ەل بىرىنشىلىگىندە ونەر كورسەتەتىن الماتالىق "قايراتتىڭ" جاڭا باس باپكەرى بولىپ يسپانيالىق مامان كارلوس الوس فەررەر تاعايىندالدى، دەپ حابارلايدى  Qamshy.kz اقپارات اگەنتتىگى Vesti.kz مالىمەتىنە سۇيەنىپ.

فەررەردىڭ تاعايىندالعانى تۋرالى كلۋب باسشىسى قايرات بورانبايەۆ ءوزىنىڭ Instagram جەلىسىندەگى پاراقشاسىندا حابارلادى. يسپانيالىق مامان "قايراتتىڭ" تىزگىنىن ماۋسىمنىڭ سوڭىنا دەيىن ۇستايتىن بولادى.

"ءبىزدىڭ كلۋب كارلوسپەن بىرنەشە ۋاقىت بويى جاقسى قارىم-قاتىناستا بولىپ كەلدى. نەگىزى ءبىز ونى جىلدىڭ سوڭىندا كوماندامىزعا شاقىرعىمىز كەلگەن. ءبىراق كلۋبتا بولعان سوڭعى جاعدايلارعا بايلانىستى ءبىز بۇل ماماندى ءقازىر شاقىرتۋعا ءماجبۇر بولدىق. كەلىسىمشارت جىل سوڭىنا دەيىن جاسالدى. ءبىزدىڭ جاعدايىمىزدى ءتۇسىنىپ، فەررەردى قازاقستان جاستار قۇراماسىندا قىزمەتىنەن بوساتىپ، بىزگە كومەكتەسكەنى ءۇشىن قازاقستان فۋتبول فەدەراسياسىنا العىس بىلەدىرەمىز. بارلىعىمىزعا ساتتىلىك تىلەيمىن!"، - دەدى بورانبايەۆ.

42 جاستاعى فەررەر قازاقستاندا 2015 جىلدان بەرى قىزمەت ەتىپ كەلەدى. ول شىمكەنتتەگى "وڭتۇستىك" اكادەمياسىندا ەكى جىل جۇمىس ىستەپ، قازاقستان جاسوسپىرىمدەر قۇراماسىن باپتاپ كەلگەن ەدى. قازاقستانعا دەيىن ول يسپانيا، گونكونگ جانە پولشادا جاستار مەن جاسوسپىرىمدەر اكادەميالارىندا جۇمىس ىستەگەن.

يسپانيالىق مامان كارەراسىندا تەك ءبىر رەت قانا كاسىپقوي فۋتبول كلۋبىنىڭ باپكەرى بولعان. 2015 جىلدىڭ قاڭتارى مەن مامىرى ارالىعىندا "پوگون سەدلسە" تىزگىنىن ۇستاپ، بار بولعانى ون كەزدەسۋ وتكىزگەن.

ەسكە سالايىق، 21 شىلدەدە گرۋزين مامان كاحابەر سحادادزە قىزمەتىنەن كەتكەننەن كەيىن "قايرات" كلۋبى باس باپكەرسىز قالعان ەدى.