ىشكى ىستەر ءمينيسترى قالمۇحانبەت قاسىموۆ ۇكىمەت وتىرىسىندا «ەسىرتكى قۇرالدارى، پسيحوتروپتىق زاتتار، سول تەكتەستەر جانە پرەكۋرسورلار اينالىمىن باقىلاۋ ماسەلەلەرى بويىنشا قر-نىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىردى دەپ حابارلايدى Qamshy.kz اقپارات اگەنتتىگى قازاقستان رەسپۋبليكاسى ىشكى ىستەر مينيسترلىگى باسپا ءسوز قىزمەتىنە سىلتەمە جاساي وتىرىپ.

ق.قاسىموۆ ءوز سوزىندە قازاقستان دا وزگە ەلدەر سياقتى سينتەتيكادان جاسالعان جاڭا پسيحوبەلسەندى زاتتاردىڭ تارالۋ قاۋپىمەن بەتپە-بەت كەلىپ وتىرعانىن اتاپ ءوتتى. بۇل زاتتاردىڭ نارىعى ولاردىڭ جاڭا تۇرلەرىمەن تەز تولىعۋدا. سوندىقتان وعان ۋاقىتىلى شارا قولدانۋ، سونىڭ ىشىندە ەلدە ونىڭ بارلىق تۇرىنە تىيىم سالۋ، زاڭسىز اينالىمنان الىنعان «قىلمىستىق سالماقتىڭ» مولشەرىن بەكىتۋ قاجەتتىگى تۋىندايدى.
–الايدا، مۇنداي تىيىم سالۋ مەحانيزمىن ەنگىزۋ – ايتارلىقتاي ۇزاق پروسەسس. تىيىم سالىنعان ەسىرتكى قۇرالدارى مەن پسيحوتروپتىق زاتتاردىڭ ۇلتتىق ءتىزىمى زاڭمەن بەكىتىلەدى، وعان تۇزەتۋلەر ەنگىزۋ ءبىراز ۋاقىتتى قاجەت ەتەدى. بۇل جاڭا پسيحوبەلسەندى زاتتاردىڭ تارالۋ ءقاۋپىن كۇشەيتەدى، – دەدى مينيستر.
حالىقارالىق تاجىريبەنى زەرتتەپ، ەلىمىزدىڭ كونستيتۋسيالىق كەڭەس قورىتىندىسىن العاننان كەيىن، ۇكىمەتتىڭ قاۋلىسىمەن تىيىم سالىنعان ەسىرتكى قۇرالدارىنىڭ ۇلتتىق ءتىزىمىن بەكىتۋ قاجەتتىگى تۋرالى شەشىمگە كەلدى، بۇل ءوز كەزەگىندە نارىقتا پايدا بولعان پسيحوبەلسەندى زاتتاردىڭ جاڭا تۇرلەرىمەن جەدەل كۇرەس جۇرگىزۋگە مۇمكىندىك بەرەدى. 
ىشكى ىستەر ءمينيسترى قىلمىستىق كودەكس پەن «ەسىرتكى قۇرالدارى تۋرالى» زاڭ جوبالارىنا ەنگىزىلەتىن كەلەسىدەي تۇزەتۋلەردى اتاپ ءوتتى:
• ۇلتتىق ءتىزىمدى بەكىتۋ بويىنشا ۇكىمەتتىڭ تىكەلەي قۇزىرەتىن ايقىنداۋ. ەسىرتكى قۇرالدارى ءتىزىمى مەن ولاردى شاعىن، ءىرى جانە اسا ءىرى مولشەرلەرگە جاتقىزۋ جونىندەگى قۇراما كەستەنى ۇكىمەت بەكىتەدى.
• ەسىرتكىنىڭ ۇلتتىق ءتىزىمى مەن قۇراما كەستەسى ايتارلىقتاي ءقاۋىپتى 88 پسيحوبەلسەندى زاتتارمەن تولىقتىرىلادى. بۇل ەۋرازيالىق ەكونوميكالىق وداعى ەلدەرى جانە بۇۇ ەسىرتكىنى قاداعالاۋ جونىندەگى حالىقارالىق كوميتەتىنىڭ باقىلاۋىنداعى بارلىق سينتەتيكالىق ەسىرتكىلەر ءتىزىمىن قامتۋعا مۇمكىندىك بەرەدى.
• ەسىرتكىنىڭ بالاماسى جانە سۋتەك اتومدارىن الماستىرۋشى سياقتى جاڭا تۇسىنىكتەر دە تىزىمگە كىرگىزىلەدى. بۇل پسيحوبەلسەندى زاتتاردى ەسىرتكىنىڭ بالاماسىنا ەنگىزۋدىڭ ناقتى مەحانيزمىن بەكىتىپ، بالامالارعا كلينيكالىق زەرتتەۋلەر جۇرگىزۋ قاجەتتىگىن جويادى.
• «ەسىرتكى قۇرالدارى تۋرالى…» زاڭ ەسىرتكىنىڭ، سونىڭ ىشىندە ونىڭ جاڭا تۇرلەرىن باقىلاۋعا قويۋدىڭ نەگىزى مەن ءتارتىبىن ايقىندايتىن ناقتى نورمالارمەن تولىقتىرىلادى.
• اكىمشىلىك نەمەسە قىلمىستىق جاۋاپكەرشىلىككە تارتۋ ءۇشىن تىيىم سالىنعان زاتتان «كريمينالدىق سالماق» نەمەسە «باعالاۋ مولشەرىن» بەكىتۋ قاجەت. قولدانىستاعى قۇراما كەستەدە ەسىرتكىنىڭ 275 ءتۇرى بار، سونىڭ 86-سى باعالاۋ مولشەرىمەن شەكتەلگەن. زاڭ جوباسى اتالعان 275 ءتۇرى مەن ەنگىزىلەتىن جاڭا 88 پسيحوبەلسەندى زاتتاردىڭ نەگىزگى ءتۇرى كورسەتكىشتەرىن بەكىتۋدى قاراستىرادى.