«مەملەكەتتىك رامىزدەر – بۇل ءبىزدىڭ مەملەكەتىمىزدىڭ، ءبىزدىڭ ەگەمەندىگىمىزدىڭ بەرىك نەگىزىنىڭ ءبىرى. ولار تاۋەلسىزدىكتىڭ قاسيەتتى بىرىكتىرۋشى وبرازىن  بىلدىرەدى».

                                                                                                                                                                                                                   نۇرسۇلتان نازاربايەۆ

بۇل جىلى قازاقستان رەسپۋبليكاسىنىڭ مەملەكەتتىك رامىزدەرىنە 25 جىل تولدى.

1992 جىلدىڭ 4 ماۋسىمىندا مەملەكەت باسشىسى ق ر جوعارعى كەڭەسىنىڭ VIII سەسسياسىنىڭ پلەنارلىق وتىرىسىنا قاتىستى.

كەڭەس بارىسىندا ق ر مەملەكەتتىك رامىزدەرى – مەملەكەتتىك تۋ مەن مەملەكەتتىك ەلتاڭباcى – قارالىپ، بەكىتىلدى.

ءدال وسى كۇنى نۇرسۇلاتن نازاربايەۆ «قازاقستان رەسپۋبليكاسىنىڭ مەملەكەتتىك تۋى»، «قازاقستان رەسپۋبليكاسىنىڭ مەملەكەتتىك ەلتاڭباسى»، «قازاقستان رەسپۋبليكاسىنىڭ مەملەكەتتىڭ گيمنىنىڭ مۋزىكالىق رەداكسياسى» تۋرالى زاڭعا قول قويدى.

«قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋسيالىق زاڭ 2007 جىلى 4 ماۋسىمدا قابىلداندى. وسى زاڭعا سايكەس جىل سايىن 4 ماۋسىم قازاقستان رەسپۋبليكاسىندا مەملەكەتتىك رامىزدەر كۇنى رەتىندە مەرەكەلەنەدى.

مەملەكەتتىك رامىزدەر – بۇل كەز كەلگەن مەملەكەتتىڭ ەگەمەندىگى مەن ءبىرتۇتاستىعىن بەينەلەيتىن، ونىڭ اجىراعىسىز اتريبۋتتارىنىڭ ءبىرى. قازاقستان رەسپۋبليكاسىندا مەملەكەتتىك تۋ، مەملەكەتتىك ەلتاڭبا جانە مەملەكەتتىك گيمن مەملەكەتتىك رامىزدەر بولىپ تابىلادى.

قازاقستان رەسپۋبليكاسىنىڭ مەملەكەتتىك تۋى

قازاقستان رەسپۋبليكاسىنىڭ مەملەكەتتىك تۋى – ورتاسىندا شۇعىلالى كۇن، ونىڭ استىندا قالىقتاپ ۇشقان قىران بەينەلەنگەن تىك بۇرىشتى كوگىلدىر ءتۇستى ماتا. تۋدىڭ سابىنىڭ تۇسىندا ۇلتتىق ورنەك تىك جولاق تۇرىندە ناقىشتالعان. كۇن، ونىڭ شۇعىلاسى، قىران جانە ۇلتتىق ورنەك بەينەسى التىن تۇستەس.

قازاقستان رەسپۋبليكاسى مەملەكەتتىك تۋىنىڭ اۆتورى – قازاقستاننىڭ ەڭبەك سىڭىرگەن ونەر قايراتكەرى شاكەن نيازبەكوۆ.

قازاقستان رەسپۋبليكاسىنىڭ مەملەكەتتىك ەلتاڭباسى

قازاقستان رەسپۋبليكاسىنىڭ مەملەكەتتىك ەلتاڭباسى – دوڭگەلەك نىساندى جانە كوگىلدىر ءتۇس اياسىنداعى شاڭىراق تۇرىندە بەينەلەنگەن، شاڭىراقتى اينالا كۇن ساۋلەسىندەي تاراپ ۋىقتار شانشىلعان. شاڭىراقتىڭ وڭ جاعى مەن سول جاعىندا اڭىزدارداعى قاناتتى پىراقتار بەينەسى ورنالاستىرىلعان. جوعارعى بولىگىندە – بەس بۇرىشتى كولەمدى جۇلدىز، ال تومەنگى بولىگىندە «قازاقستان» دەگەن جازۋ بار. جۇلدىزدىڭ، شاڭىراقتىڭ، ۋىقتاردىڭ، اڭىزدارداعى قاناتتى پىراقتاردىڭ بەينەسى، سونداي-اق  «قازاقستان» دەگەن جازۋ – التىن تۇستەس.

قازاقستان رەسپۋبليكاسى مەملەكەتتىك ەلتاڭباسىنىڭ اۆتورلارى – بەلگىلى ساۋلەتشىلەر جانداربەك مالىبەكوۆ پەن شوت-امان ءۋاليحانوۆ.

قازاقستان رەسپۋبليكاسىنىڭ مەملەكەتتىك گيمنى

بۇرىن «مەنىڭ قازاقستانىم» ءانى رەتىندە تانىمال بولعان قازاقستاننىڭ گيمنى پرەزيدەنت نۇرسۇلتان نازاربايەۆتىڭ باستاماسى بويىنشا 2006 جىلى 6 قاڭتاردا ەلىمىزدىڭ پارلامەنتىندە بەكىتىلدى. ءبىرىنشى رەت ول 2006 جىلى 11 قاڭتاردا مەملەكەت باسشىسىنىڭ سالتاناتتى ۇلىقتاۋ راسىمىندە ورىندالدى.

ءاننىڭ اۆتورى ءشامشى قالداياقوۆ، ءسوزىن جازعاندار: جۇمەكەن ناجىمەدەنوۆ، نۇرسۇلتان نازاربايەۆ.

پرەزيدەنتتىڭ باسپا ءسوز قىزمەتى ق ر جوعارعى كەڭەسىنىڭ وتىرىسىنان ەستەلىك ۆيدەونى جاريالادى.

شولۋشى: گۇلىم جاقان