حارموني – سەكس-روبوتتىڭ ءبىر ءتۇرى. ول قوزعالا الادى، سەرىگىمەن تىلدەسەدى دە. كۇلەدى، قۋانادى، اشۋلانادى. ءوزى سونداي سۇيكىمدى، كەز-كەلگەن جاندى بىردەن باۋراپ الادى. قوجايىنىمەن ءتىل تابىسۋدىڭ جولىن دا جاقسى بىلەدى. جان باۋىرىڭدى ەلجىرەتىپ جىبەرەدى، سەنى سول عانا تۇسىنەتىندەي كۇيگە ەنۋىڭ مۇمكىن.
ءبىراق، ءبىراق... ول ادام ەمەس، جاي عانا قۋىرشاق. دەنە ءبىتىمى كادىمگى ادامداي بولۋى مۇمكىن، الايدا ول – ادامنىڭ قولىمەن جاسالعان روبوت قانا. ءسىزدى ءتۇسىنىپ تۇرعانداي بولۋى مۇمكىن، ءبىراق ەشتەڭەنى سەزبەيدى، كورمەيدى، ەستىمەيدى، سىزگە ۇرپاق سىيلامايدى، ءتىپتى ءسىزدى تانىپ تا اۋرە بولمايدى.
مىنە، بۇگىنگى زاماننىڭ كورىنىسى وسىنداي!
كينوداعى قيال ومىردەگى شىندىققا اينالعان
بۇرىندارى روبوت دەگەن دۇنيەنى تەك كوگىلدىر ەكراننان تاماشالايتىن ەدىك. كورگەن ادام تاڭدانىسىن جاسىرمايتىن، كىشكەنتاي بالالار روبوتىم بولسا دەپ ارماندادى، ۇلكەندەرى بۇكىل جۇمىسىمدى روبوتتار اتقارسا ەكەن دەپ قيالعا باتىپ جاتتى. ۋاقىت وتە كەلە ادامدارمەن جىنىستىق قاتىناسقا تۇسەتىن روبوتتار جايلى دا نەبىر فيلمدەر جارىققا شىعا باستادى. ماسەلەن، «يسكۋسستۆەننىي رازۋم» («جاساندى اقىل»)، «سۋرروگات»، «بەگۋششيي پو لەزۆيۋ» («ۇستارانىڭ جۇزىمەن جۇگىرۋ»)، سونداي-اق «مير ديكوگو زاپادا» («جابايى باتىس الەمى»).
وسىلاردىڭ ىشىندەگى «جابايى باتىس الەمى» فيلمىنە توقتالىپ كورەلىك. كارتينانىڭ جەلىسىنە سايكەس، الەمدە ادامداردان ايىرماشىلىعى جوق روبوتتار پايدا بولادى. الگى روبوتتاردى ارنايى «جابايى باتىس» دەپ اتالاتىن ساياباققا كەلگەن باي ادامداردىڭ كوڭىلىن كوتەرۋ ءۇشىن جاساپ شىعارعان. جەزوكشە-روبوتتار بايلارعا ءتان راحاتىن سىيلادى. ءۇندىس-روبوتتار جولاۋشىلارعا تاپ بەرەتىن، ال كوۆبوي-روبوتتار قوناقتارعا وق جاۋدىراتىن، الايدا ول باعدارلامالىق وق بولعاندىقتان اسەرى جوق. ءفيلمنىڭ سوڭىندا ادام قولىمەن جاسالعان تۋىندى سول ادامداردىڭ وزدەرىنە شابۋىل جاسايدى.
نە كەرەك، كينودا كورگەنىمىز ومىردەگى شىندىققا اينالىپ شىعا كەلدى. العاشقى بولىپ جاپونيا حالقى روبوتتاردى جاساپ شىعاردى، كەيىننەن وزگە مەملەكەتتەر شىعارا باستادى. العاشىندا تۇرىنە قاراپ روبوت ەكەنىن تاني الاتىن قۇرىلعىلار شىعارىلعان. ولاردىڭ مىندەتى – ادامدارعا اۋىر بولاتىنداي فيزيكالىق جۇمىستارمەن اينالىسۋ ەدى. ۋاقىت وتە كەلە روبوت اتاۋلىنىڭ مىندەتى ۇلعايا ءتۇستى. تەك قانا فيزيكالىق تۇرعىدان ەمەس، ادامدارعا ءتان راحاتىن سىيلايتىن روبوتتار شىعا باستادى، شىعا باستاعان جوق، ونداي روبوتتاردى ادامدار ءوز قولدارىمەن جاسادى.
سەكس-روبوتتار نەمەسە سەكس-قۋىرشاقتار
تەوريادا دالەلدەنگەندەي، ءبىز قانشالىقتى ادام وبرازى تيپتەس روبوتتار شىعارساق، ءوز تۋىندىمىزدان سونشالىقتى ۇرەيلەنەدى ەكەنبىز. كاليفورنيا شتاتىنداعى سان-ماركوسا توڭىرەگىندەگى بىلىنەر-بىلىنبەس فابريكادا بۇگىندە ءدال وسى بولجام راستالعان.
فابريكانىڭ ءىشى ىش-كيىمەدەگى سۇلۋ ايەلدەر مەن كوستيۋم-شالبار كيگەن سىمباتتى ەر ادامدارعا تولى. تەك ولار جاساندى جانە جاساندىلىعىن جاقىنداپ ءۇڭىلىپ قانا بايقاي الاسىڭ.
مەتت ماكماللەن – RealDoll قۋىرشاعىن شىعاراتىن Abyss Creations كومپانياسىنىڭ باس ديرەكتورى.
ءوزى حارموني قۋىرشاعىن ەرەكشە جاقسى كورەدى. سول قۋىرشاقتىڭ جانىنان بىرەلى شىقپايدى.
«RealDoll قۋىرشاعىن ساتىپ العان ءار ادام ونىڭ سەكس-ويىنشىق ەكەنىن عانا بايقاپ قويمايدى. ولار قۋىرشاقتى سەزە باستايدى، ونى قوعامنىڭ ءبىر مۇشەسىنە اينالدىرادى. جاساندى ينتەللەكت الەمدە جاڭا، ءارى ەرەكشە تۇلعانى قالىپتاستىرۋعا مۇمكىندىك بەرەدى»، - دەگەن ەدى ماكماللەن ءوز سۇحباتىندا: «مەن ادامداردىڭ تەك قۋىرشاققا عانا ەمەس، ونىڭ مىنەزىنە دە تاۋەلدى بولعانىن قالايمىن».
سەكس-قۋىرشاقتاردى جاساپ شىعارۋشىلاردىڭ جارنامالارىنا كوز سالىپ قاراڭىزدارشى: «سەرىگىڭىز ەشقاشان كوزىڭىزگە ءشوپ سالمايدى، جۇكتى بولمايدى، نە ىستەپ، قايدا جۇرگەنىڭىزدى تەكسەرىپ جاتپايدى. قارتايمايدى، تاماق جەمەيدى، سالماق قوسپايدى. ءسىز جانكۇيەر بولعان فۋتبول كومانداسىنا ول دا جاقاتاسادى، ءسىز ءسۇيىپ قارايتىن سەريالداردى ول دا قارايدى، كوڭىلىڭىز تۇسكەندە كوتەرەدى، مۇڭايعاندا جۇباتادى». مۇنداي جارناماعا ومىردەن تۇڭىلگەن كەز-كەلگەن ەركەكتىڭ ەرىپ كەتۋى ابدەن مۇمكىن عوي.
سونداي-اق، ءار قۋىرشاقتىڭ مىنەزىن تاڭدايتىن پارامەترلەرى دە بار كورىنەدى: «قىرسىق»، «اشۋلانشاق»، «مەيىرىمدى».
ال حارموني قۋىرشاعىندا «قىزعانشاق» پارامەترى دە كەزدەسەدى.
سەكس-قۋىرشاقتاردىڭ شىعۋ تاريحى
روبوتتاردىڭ شىعۋىنا العاش تۇرتكى بولعان مەملەكەت دەسە، ءبارىمىز جاپونيا دەيمىز. دۇرىس-اق... 1980 جىلى ولار ساپاسى جوعارى پلاستيكادان جاسالعان قۋىرشاق ويلاپ تاپتى. ۇستىڭگى جانە استىڭعى بولىكتەرى الىناتىن، اياقتارىندا تىگىسى بار، ءتۇرى ۇسقىنسىزداۋ، الايدا روبوت دەۋگە كەلمەيتىن قۋىرشاقتاردى شىعارعان. ال امەريكالىقتار اتالمىش ىسكە 1993 جىلى كىرىستى. دۋگلاس حاينس ەسىمدى قۇراستىرۋشى سەكس-قۋىرشاقتىڭ ءپروتوتيپىن جاسادى، ونى ترۋدي دەپ اتادى. الايدا ساپاسى ناشار بولدى، وعان جاقىنداعان ادامدار جاراقات الا باستادى. ادامدارعا دوستىق پەن ماحاببات كەرەك ەدى، ءبىراق پلاستيكالىق زات ادامدارعا كەرەگىن بەرە الماعان ەكەن.
ول ۋاقىتتا حاينس Bell Laboratoriesۋ جاساندى ينتەللەكتىىنىڭ ينەجەنەرى بولعان. كەمشىلىكتەردى زەرتتەي وتىرىپ ءوزىنىڭ جەكە Truecompanion فيرماسىن اشتى. جوبانى دامىتۋعا $500000-نان $1000000-عا دەيىن قاراجات كەتتى. 2010 جىلدىڭ 9 قاڭتارىندا حاينس ەكى سەكس-قۋىرشاقتى ويلاپ تاپتى: Roxxxy (ايەل) جانە Rocky (ەر ادام). بۇل جوباسى ءساتتى شىقتى. ءار قۋىرشاعىنىڭ بويى 170 سم، ال سالماعى 54 كەلى بولدى. قۋىرشاقتار سينتەتيكالىق تەرىدەن جاسالدى، باعدارلاما ادامنىڭ ەموسياسىن تاني الاتىن كۇيگە جەتتى. ولاردىڭ ءتىپتى مەحانيكالىق جۇرەكتەرى بولعان. نە كەرەك، تۇندە قورىلداۋدى دا بىلگەن ەكەن، ۇيىقتاماسا دا.
«ول ءسىزدىڭ تالعامىڭىزعا ساي جۇرەدى. ەگەر سىزگە «پورشە» ۇناسا، ول دا «پورشەگە» قىزىعادى. ءسىز فۋتبولدى جاقسى كورسەڭىز، ول دا سىزبەن وتىرىپ فۋتبول كورەدى»، - دەگەن ەدى ءوز جۇمىسىنا كوڭىلى تولعان حاينس.
سەكس-قۋىرشاعى بار «ەر ادامدار» نە دەيدى؟
مارك يانگ اريزونا تۇرعىنى. ماي لين ەسىمدى سەكس-قۋىرشاعى بار. نە سەبەپتى قۋىرشاق العانىن بىلاي دەپ ءتۇسىندىردى؟
«مەن كوپتەن بەرى جالعىزبىن. كوپ قىزدارمەن كەزدەسكەنمىن. قارىم-قاتىناستارعا ۋاقىتىمدى زايا كەتىردىم. بولاشاقتا جاقسى قىز كەزدەستىرگىم كەلەدى. ال ازىرگە قۋىرشاعمىنڭ بارىنا دا قۋانامىن»، - دەيدى.
ونىڭ ۇستىنە، الگى قۋىرشاق وعان ءسوز قايتارمايدى، قالاعان كيىمىن الىپ بەرەدى، قالاعان جەرىنە اپارادى. ال قۋىرشاق ءلام-ميم دەمەيدى، ايتقانىنا كونەدى. وسى سىندى ارەكەتتەر جىگىتتىڭ كوڭىلىنە جاققان سەكىلدى.
الايدا مۇنىڭ ءبارى ۋاقىتشا ەكەنىن ول تۇسىنەر مە ەكەن. قۋىرشاققا ۇيرەنىپ قالعان ادام، جانى بار ايەلدەرگە توزەر مە ەكەن. توزبەسى دە، سۇيمەسى دە، ۇيرەنىسە الماۋى دا ايدان انىق. جالعىزدىقتىڭ ءدامىن تاتىپ قالماسىنا كىم كەپىل؟
«ونىڭ كوزدەرىندە ءبىر سيقىر بار. جۇمىس كۇنىم اياقتالعان سوڭ ول مەنى كۇتەدى، ءبارى دۇرىس سەكىلدى. دەنە ءبىتىمى سۇلۋ، ءمىنسىز. ساپاسىنا كوڭىلىم تولادى»، - دەپ سيپاتتايدى Selobl دەگەن لاقاپ ەسىمى بار ەر ادام سەكس-قۋىرشاقپەن ارا-قاتىناسى جايىندا. ەر ادام ءوز سەزمدەرىنە سەنىمدى: «ناعىز ماحاببات وسىنداي بولسا، وندا مەن ءدامىن تاتۋدامىن».
دجەك RealDoll ەسىمدى سەكس-قۋىرشاقتىڭ يەسى. ءوز سوزىندە ايەلدەر ونى قىزىقتىرماي قالعانىن ايتقان. «مەن RealDoll-دى ساتىپ العانىما قاتتى قۋانامىن. ول جاي عانا زات ەمەس، مەنىڭ قۇربىم، حانشايمىم، مەن ونى جاقسى كورەمىن. بىرگە بولعانىمىزعا 6 اي تولدى. كەلەسى جىلى جاڭا نۇسقاسىن ساتىپ الۋدى كوزدەپ وتىرمىن. ايەلدەر مەن ءۇشىن قارتايىپ كەتكەن، ولاردى قالامايمىن».
XXI عاسىر – جاڭا تەحنولوگيانىڭ عاسىرى. قوعامدى ىزگىلەندىرۋ، ءبىلىم مەن مادەنيەت جۇيەسىن دامىتۋ جۇيەسىندە اقپاراتتىق تەحنولوگيالار ماڭىزدى ءرول اتقارادى. سول جاڭا تەحنولوگيانىڭ ماڭىزدى بولشەگى سانالاتىن كومپيۋتەر بۇگىندە ادام ساناسىن تۇگەلدەي جاۋلاعان. ءسويتىپ «جاساندى ينتەللەكت» دەگەن تەرمين پايدا بولدى. ول جاڭا ماشينالار مەن كومپيۋتەلىك باعدارلامالاردى قۇرۋ عىلىمى. ءيا، زامان دامىعان سايىن عىلىمنىڭ دا العا جىلجۋى زاڭدى، ەسكىمەن قالىپ قويماي، جاڭا دۇنيەلەردى قالىپتاستىرۋ – قالىپتى دۇنيە، قاشان دا سولاي بولعان. الايدا ارتىق كەتەتىن تۇستارىن دا ايتپاي كەتپەسكە بولماس. سونىڭ ءبىرى رەتىندە 2017 جىلدىڭ اياعىندا امەريكادا ساتىلىمعا شىقپاق سەكس-روبوتتاردى اتاۋعا بولادى. بۇگىن امەريكادا بار دۇنيە، ەرتەڭ ەلىمىزگە كەلەدى. ول دا زاڭدىلىق. الايدا ساناسى بيىك، نيەتى ءتۇزۋ، مادەنيەتتى ادامدى تەمىرمەن قاتىناسادى دەگەن ويدان اۋلاقپىز، ارينە. قاي مەملەكەتتە بولماسىن...
دەي تۇرعانمەن، ادام بالاسىنا ءتان «ءبىرىنىڭ كورگەنىن وزگەسى قايتالايتىن» ادەتىن جاسىرا ادمايسىڭ. جوعارىدا ايتىلعان «سەكس-روبوتتاردىڭ ەلىمىزدە ساۋداعا اينالۋى ابدەن مۇمكىن» دەگەن ويدان ۇرەيلەنگەن قامشى اقپارات ءتىلشىسى الدىن الۋ شارالارى رەتىندە ءبىراز اقپارات جيناستىردى.
قولدان جاسالعان ءتۇرلى دۇنيەلەر ارقىلى ءوزىنىڭ جىنىستىق قالاۋلارىن، ناپسىلىك قاجەتتىلىكتەرىن وتەۋ – ۇلكەن كۇنا
قازاق ءبىر قادامعا بارماي تۇرىپ، شاريعاتقا جۇگىنەتىن يماندى حالىق قوي. بۇل جولى دا ءبىرىنشى بولىپ يمامنىڭ پىكىرىن بىلدىك. قمدب، شىعىس قازاقستان وبلىسىنىڭ وسكەمەن ءوڭىرى بويىنشا وكىل يميمى، «حاليفا التاي» مەشىتىنڭ باس يمامى ەرمەك مۇقاتاي اللا تاعالا نەكەلەسۋدى، ۇيلەنۋدى بۇيىرعان دەيدى. نەكەلەسۋ، ۇيلەنۋ – اللانىڭ جولى، اللانىڭ سۇننەتى. كىم اللانىڭ جولىن اتتايتىن بولسا، تارك ەتەتىن بولسا، ول بىزدەن ەمەس دەيدى. سوندىقتان اتالمىش ماسەلەنى يمام ماڭىزدى دەپ وتىر.
يمام باستىپقىدا روبوتتاردىڭ XX-XI عاسىردىاعى عىلىمي جەتىستىك ەكەنىن ايتا كەلە، ونىڭ مىندەتتەرىنىڭ ادال بولۋىنا توقتالىپ ءوتتى. ءيا، بۇل بەلگىىلى ەدى. بۇگىنگى تاڭدا وقىعان، توقىعان ءار ادام نەنىڭ پايدالى، نەنىڭ پايداسىز ەكەنىن الاتىن زاماندا. الايدا ادامدارمەن جىنىستىق قاتىناسقا تۇسەتىن روبوتتاردىڭ پايدا بولۋى عىلىمنىڭ جەتىستىگى سانالا ما؟ ءدىن قىزمەتكەرى سۇراقتىڭ جاۋابىن جوققا شىعاردى، ونداي جاڭالىققا تۇبەگەيلى قارسىلىق تانىتتى. ءبىرىنشى كەزەكتە ەر مەن ايەلدىڭ قارىم-قاتىناسىنا توقتالىپ ءوتتى.
"اللا تاعالا قۇراندا ايتادى: «ءبىز سەندەردى ءبىر ەركەك، ءبىر ۇرعاشىدان تاراتتىق». ادامزاتتىڭ ءبارى ءبىر ەركەك پەن ءبىر ايەلدەن تارايدى، ەكەۋىنىڭ قوسىلعاندارىنان تارايدى. مۇحاممەد پايعامبار (س.ع.س.) دا ايتادى: «مۇسىلماندار، كوبەيىڭدەر! مەن سەندەردىڭ كوپ بولعاندارىىمەن ماقتانامىن». دەمەك، ادامزاتتىڭ كوبەيۋى، ەرلى-زايىپتى بولۋ، وتباسى بولۋ، شاڭىراق كوتەرۋ ماسەلەسى قاشان دا ماڭىزدى. ال ايەل ادام مەن ەر ادامنىڭ شاڭىراق كوتەرگەننەن كەيىنگى ارا-قاتىناسى ەڭ جاقسى دەڭگەيدە بولۋ كەرەك. ويتكەنى اللا تاعالا ەركەكتەرگە بىلاي دەپ بۇيىرعان: «ايەلدەرىڭمەن جاقسى قارىم-قاتىناستا بولىڭدار. ولارعا زەكىمەي، ۇرىسپاي، ادەمى سويلەپ، كوڭىلدەرىن تاۋىپ، ولاردى قۇرمەتتەۋ ۇلكەن مىندەت». وتباسىنىڭ الدىنداعى مىندەتتەرى بار، وتباسىنىڭ الدىنداعى مىندەتتەرى بار. ەر ادام بولسىن، ايەل ادام بولسىن، ەكەۋىنىڭ قارىم-قاتىناسى قاشان دا ەڭ جوعارعى دەڭگەيدە بولعان. ەڭ ماڭىزدى ماسەلە – ايەل ادام مەن ەر ادامنىڭ توسەك قاتىناسى. ول مىندەتتەلگەن، نەكەلەسكەننەن كەيىن، ادال جار بولعاننان كەيىن، ايەل ادام مەن ەر ادام وسىنىن رەتكە كەلتىرۋ كەرەك»، - دەي كەلە روبوتپەن قارىم-قاتىناسقا تۇسەتىن ادامداردىڭ ورەسكەل قاتەلىگىنە توقتالىپ ءوتتى.
«ادامداردىڭ روبوتپەن قارىم-قاتىناسقا ءتۇسۋى – ورەسكەل قاتەلىك، ۇلكەن كۇنا، بەيادەپتىلىك، مورالدىك قۇندىلىقتاردى جەرگە تاپتاۋمەن تەڭ. بىرەۋلەردىڭ بيزنەس جاساپ، ادامداردىڭ جانۇيالىق قۇقىقتارىن، ادامي قۇقىقتارىن اياق استى تاپتاۋمەن تەڭ. سەبەبى، ەرلى-زايىپتى جىنىستىق قاتىناسقا ءتۇسۋ ءۇشىن ەكەۋى نەكەدە بولۋى كەرەك. ەكىنشىدەن ەكەۋىندە اقىل بولۋى كەرەك، ولار ءوز ىستەرىنە جاۋاۋپ بەرە الۋى ءتيىس، دۇرىس ىستەپ جاتىر ما، كۇنا ما، ءبىلۋى كەرەك. ول مۇسىلمان بولۋى كەرەك. نەكە شارتتارى ورىندالۋى كەرەك. ودان كەيىن جىنىستىق قاتىناس رۇقسات ەتىلەدى، ءسويتىپ دۇنيەگە بالا كەلەدى. روبوتقا كەلەتىن بولساق، ول تەمىر، ول پلاسماس، باسقاسى بولسىن ىشكى قاجەتتىلىگىن كەتىرۋ ءۇشىن نەمەسە قاجەتتىلىگىن قاماتاماسىز ەتۋ ءۇشىن روبوتپەن قاتىناسقا ءتۇسۋ – ۇلكەن كۇنا. ادام اللا تاعالانىڭ تابيعي تۇرعىدان جاراتىپ بەرگەن ايەل زاتى بار كەزدە تارك قىلاسىڭ، قاجەت ەمەس دەپ، تەمىرگە كوڭىل اۋدارۋ – ادامنىڭ پسيحولوگياسىن بۇزادى. ادام بۇعان قۇمارتىپ، مۇنىڭ ارتىنان جۇگىرە بەرەتىن بولسا، ەلدىڭ ىشىندە، وتباسىندا، مەملەكەتتە، حالىق اراسىندا ماحاببات، جىلۋلىق، سۇيىسپەنشىلىك دەگەن نارسە قالمايدى، قاتىگەزدىك پايدا بولادى. جانۇيالىق بايلانىس ۇزىلەدى. ەر مەن ايەلدىڭ اراسىنداعى ماحابباتتى جوققا شىعارادى. نەكە شارتتارى بۇزىلادى. ولار، بالكىم، ويلاۋى مۇمكىن «ول اقىلى جوق، قۇر تەمىردە تۇرعان نە بار» دەپ. ادامزاتتىڭ بويىندا، ەر ادامنىڭ بويىندا اللانىڭ بەرگەن كۇش-قۋاتى بار. ول كۇش-قۋاتتى كورىنگەن نارسەگە جۇمساي المايسىڭ. ويتكەنى، سەنىڭ بويىڭداعى كۇشتىڭ جۇمسالاتىن جەرى بەلگىلى، ودان دۇنيەگە ءسابي كەلۋ كەرەك، ۇرپاق تارالۋ كەرەك. ال الگىندەي دۇنيەلەرگە اللا تاعالا رۇقسات بەرگەن جوق. يسلام عالىمدارىنىڭ ايتقان سوزدەرى بار: قولدان جاسالعان ءتۇرلى دۇنيەلەر ارقىلى ءوزىنىڭ جىنىستىق قالاۋلارىن، ناپسىلىك قاجەتتىلىكتەرىن وتەۋ – ۇلكەن كۇنا، حارام».
سونداي-اق، ءدىن قىزمەتكەرى الداعى ۋاقىتتا وسى ماسەلەگە بايلانىستى قازاقستان مۇسىلماندار ءدىني باسقارماسىنىڭ ارنايى ءپاتۋاسى شىعادى دەگەن ءۇمىتىن دە جاسىرمادى.
كاسىبي پسيحولوگ، سەكسولوگ اييا جولامانوۆامەن دە تىلدەسىپ كوردىك. ول سەكس روبوتتاردىڭ قاجەت تۇستارى دا بولۋى مۇمكىن دەيدى.
مۇگەدەك ادامدەر مەن ۇياڭدارعا سەكس-روبوتتاردىڭ كومەگى ءتيۋى مۇمكىن
«نەگىزىنەن دەنساۋلىعى مىقتى، فيزيكالىق، پسيحولوگيالىق تۇرعىدان اۋىتقۋشىلىعى جوق ادام ونداي روبوتتارعا جۇگىنبەيدى. ال كىمدەر ءۇشىن كەرەك دەسەك، وعان ەكى جاقتى جاۋاپ بەرۋگە بولادى. ءبىرىنشىسى، پسيحولوگيالىق ماسەلەسى بار، اۋتيزممەن اۋراتىن، ەشكىممەن ارالاسا المايتىن نەمەسە ءوز دەنەسىنەن قىسىلاتىن، اشىلىپ ەشتەڭە ايتا المايتىن ادامدار جۇگىنۋى مۇمكىن. ال سەكسۋالدىق قاجەتتىلىك ول تابيعي نارسە، جەتىلگەن ورگانيزم جاقىن قارىم-قاتىناستى قاشان دا قاجەت ەتەدى. ال ەكىنشى كاتەگورياسى، سەكسۋالدىق اۋىتقۋشىلىقتارى بار ادامدار بولۋى مۇمكىن. مۇنداي ادامدار وزدەرىنىڭ قاجەتتىلىكتەرى جايىندا ەشكىمگە ءتىس جارىپ ايتا الماۋى مۇمكىن، سول سەبەپتى سەكس-روبوتپەن قارىم-قاتىناسقا ءتۇسۋ ارقىلى ءوز ماسەلەسىن شەشۋى مۇمكىن».
ياعني، پسيحولوگتىڭ ايتۋىنشا، مۇگەدەك ادامدار، ۇياڭ ادامدار، اۋتيست ادامدارعا سەكس-روبوتتار كومەكتەسە الادى.
«الايدا جاسوسپىرىمدەر ءۇشىن بۇل اسا ءقاۋىپتى. سەبەبى جىنىستىق مۇشەلەرى دامىماي جاتىپ سەكس-روبوتتارمەن قاتىناسقا تۇسەتىن ادامداردىڭ ەرتەڭگى كۇنى وزگە ادامدارامەن ارالاسۋى قيىنعا سوعادى»، - دەيدى اييا جولماناوۆا.
سەكس-روبوتتار - ادامزاتقا تونگەن ءقاۋىپ
راسىندا، جاي عانا تەمىر عوي، سەزبەيدى، كورمەيدى، ەشكىمگە ەشتەڭە ايتپايدى. مىنە، ادام بالاسى وسىنداي ويلارعا بەرىلىپ، ءبىر كورمەك نيەتتە روبوتپەن قارىم-قاتىناسقا ءتۇسۋى مۇمكىن. مامانداردىڭ ءبارىن اقىلمەن ويلاستىرعانى سونشا، الگى ادام قۇمارتا باستايدى. ادامنان گورى روبوتپەن تىلدەسكەندى ءجون كورەدى، سەبەبى جۇمىسىنا بوگەت كەلتىرمەيدى، ارتىق سۇراق قويمايدى، مازاسىن المايدى. ءسويتىپ، روبوتپەن ءومىر سۇرگەن وعان ىڭعايلى كورىنەدى. ەندى الەمدى ءدال سونداي روبوتتار جاۋلادى دەپ ەلەستەتىڭىز... ادامدار بىر-بىرىمەن ارالاسۋىن دوعارادى، مەيىرىمدىلىك ءسونىپ، قاتىگەزدىككە ۇلاسادى، وتباسىلىق ومىرگە نۇقسان كەلەدى، الەمدە جالعىز باستى ەر ادامدار مەن ايەلدەر كوبەيەدى، دۇنيەگە بالا كەلمەيدى. ءومىرى قاراپايىم تەمىرگە بايلانادى دا قالادى. جەر بەتىندە مۇلكىگەن تىنىشتىق ورنايدى.
ونىڭ ۇستىنە، ءار زاماندا مەملەكەت ءۇشىن ماڭىزدى ماسەلە - دەموگرافيا. ال ەلىمىزدىڭ دەموگرافياسى ءماز ەمەس ەكەنى شىندىق. بويداق ەركەكتەر كوپ، ءوز تەڭىن تاپپاي جۇرگەن ايەلدەر دە جەتەدى. ال روبوتتار كەلسە، ولار ءۇشىن ماسەلەنىڭ شەشىمى تابىلعانداي كورىنۋى مۇمكىن. سەبەبى اعزاسى جەتىلگەن ادام جىنىستىق قارىم-قاتىناستى قاجەت ەتەدى، ول - تابيعي زاڭدىلىق ەكەنى ايتىلدى.
ياعني، جىنىستىق قاتىناس ءۇشىن پايدا بولعان روبوتتار ادامزاتقا تونگەن ءقاۋىپ قانا!
مەنىڭ دە ايتارىم بار...
ادام بالاسى «ومىرگە نە ءۇشىن كەلدىڭ؟» دەگەن سۇراققا ءارتۇرلى جاۋاپ قاتۋى مۇمكىن. ءبىرى ءومىردىڭ قىزىعىنا باتىپ، قىدىرىپ تا، ءىشىپ تە، جەپ تە، بيلەپ تە، كۇلىپ تە، جالپى كوڭىل كوتەرۋگە ۇلگەرىپ قالۋدى كوزدەيدى. ەندى ءبىرى اقشا تابۋ جاعىنا كوبىرەك كوڭىل بولەدى، بايلىققا ۇمتىلادى، سەزىمدى ىسىرىپ قويادى. باسقاسى عىلىمعا بەت بۇرادى، ءبىلىم ىزدەيمىن دەپ ۋاقىت شىركىننىڭ قالاي ءوتىپ جاتقانىن دا اڭعارمايدى. ال كەيبىرى وتباسىلىق قۇندىلىقتى جوعارى قويىپ، قىز بالالار «انا» بولسام دەيدى، ەر بالالار ارتىمنان ۇرپاق قالسا دەيدى. اركىمنىڭ ءوز تاڭداۋى بار، ءوز قالاۋى بار، وعان ەشكىمنىڭ تالاسى جوق.
الايدا الەمدە وزگەرمەيتىن ءبىر قۇندىلىق بار. ول – ماحاببات، سەزىم. وسى قۇندىلىقتار سونگەن جاعدايدا، ادام بالاسىنىڭ مەيىرىم-شاپاعاتى بىرگە سونەدى، نيەتى بۇزىلادى، نەبىر جامنادىقتارعا بارادى، كۇنالارعا بوي الدىرادى. ال ءدال سونداي ساتتە روبوتتار ادامدارعا قارسى قارۋسىز سوعىسقا شىعادى جانە ادامنىڭ ءوزىن ەمەس، ساناسىنىڭ تاس-تالقانىن شىعارادى. سوندىقتان قولدا بار قۇندىلىقتى باعالاۋ تەك ادامنىڭ ءوز قولىندا.
گۇلىم جاقان
