مۇحتار ءابىليازوۆتى ەلىمىزگە رەسەيدەن نەمەسە ۋكراينادان ەكستراديسيالاۋ بويىنشا باس پروكۋراتۋرا قانداي دا ءبىر كەلىسسوز جۇرگىزىپ جاتقان جوق جانە جۇرگىزگەن دە ەمەس. بۇل تۋرالى قۇزىرلى ۆەدومستۆونىڭ باسپا ءسوز قىزمەتى حابارلادى. وندا باس پروكۋراتۋرا وكىلدەرىنىڭ حالىقارالىق قۇقىقتىق ىنتىماقتاستىق پرينسيپتەرىنە سۇيەنەتىندىگىن مالىمدەگەن. تارالعان اقپاراتتا سونداي-اق، «قازاقستاننىڭ باس پروكۋراتۋراسى جولداعان سۇراتۋىنىڭ فرانسۋز سوتىندا قارالۋىن قاداعالايدى جانە ءابىليازوۆتىڭ ۇيىمداسقان قىلمىستىق توبىنىڭ ىزىنە ءتۇسۋىن توقتاتپايدى»، دەلىنگەن. سوندىقتان، فرانسۋز بيلىگىنەن ەكس-بانكيرگە قاتىستى قازاقستان تاراپىنان قوزعالعان قىلمىستىق ىستەردى دە ەسكەرۋىن سۇرايدى. ايتا كەتەيىك، بۇگىندە قازاقستان تاراپى جولداعان سۇراتۋ فرانسيانىڭ ادىلەت مينيسترلىگىندە قارالىپ جاتىر. ەسكە سالساق، رەسەي مەن ۋكراينادان تۇسكەن سۇراتۋلاردى 24 قازاندا قاراعان فرانسيا سوتى ءابىليازوۆتى رەسەيگە ەكستراديسيالاۋ تۋرالى شەشىم شىعارعان بولاتىن.