الماتىلىق سۋرەتشى ازامات انۋاربەك الاش كوسەمى ءاليحان بوكەيحاننىڭ پورترەتىن شەگەمەن سالىپ شىقتى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

«ون ويلانىپ، ءجۇز تولعانىپ، العاشقى ماحابباتىمداي ايالاپ، تۇڭعىشىمداي تولعانىپ، دارەتسىز قول تيگىزبەي ماپەلەپ، قازاقتىڭ ماقتانىشى، الاش وردا كوسەمى - ءاليحان بوكەيحان ۇلى بابامنىڭ، پۋانتاليزم تەحنيكاسىمەن سالىنعان پورترەتىن سالىپ شىقتىم. جالاڭ اعاشقا تەمىر شەگەمەن. نە سەبەپتى تەمىر شەگەمەن سالىنعانىن ءيسى قازاق جۇرەگىمەن سەزىنىپ، تۇيسىگىمەن ۇعىنۋى قاجەت. قالعانىنا وكپەم جوق. الاش وردا مەملەكەتىنىڭ 100 جىلدىق مەرەيتويىنا ارنالاتىن كورمەنىڭ العاشقى قارلىعاشى»، - دەدى سۋرەتشى ءوزىنىڭ فەيسبۋكتەگى پاراقشاسىندا.

ايتا كەتۋ كەرەك، بۇعان دەيىن ازامات بەلگىلى بوكسەر گەنناديي گولوۆكيننىڭ سۋرەتىن سالىپ شىققان بولاتىن.

«تەمىر گەنانىڭ» اۆتورى الاش زيالىلارىنىڭ سۋرەتىن سالۋدى بۇرىننان جوسپارلاپ جۇرگەنىن ايتتى. «گولوۆكيندى شەگەمەن سالۋىم ۇلت كوسەمدەرىن سالۋ الدىنداعى وزىمە ءوزىم جاساعان ەمتيحان بولدى. ابدەن كوزىم جەتتى شەگەمەن سۋرەت سالا الاتىنىما. الاش كوسەمدەرىنىڭ سۋرەتىن سالۋ بۇرىننان ويىمدا بار بولاتىن. سۋرەتىمدى استاناعا اكەلدىم. ءقازىر ەل اراسىنان اتىمتاي جومارتتار تابىلىپ، دەمەۋ كورسەتەمىز دەپ جاتىر»، - دەدى ازامات.

ونىڭ ايتۋىنشا، تەمىر پورترەتتى سالۋعا 1500-1700 شەگە كەتكەن. اۆتور جۇمىستى 4-5 كۇندە اياقتاعان.

«ترافارەت كۇيىندە سۋرەتشى دوسىم دۋلات ءالي كومەكتەستى. قازبەك دوسىم شەگە قاعۋعا قول ۇشىن بەردى. شەگەنى ۇرعىلاۋدان ساۋساقتارىم ەشتەڭە سەزبەي قالدى. ونداي جۇمىستى جاساۋعا ۇلكەن ءتوزىم كەرەك»، - دەدى ول.

اۆتور بولاشاقتا دەمەۋشىلەر تابىلىپ جاتسا، الاش ورداسىنىڭ قۇرىلعانىنا 100 جىل تولۋىنا وراي الاش ۇكىمەتى كوسەمدەرى بەينەلەنگەن 25-30 سۋرەت سالىپ، بۇكىل قازاقستاندى كورمەمەن ارالاپ شىقسام دەگەن ويىن جەتكىزدى. ونىڭ ايتۋىنشا، ساپار استانادان باستالىپ، سەمەيدە اياقتالماق.