«قازاق مەملەكەتىنە – 550 جىل» بايگەسىنە!!!

مەنىڭ تەگىم - ءتاڭىرقۇت، كۇنبي قاعان، كۇلتەگىن؛

مەنىڭ تەگىم - قوندىگەر، قوندىگەر دەيتىن قۇبا جۇرت، كەلەلى ەلمىن، قاڭلىمىن. مەن - قاڭلىدان تۋعان حان بولام. مەن دەگەنىڭ كەتبۇقا، ينانىش بىلگە بۇقامىن. مەن ۇلى دا، ۇلى ءۇش ءجۇزبىن. ۇلىسپىن جانە ارىسپىن. مەن دەگەنىڭ تايپامىن، تايپامىن جانە بارىسپىن. مەن دەگەن ءبىر رۋمىن، رۋلى ەل، ۇيالى بۇتاقپىن. مەن بولسام ءبىر اتامىن، اتامىن جانە اۋىلمىن ...

مەن - ۇلى حانمىن ھام كىشى حان. سۇلتانمىن جانە بيلەرمىن. مەن رۋباسى ھام اقساقال، اقساقال جانە اۋىلناي ...

مەن - قىرعىننان قالعان ءبىر تۇياق. ەلىمدى جاۋ شاپقاندا قارا وشاقتىڭ قاسىندا امان قالعان قارا ۇلمىن. ءۇستى-باسى قاپ-قارا تۇرىمە قاراپ قالىڭ ەل «قارا قۇرساق» اتاعان.

مەن - ۇيسىننەن قالعان ءبىر تۇياق. ەلىمدى جاۋ شاپقاندا يەندە يەن دالادا، جاپادان جالعىز قالىپپىن. اۋزىما قۇستار ەت سالىپ، اققۇرتقانى ەمىپپىن. جاۋىمدا بۇعان تاڭعالىپ، اتپاپتى مەنى اتپاپتى. اتپاق تۇگىل قاستەرلەپ، حان قاسىنا اپ قالىپتى...

مەنىڭ اتىم سابالاق. استانامدى جوڭعار شاپقاندا، حان اكەمدى جاۋىم اتقاندا، مالايىما ىلەسىپ، شىن اتىمدى جاسىرىپ، قۇتىلىپ كەتكەن «سىعىرمىن». ۇرپيگەن مىناۋ شاشىما، البا-جۇلبا كيىمىمە «سابالاق» اتىم جاراسقان. 

مەن - جاقسىدان قالعان جادىگەر. جالعىز تۇقىم بولامىن.

مەن - تاريحتىڭ ۇلىمىن، قۇدىرەتتىڭ قۇلىمىن. تۇقىمىن تۇگەل قۇرتتىم دەپ ويلاسا دا جاۋلارىم، وشاقتان شىققان «ءتىرىمىن».

مەنىڭ اتىم - كارت تاريح، قالىڭ دا قالىڭ قاتپارى. ۇمىتشاق جانە ەجىكتە. ەمەس قوي، ەندى قايتسىن ول، باياعىداي جاس شاعى. تاريحىم سونان ۇزىك-جۇلىق. قوسىلماعان باستارى.

مەن ءبىر كەزدە گۇلدەنەم، گۇلدەنەم جانە جوق بولام. وقىدىم ءۇش ءجۇز جىل بويى وسىنداي قيسىن وتتاعان...

مەن - كيەلى ءبىر تۇقىم. عايىپتىڭ ءىسى - تاعدىرىم. تەگىمدى جاۋىم جوعالتسىن، جوعالتسىن جاۋىم جوندەسىن، ءىزىمدى دۇسپان ءوشىرسىن، ءوشىرسىن جانە كوشىرسىن....

اداستى سونان ۇرپاعىڭ، اتا جول تاپپاي اداستى. ميلىراقتاۋ بىرەۋى: «ولدىك» دەپ تە زارلادى، ءوزىمىزدى ءوزىمىز «كومدىك» دەپ تە زارلادى. سۇڭعىلالاۋ بىرەۋى باسىپ وتكەن جولداردى «كوردىك» دەپ تە زارلادى...

قامىقپا، قورىقپا، قايعىرما، مەن - ماڭگى ەلمىن!

جوعالمايىن! «قارا وشاقتىڭ استىنان" تابىلاتىن عايىپپىن!

نۇربەك تالەن ۇلى،

قحر، ىلە قازاق اۆتونوميالى وبلىسى،

كۇنەس اۋداندىق 1-ورتا مەكتەبى ادەبيەت وقىتۋشىسى.