مىسىردا 6 قازاقستاندىق جوعالىپ كەتتى، - دەپ حابارلايدى Qamshy.kz اقپارات اگەنتتىگى.

بۇل جايىندا ق ر ءسىم باسپا ءسوز قىزمەتىنىڭ باسشىسى ءانۋار جايناقوۆقا مالىمدەدى.

ۆەدومستۆونىڭ مالىمەتىنشە، التى قازاقستاندىق قازىرگى ۋاقىتتا جاقىندارىمەن بايلانىسقا شىقپاي جاتىر. ولاردىڭ بارلىعى ءبىر پاتەردە تۇرعان.

"ىزدەستىرۋ جۇمىستارى جۇرگىزىلىپ جاتىر. كايردەگى قازاقستان ەلشىلىگى مىسىردىڭ سىرتقى ىستەر مينيسترلىگىنەن ىزدەستىرۋ جۇمىستارىنا كومەك كورسەتۋلەرىن سۇراپ، نوتا جولدادى. ءبىزدىڭ ديپلوماتتار جوعالىپ كەتكەن قازاقستاندىقتاردىڭ جاقىندارىمەن جانە تۋىستارىمەن تىعىز بايلانىستا"، - دەپ حابارلادى ءانۋار جايناقوۆ.

وسىعان دەيىن ايبول يسابەك ەسىمدى قولدانۋشى Facebook جەلىسىندەگى پاراقشاسىندا جوعالىپ كەتكەن قازاقستاندىقتاردىڭ ەكەۋىنىڭ ەسىمىن اتاعان بولاتىن. ولار - قانات بەرىك جانە ەلامان جازىلحان. ونىڭ ايتۋىنشا، ەكەۋىنىڭ ءبىرى ونىڭ اعاسى ەكەن. ولار مىسىرعا 11 شىلدەدە ۇشىپ كەتتى. 

"مىسىرعا كەلىسىمەن ق ر ەلشىلىگىندە تىركەۋگە تۇردى. 20 شىلدەدە مۇلدە بايلانىسقا شىقپادى. مىسىرداعى قازاقستان كونسۋلى ەرشات قازاقستاندىقتاردىڭ قاي جاقتا ەكەنىن بىلمەيدى. بارلىعىڭىزدان ىزدەستىرۋ جۇمىستارىنا كومەكتەسۋلەرىڭىزدى سۇرايمىز!" - دەپ جازدى ايبول يسابەك ەسىمدى قولدانۋشى Facebook جەلىسىندەگى پاراقشاسىندا.