قىرعىزستان رەسپۋبليكاسىنىڭ باسشىسى المازبەك اتامبايەۆ قازاقستان پرەزيدەنتى نۇرسۇلتان نازاربايەۆتى تۋعان كۇنىمەن قۇتتىقتادى، دەپ جازادى قامشى اقپارات اگەنتتىگى. بۇل تۋرالى قىرعىزستاندىق kabar.kg پورتالى حابارلايدى.
«باۋىرلاس قازاقستاننىڭ ءار تابىسى، الەۋمەتتىك-ەكونوميكالىق جەتىستىكتەرى، الەمدىك دەڭگەيدەگى جوبالاردى جۇزەگە اسىرۋى مەن حالىقارالىق ارەناداعى ابىرويىنىڭ ارتۋى ءسىزدىڭ كورەگەندى ساياساتىڭىزدىڭ ارقاسى. ءسىزدىڭ باي ءارى تابىستى ءومىرىڭىز قازاقستان حالقىنىڭ زور قولداۋىنا يە بولعان جەمىستى ساياساتىڭىزدىڭ بەرىك نەگىزى ەكەنىندە داۋىم جوق»، - دەلىنگەن قىرعىز باسشىسىنىڭ قۇتتىقتاۋىندا.
سونداي-اق، المازبەك اتامبايەۆ نۇرسۇلتان نازاربايەۆقا مىقتى دەنساۋلىق، مەملەكەتتىك ساياساتتا تابىستارعا جەتۋدى جانە قازاقستان حالقىنا بەيبىتشىلىك پەن وركەندەۋ تىلەدى.
