدى «كازپلاست» جانە «بەكەمپلاست» ج ش س كومپانيالار توبىنىڭ باس ديرەكتورى سەرگەي ۆودكو. – ءبىزدىڭ عۇلاما سپورتشىلارىمىز جەڭىسكە جەتكەندە، ءبىزدىڭ تۋىمىز كوككە كوتىرىلىپ، ءانۇرانىمىز شىرقاعاندا قانداي سەزىمدە بولاتىندارىن تۇسىنەمىن. ءبىزدىڭ ءارقايسىمىز ماقتانىش، قۋانىش جانە پاتريوتيزم سەزىمدەرىن سەزىنەدى. الەمدىك دەڭگەيدەگى شەشىمدەر قابىلداناتىن حالىقارالىق فورۋمداردا، سەزدەردە، ءبىزدىڭ بايراعىمىزدىڭ بولۋى قازاقستننىڭ پىكىرى دە ەلەنەتىنىنىڭ بەلگىسى. ءبىز جانە بارلىق دۇنيەجۇزى ءبىزدىڭ رامىزدەرىمىزدى كورىپ، ادىلدىك، بەيبىتشىلىك پەن ءوزارا تۇسىنىستىكتى قولداۋداعى پىكىرىمىز ەكەنىن بايقايدى. 

25 جىل بۇرىن 1992 جىلدىڭ 4 ماۋمىسىندا قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازاربايەۆ تاۋەلسىز قازاقستاننىڭ مەملەكەتتىك ەلتاڭبا جانە مەملەكەتتىك تۋ تۋرالى زاڭدارىنا قول قويدى. بۇل كۇن ەل تاريحىندا مەملەكەتتىك رامىزدەر كۇنى رەتىندە ساقتالىپ قالدى.

شولۋشى: گۇلىم جاقان