قوستانايداعى زاتوبولسك اۋىلىندا قىزدى ەكى رەت قاعىپ كەتكەن "گازەل" جۇرگىزۋشىسى سول كەزدە ماس كۇيدە بولعان. سونداي-اق، ونىڭ بۇل ارەكەتى ادام ولتىرۋگە وقتالۋ دەرەگى رەتىندە تەرگەلىپ جاتىر، - دەپ حابارلايدى Qamshy.kz اقپارات اگەنتتىگى قوستاناي وبلىستىق پروكۋراتۋراسىنىڭ باسپا ءسوز قىزمەتىنە سىلتەمە جاساپ.
پروكۋراتۋرا وكىلدەرى وقيعانىڭ ءمان-جايىن ايتىپ بەردى. جول-كولىك وقيعاسى بولماستان بۇرىن "گازەل" جۇرگىزۋشىسى مەن قىزدىڭ اراسىندا جانجال بولعان. "16 شىلدەدە زاتوبولسك اۋىلىندا ماس ەر ادام "قىزىلداش" كافەسىندە بۇزاقىلىق جاساپ، ەكى قىزدى ۇرىپ جىبەرگەن. 15 مينۋتتان سوڭ كۇدىكتى كافە ماڭىندا ورنالاسقان اۆتوتۇراققا بارىپ، قىزداردى كۇتىپ وتىرعان. سودان قىزداردىڭ ءبىرى شىققاندا ول ونى قاساقانا قاعىپ كەتكەن. ناتيجەسىندە زارداپ شەككەن قىز دەنە جاراقاتىن الىپ قالدى"، - دەدى پروكۋراتۋرا وكىلدەرى.
سونداي-اق، ۆەدومستۆو وكىلدەرى بۇل دەرەكتىڭ ادام ولتىرۋگە وقتالۋ دەرەگى رەتىندە تەرگەلىپ جاتقانىن ايتىپ ءوتتى. قوستاناي وبلىسىنىڭ پروكۋراتۋراسى وسى قىلمىستىق ءىس بويىنشا سوتقا دەيىنگى تەرگەۋدى باستادى.
