2017 جىلدىڭ 21 شىلدەسى كۇنى ءوتىپ بارا جاتىپ، ادامداردى قۇدىقتان قۇتقارىپ الۋعا تالپىنىپ قازا تاپقاندار شقو سوتىنىڭ قىزمەتكەرلەرى بولىپ شىقتى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

بۇل جايىندا شىعىس قازاقستان وبلىسى سوتىنىڭ باسپا ءسوز قىزمەتى ءمالىم ەتتى.

باقىتجان قاينازاروۆ پەن بەكزات قۇرىمبايەۆ ءۇرجار اۋداندىق سوتىندا جۇرگىزۋشى جانە جۇمىسشى بولىپ ىستەگەن.

«رەسپۋبليكانىڭ سوت قوعامداستىعى قايعىلى جاعدايدا قازا تاپقان ءۇرجار اۋداندىق سوتى جۇمىسشىلارىنىڭ ەرلىگىنە باس يە وتىرىپ، ونىڭ تۋىستارى مەن جاقىندارىنىڭ قايعىسىنا ورتاقتاسىپ، كوڭىل ايتادى»، - دەلىنگەن حابارلاما ماتىنىندە.

ايتا كەتەيىك، 2017 جىلدىڭ 21 شىلدەسى كۇنى شىعىس قازاقستان وبلىسى ءۇرجار اۋدانىندا «كازسەلبۋرۆودستروي» ءجشس-ىنىڭ ءۇش جۇمىسشىسى سۋ قۇبىرلارى تراسساسىنا قىزمەت كورسەتۋ بويىنشا جۇمىستار جۇرگىزىپ جاتقان. ولاردىڭ قۇدىققا تۇسكەن ەكەۋى قۇبىر تۇبىندەگى بەلگىسىز گاز ءيىسىنىڭ ءتيۋى سالدارىنان ەس-تۇسىنەن ايىرىلىپ قالعان. كومەك كورسەتۋ ءۇشىن قۇدىققا تۇسۋگە ۇمتىلعان ءۇشىنشىسى دە السىزدەنىپ بارا جاتقاندىعىن سەزىنىپ، اينالاسىنان كومەك سۇراپ ايقايلاعان.

«ءدال وسى ۋاقىتتا سول ماڭنان ءوتىپ بارا جاتقان ءۇرجار اۋداندىق سوتىنىڭ جۇمىسشىسى ب.قۇرىمبايەۆ كومەك سۇراعان داۋىستى ەستىگەن بويدا داۋىس شىققان جاققا جۇگىرە جونەلدى. دەرەۋ السىرەگەن جىگىتتى شىعارىپ الىپ، قالعان ەكەۋىن قۇتقارماق بولىپ قۇدىق تۇبىنە تۇسەدى. الايدا، گاز اسەرىنەن ول دا ەس-تۇسىنەن ايرىلعان. ارتىنشا قۇدىققا تۇسكەن ب.قاينازاروۆ تا گاز يىسىنە ۋلانىپ قالعان. جەدەل مەديسينالىق كومەك كەلىپ جەتكەنشە، قۇدىققا تۇسكەن ءتورت ازامات تا ەستەرىن جيماستان كوز جۇمدى. ولاردىڭ قاتارىندا 1989 جىلعى باقىتجان قاينازاروۆ، 1983 جىلعى قۇرىمبايەۆ بەكزات حاميت ۇلى بار»، - دەلىنگەن حابارلامادا.