26-30 شىلدە ارالىعىندا استانادا جامبىل وبلىسىنىڭ كۇندەرى وتەدى.  «ۇلى جىبەك جولى. كونە تارازدان اسقاق استاناعا تارتۋ» كەرۋەنى ەكى اي جول ءجۇرىپ 26 شىلدەدە استاناعا كەلەدى. جامبىل وبلىسىنىڭ 12،9 مىڭ توننا ءونىمى جارمەڭكەگە قويىلاتىن بولدى. وندا اۋىل شارۋاشىلىعى تاۋارلارى نارىق باعاسىنان 10-20% تومەن باعامەن ساتىلادى. جامبىل وبلىسىنىڭ استاناداعى كۇندەرىن مادەني شارالار قورىتىندىلايدى دەپ حابارلايدى Qamshy.kz اقپارات اگەنتتىگى. 

«ەكسپو-2017» حالىقارالىق كورمەسى اياسىندا وتەتىن شارا جايلى ءوڭىر باسشىلارى ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسيا بارىسىندا ايتتى. باسپا ءسوز كونفەرەنسياعا جامبىل وبلىسى اكىمىنىڭ ورىنباسارى ەرقانات مانجۋنوۆ، اۋىل شارۋاشىلىعى باسقارماسىنىڭ باسشىسى نۇرجان نۇجىگىتوۆ جانە مادەنيەت، ارحيۆتەر جانە قۇجاتتاما باسقارماسىنىڭ باسشىسى دۇيسەنالي بىقىبايەۆ قاتىستى.

-20 مامىر كۇنى «ۇلى جىبەك جولى. كونە تارازدان اسقاق استاناعا تارتۋ» كەرۋەنى ۇزاق جولعا شىقتى. كەرۋەن «ۇلى جىبەك جولى» بويىنداعى ساۋدا، مادەنيەت، وركەنيەتتىڭ رۋحاني ورتالىعى بولعان ەجەلگى تارازدىڭ تاريحىمەن تانىستىرۋ ماقساتىندا «ەكسپو-2017» كورمەسىنە كەلەدى.  كەرۋەندى قارسى الۋ شارالارى 26 شىلدە «حانشاتىر» ويىن-ساۋىق ورتالىعىنىڭ «عاشىقتار ساياباعىندا» وتەدى، - دەدى جامبىل وبلىسى اكىمىنىڭ ورىنباسارى ەرقانات مانجۋوۆ

جامبىل وبلىسى العاش رەت كوماندالىق الاڭداعى توعىزقۇمالاق ويىنىنىڭ تۇساۋكەسەر ءراسىمىن وتكىزەدى. وبلىستىڭ استاناداعى كۇندەرى اياسىندا «ەتنواۋىل» قالاشىعى ماڭىندا قازاق كۇرەسى، اسىق اتۋ، بەس تاس، توعىزقۇمالاق، الاڭداعى توعىزقۇمالاق ويىندارىنىڭ كورسەتىلىمىمەن قاتار قۇسبەگىلىك جانە تازى، توبەت يتتەر كورمەسى ۇيىمداستىرىلادى. ۇلتتىق ات سپورت تۇرلەرى كوكپار، اۋدارىسپاق، تەڭگە ءىلۋ، جامبى اتۋ ويناتىلادى. اتالعان شارالار 29-30 شىلدە كۇندەرى باس قالاداعى «قازانات» يپپودرومىندا وتەدى. سونىمەن قاتار، بيىلدىڭ وزىندە استاناعا التىنشى مارتە كەلگەن جارمەڭكە كەڭ اۋقىمدا وتەدى. ءوڭىردىڭ تاۋارلارىن «قازاقستان» سپورت كەشەنىنەن ساتىپ الۋعا بولادى.  

مادەنيەت، ارحيۆتەر جانە قۇجاتتاما باسقارماسىنىڭ باسشىسى د. بىقىبايەۆ مادەني شارالاردىڭ كەستەسىمەن تانىستىرا كەلە، ەكسپو اۋماعىنداعى «امفيتەاتردا» وبلىستىق فيلارمونيانىڭ «اۋەنى اسەم اۋليە اتا!» اتتى 500 ونەرپازدىڭ قاتىسۋىمەن وتەتىن مەرەكەلىك كونسەرت بولاتىنىن اتاپ ءوتتى. 30 شىلدەدە «حان شاتىر» ويىن-ساۋىق ورتالىعى جانىنداعى الاڭدا «جامبىلىم قانداي تاماشا!» اتتى شىعارماشىلىق كونسەرت جانە ەسترادا جۇلدىزدارىنىڭ قاتىسۋىمەن وتەتىن گالا-كونسەرتپەن جامبىل وبلىسى كۇندەرىنىڭ جابىلۋى وتەدى.