وڭتۇستىك قازاقستان وبلىسىندا  جول اپاتى بولىپ، ونىڭ سالدارىنان اكىمىنىڭ كەڭەسشىسى مەن دەپۋتات قازا بولدى، دەپ حابارلايدى Qamshy.kz اقپارات اگەنتتىگى okg.kz-كە سىلتەمە جاساپ حابارلايدى.  وسى وقيعاعا بايلانىستى تاراتىلعان مالىمەتتەرگە قاراعاندا، مارقۇم بولعان ازاماتتار وتىرعان "تويوتا پرادو" كولىگىن 1985 جىلى تۋعان تۇركىستاندىق ازامات باسقارعان. 32 جاستاعى جۇرگىزۋشى ءقازىر تۇركىستان قالالىق اۋرۋحاناسىنىڭ جانساقتاۋ بولىمىندە جاتىر. دارىگەرلەر ونىڭ جاعدايىن وتە اۋىر دەپ باعالاپ وتىر.  تۇركىستان قالاسىنىڭ پروكۋرورى رۋسلان ءابدىرايىموۆتىڭ ايتۋىنشا، رولدە بولعان جۇرگىزۋشىنىڭ سەيىت ەرتاي مەن قامىتبەك ايتورەيەۆكە تۋىستىق قاتىناستارى جوق. ول زيارات ەتىپ كەلگەن دەپۋتات پەن كەڭەسشىنى الىپ جۇرگەن. ال جول جيەگىندە كولىگى بۇزىلىپ تۇرعاندار سايرام اۋدانىنىڭ تۇرعىندارى ەكەنى انىقتالدى. 40 جاستاعى قارابۇلاق اۋىلىنىڭ تۇرعىنى ۇلىمەن بىرگە يقان اۋلىلىنان گاز-53 اۆتوكولىگىنە قاربىز ارتىپ، ۇيىنە قايتىپ كەلە جاتقان. جولدا كولىگى بۇزىلىپ قالادى. جول جيەگىندە تۇرعان ولاردى تويوتا پرادو كولىگى سوعىپتى. جول كولىك وقيعاسىنان اكەلى بالالى ەشقانداي زارداپ شەكپەگەن.

ەسكە سالايىق، كەشە كۇندىز ساعات 13-00-دەر شاماسىندا شىمكەنت-سامارا تاسجولىنىڭ 107 شاقىرىمىندا جول جيەگىندە بۇزىلىپ تۇرعان گاز-53 اۆتوكولىگىنە تويوتا پرادو كولىگى سوقتىعىسىپ، سونىڭ سالدارىنان ەكى جولاۋشى قازا تاپقان ەدى. باقيلىق بولعاندار وڭتۇستىك قازاقستان وبلىس اكىمىنىڭ كەڭەسشىسى سەيىت ەرتاي مەن وبلىستىق ءماسليحاتتىڭ دەپۋتاتى قامىتبەك ايتورەيەۆ ەدى. ال، تويوتا كولىگىنىڭ جۇرگىزۋشىسى اۋرۋxانادا جانساقتاۋ بولىمىنە تۇسكەن بولاتىن. قازىرگى تاڭدا وسى وقيعا بويىنشا قىلمىستىق كودەكستىڭ 345 بابى 4 بولىگىمەن ءىس قوزعالىپ، سوتقا دەيىنگى تەرگەپ-تەكسەرۋ جۇرگىزىلۋدە. قىلمىستىق ءىستى وقو ءىىد-نىڭ انىقتاۋ باسقارماسى قاراۋدا.