سەمەيدە ورالمانداردىڭ قازاقستان زاڭدارىن ءبىلۋى تۇرعىسىنداعى بىلىمدەرىن كەڭەيتۋگە كومەكتەسۋ ءۇشىن اقپاراتتىق-قۇقىقتىق ماتەريالداردىڭ جيناعى دايىندالىپ، شىعارىلدى. ولار تەگىن تاراتىلۋدا، دەپ حابارلادى قالانىڭ ىشكى ساياسات باسقارماسىنان. بۇل تۋرالى قازاقپارات جازدى.
بۇۇ-نىڭ دامۋ باعدارلاماسىنىڭ وكىلدەرى «يننوۆاسيالىق تاسىلدەردى ايماقتىق جوسپارلاۋعا ەنگىزىپ، حالىققا الەۋمەتتىك قىزمەت كورسەتۋ ارقىلى ايماقتىڭ باسەكەگە قابىلەتتىلىگىن ارتتىرۋ» جوباسىنىڭ اياسىندا شقو-عا تۇراقتى تۇردە تۇرۋعا كەلگەن ورالمانداردىڭ قۇقىقتىق ساۋاتتىلىعىن ارتتىرۋ بويىنشا جۇمىستار جۇرگىزىپ جاتىر. بۇل قۇرالداردى شىعارۋ ءۇشىن «سەمەي جاستار اسسامبلەياسى» قوعامدىق بىرلەستىگىمەن تارتىلعان ماگيسترلەر مەن زاڭگەر عالىمدار تەر توكتى. ءقازىر العاشقى التى بروشيۋرا جارىققا شىقتى. وندا اتاجۇرتىنا ورالعاندارعا حالىقتىڭ كوشى-قونى، زەينەتاقىمەن قامتاماسىز ەتىلۋى، تۇتىنۋشىلاردىڭ قۇقىعىن قورعاۋ، مەملەكەتتىك ساتىپ الۋلار، مەملەكەتتىك الەۋمەتىك تاپسىرىس سالالارىنداعى زاڭدارى مەن نەكە جانە وتباسى تۋرالى كودەكس نورمالارى تۇسىندىرىلگەن. «ءبىز بۇل كىتاپشالارلى ورالماندار ءوز بەتتەرىنشە الەۋەتتەرىن ارتىرىپ، تۋىنداعان ماسەلەلەردى وزدەرى شەشە الۋى ءۇشىن شىعارىپ وتىرمىز. زاڭدى بىلمەگەننەن ادامداردىڭ قۇقىقتىق قاتەلىكتەرگە جول بەرىپ، كەيىن اقشا بەرىپ ادۆوكاتتارعا جۇگىنۋ ارقىلى تۋىنداعان ماسەلەلەرىن شەشەتىندەرى جاسىرىن ەمەس. سوندىقتان ءبىز بۇل كىتاپشالار ورالمانداردىڭ قازاقستاندىق قوعامعا الەۋمەتتىك-ەكونوميكالىق تۇرعىدان بەيىمدەلۋىنە سەپتىگىن تيگىزەدى دەگەن ءۇمىت ارتامىز»، - دەيدى قوعامدىق بىرلەستىك ءتوراعاسى ماقسات كارىبايەۆ.
