Apple كومپانياسى ءوزىنىڭ وپەراسيالىق جۇيەسىنىڭ جاڭا نۇسقاسى iOS 11ء-دى تانىستىردى دەپ حابارلايدى قامشى اقپاراتتىق اگەنتتىگى BBC ورىس قىزمەتىنە سىلتەمە جاساپ.

Apple سمارتفوندارىنىڭ جاڭا جۇيەسى كومپانيانىڭ مەرەكەلىك مودەلىمەن بىرگە قولدانىسقا ەنەدى. بيىل Apple كومپانياسىنىڭ iPhone تەلەفونىنا شىعارىپ كەلە جاتقانىنا 10 جىل. وسىعان وراي كۇزگى ماۋسىمدا iPhone 8 شىعادى دەپ كۇتىلۋدە. بەلگىلى بولعانداي جاڭا جۇيەدە مەسسەندجەر ارقىلى اقشا جىبەرۋگە، فايلداردى وڭاي باسقارىپ، ديسكتەگى ورىندى ۇنەمدەۋگە مۇمكىندىك بەرىلەدى.

iOS 11ء-دىڭ تۇساۋى سان-حوستاعى دۇنيەجۇزىلىك قۇراستىرۋشىلار كونفەرەنسياسىندا (WWDC) كەسىلدى. جاڭا وپەراسيالىق جۇيەدەگى ەڭ كەڭ كولەمدە تالقىلانىپ جاتقان جاڭالىق - فايلدار مەنەدجەرى. ەندى قولدانۋشى فايلداردى ءوزى باسقارا الادى.

بۇدان وزگە، الداعى ۋاقىتتا iMessage ارقىلى تولەمدەردى جۇزەگە اسىرۋعا بولادى. بۇل Apple Pay جۇيەسى ارقىلى جۇزەگە اسىرىلدى. سونداي-اق، فوتوسۋرەتتەر مەن كارتالاردى وڭدەۋگە ارنالعان باعدارلامالار جاسالدى. جاڭا iOS كۇزدە ىسكە قوسىلادى.