تارازدا التى كەلى تارتاتىن الىپ ءسابي تۋىلدى. قالالىق پەريناتالدىق ورتالىقتا دۇنيەگە كەلگەن نارەستەنىڭ سالماعى 6 كەلى 300 گرامم، ال، بويى 67 سانتيمەتر. سيپاتتاپ ايتساق، ول قالىپتى  بالادان ەكى ەسە ۇلكەن. وعان وتباسى ولگا دەپ ات قويدى. اناسى الەنا پرەمۋشكو جاڭا بوسانعان قىزىن وتباسىنداعى ءۇشىنشى پەرزەنت ەكەنىن ايتادى. ەكىنشى بالاسىمەن اراسىنداعى ءۇزىلىس 9 جىل بولعانىنا قاراماستان، 29 جاستاعى جاس انا ەش قيىندىقسىز ءارى وتاسىز بوسانعان. «ءالديىمىزدىڭ سالماعىن ەستىگەندە تەگىس قۋاندىق»، - دەيدى. ءقازىر كەلىنشەكتىڭ كۇيەۋى ءىس ساپارمەن قىرعىزستاندا جۇرگەندىكتەن، قىزىن ءالى كورمەگەن ەكەن، دەپ حابارلايدى Qamshy.kz اقپارات اگەنتتىگى استانا ارناسىنا سىلتەمە جاساپ.

الەنا پرەمۋشكو، اناسى:

"وتە قاتتى تولقىپ تۇرمىن. شاتتىعىمىزدا شەك جوق. قىزىمنىڭ سالماعى 6 كەلى 300 گراممعا جۋىق دەگەندە، تالىپ تۇسە جازدادىم. الدىڭعى بالالارىم 3 كەلىدەن اسا تۋىلعان. بۇل قىزىمنىڭ سالماعى ءبىز ءۇشىن رەكورد ەندى. بالاپانىمدى بوسانار الدىندا ۋدز اپپاراتىنا تەكسەرىلدىك. سول كەزدە ءسابيىمنىڭ سالماعى 4 كەلى 200 گرامدى كورسەتتى.  وعان بىرەسە تاڭىرقاپ، بىرەسە قينالىپ قالام با دەپ قورقاقتاعانىم راس. الايدا، دارىگەرلەردىڭ ارقاسىندا ءبارى جاقسى ءوتتى". 

6 كەلى نارەستەنىڭ تۋعانىن  قالا حالقى لەزدە ەستىپ قويعان. كۇتپەگەن جاڭالىققا كۇللى تاراز  قۋانىپ  قانا قويماي، بالانىڭ ءتۇرىن كورگىسى كەلىپ پەرزەنتحاناعا اعىلعان. شاھار حالقىن شاتتىققا بولەگەن شاقالاق ءقازىر اناسىمەن بىرگە قالپىنا كەلتىرۋ، وڭالتۋ پالاتاسىندا. ءقازىر انالار ءۇيى الدىندا الىپ ءسابيدىڭ اناسىن قۇتتىقتاۋعا اسىققان ادامداردىڭ قاراسى قالىڭ. ءتىپتى، كەلىنشەكتى بوساندىرعان اق حالاتتىلاردىڭ ءوزى «6 كەلى الپامىس تۋىلدى» دەپ جۇرتتان ءسۇيىنشى سۇراعان. دارىگەرلەر بالانىڭ دەنساۋلىعى جاقسى ءارى ەش اقاۋسىز دۇنيەگە كەلدى دەيدى. 

ەلۆيرا اتابايەۆا، تاراز قالالىق پەرەناتالدىق ورتالىعىنىڭ اكۋشەر-گينەكولوگى:

"بوساندىرۋعا بار-جوعى جارتى ساعات ۋاقىت جۇمسادىق. بۇل بىزدەگى ءبىرىنشى جاعداي ەمەس. وسى ورتالىقتا وسىدان 7 جىل بۇرىن سالماعى 6 كەلى 500 گرام بولاتىن ءسابي تۋىلعان.  ول كوپ بوسانۋشى ايەل بولعان سوڭ، كەسىر تىلىگىمەن بوساندىرعان ەدىك.  ال، الەنا ءوز كۇشىمەن تابيعي جولمەن دۇنيەگە اكەلدى".