وسى قازاق ءتىلى تۋرالى، ناقتىراق ايتساق، ءتىل قولدانىسىنىڭ تەرىس جاقتارى تۋرالى ايتقاندا، بار كىنانى شالا قازاقتاردىڭ ونسىز دا شاراداي بولىپ جۇرگەن شاقشاداي باسىنا ۇيىپ-توگىپ قوياتىندار كوپ. ال تازا قازاقتار نە ىستەپ ءجۇر؟ قانداي دا ءبىر قوعامدىق ورىنعا: دۇكەنگە، ءدارىحاناعا، پوشتاعا، وقۋ ورىندارىنا (ت.ب.) كىرگەندە، ءاپ دەگەننەن ورىسشا سويلەيتىن سول ءوزىمىز ەمەس پە؟! الدىڭدا قازاق تۇر، كەلەسىڭ دە ورىسشا امانداساسىڭ، تەلەفون تۇتقاسىن كوتەرەسىڭ دە، تاعى دا ورىسشا باستايسىڭ، سوسىن ايتارىڭدى ايتا الماي، ايتايىن دەسەڭ، ءسوز تاپپاي، قاقالىپ-شاشالىپ، قالتىراپ-دىرىلدەپ قالاسىڭ. ويىڭدى شاتىپ-بۇتىپ جەتكىزسەڭ، جەتكىزدىڭ، جەتكىزبەسەڭ، ورىسشا سايراپ وتىرعان كوك قاسقانىڭ جەر-جەبىرىنە جەتەسىڭ (تۇتقانى قويعاننان كەيىن، دۇكەننەن شىققاننان كەيىن، ارينە). سوسىن قازاق تىلىندە ەشكىم سويلەمەيتىنى تۋرالى ات توبەلىندە كوپىرىپ تۇرىپ اڭگىمە ايتاسىڭ. وتىرىك دەڭىزدەرشى. دەي المايسىزدار، ويتكەنى دەي الاتىن تازا قازاقتىڭ 10 پروسەنت دارا قازاعى بارىنە جەتپەيدى! مەن ستاتيستيكا جۇرگىزگەن جوقپىن، ءبىراق ءوزىمنىڭ اينالامدا جۇرگەن ادامداردىڭ قىلىعىنان تۇيگەنىم وسى.

التىنبەك سارسەنبايەۆتىڭ مىناداي ءسوزىن كەزدەستىردىم: «قازاق ءتىلى جايىندا جىلاڭقى 40 ماقالا جازعانشا، 40 ادامدى قازاق تىلىنە ۇيرەتىپ شىعارعانىمىز ارتىق». وتكەندە ن. نازاربايەۆتىڭ ۇلىتاۋداعى سۇقباتىندا «ءتىلدى بار دەسەڭ، بار بولادى، جوق دەسەڭ، جوق بولادى» دەگەنىن ەستىدىم، فيلوسوفيالىعى بار، ءبىراق شىندىعى وسى عوي. «سىزگە چەرنىي چاي ما؟» دەيتىن داياشىلاردان «قازاقتاردا چەرنىي ءتۇس جوق پا؟» دەپ سۇرايمىن. ءبىر ءسوزدى باسقا تىلدە ايتۋ ارقىلى ءوزىمىزدىڭ تىلىمىزدە ونداي ءسوزدىڭ (ءتىپتى ونداي ۇعىمنىڭ) جوقتىعىن بىلدىرسەك، قاجەتى بولماسا دا باسقا تىلدە سويلەگەنىمىز ءوز ءتىلىمىزدى جوققا شىعارعانىمىز ەمەس پە؟! قازاق تىلىندە سويلەۋگە قاجەتتىك بولماسا، ول ءتىل كىمگە، نەگە كەرەك؟ تىلگە دەگەن مۇقتاجدىقتى تۋدىراتىن تازا قازاقتار، ەندەشە ءوزىمىزدى جوندەيىك – ناتيجەسى كوپ كۇتتىرمەيدى.

گۇلفايرۋز يسا. (Facebook-تەگى پاراقشاسىنان)