4 ماۋسىمدا ۇلانباتىر ۋاقىتىمەن ساعات 05:50-دە اقش-تىڭ فلوريدا شتاتىندا ورنالاسقان كەننەدي عارىش ورتالىعىنان عارىشقا موڭعولدىڭ كەزەكتى سپۋتنيگى ۇشىرىلدى، دەپ جازادى قامشى اقپاراتتىق اگەنتتىگى montsame.mn اگەنتتىگىنە سىلتەمە جاساپ.
سپۋتنيككە گوبي ءشولىنىڭ سيرەك كەزدەسەتىن «ماجالاي» ايۋىنىڭ اتاۋى بەرىلدى. جوسپار بويىنشا، اپپاراتتى SpaceX كومپانياسىنىڭ Falcon-9 زىمىرانى الىپ ۇشىپ، دۇيسەنبىگە دەيىن حالىقارالىق عارىش ستانساسىنا جەتەدى.
جەر سەرىگى عارىشتىق زەرتتەۋلەر جۇرگىزۋگە، سپۋتنيكتەن تۇسىرىلگەن فوتوسۋرەت نەگىزىندە الدەقايدا ناقتىراق گەوگرافيالىق كارتالار جاساۋعا، سونداي-اق كۇتپەگەن اپاتتاردىڭ الدىن الۋعا كومەكتەسەدى.
«ماجالاي» سپۋتنيگىن موڭعول مەملەكەتتىك ۋنيۆەرسيتەتى عالىمدارى مەن ستۋدەنتتەرى كيۋسيۋ جاپون تەحنولوگيالىق ۋنيۆەرسيتەتىمەن بىرلەسىپ جاسادى. جوبا مۇشەلەرىنىڭ ايتۋىنشا، ەكىنشى موڭعول سەرىگىن ۇشىرۋدى جۇزەگە اسىرۋ 2019 جىلعا جوسپارلانىپ وتىر.
