ق ر ءسىم باسپا ءسوز قىزمەتىنىڭ باسشىسى ءانۋار جايناقوۆ تۇركياداعى قازاقستاندىق تۋريستەردىڭ قازىرگى جاعدايىنا قاتىستى تۇسىنىك بەردى. باسپا ءسوز قىزمەتىنىڭ باسشىسى بۇل جايىندا ءوزىنىڭ Facebook جەلىسىندەگى پاراقشاسىندا جازدى، دەپ حابارلايدى Qamshy.kz اقپارات اگەنتتىگى.

«بۇگىن تۇندە تۇركيانىڭ انتاليا قالاسىندا قازاقستاندىق تۋريستەرمەن وقىس وقيعا ورىن الدى. اتالمىش ماسەلەگە قازاقستاننىڭ جەرگىلىكتى ەلشىسى ارالاسىپ، ولارعا كومەك كورسەتتى.

ءبىزدىڭ وتانداستار تۇركيانىڭ كەزەكتى اۋە كومپانيالارىنىڭ تاراپىنان ادىلەتسىزدىككە دۋشار بولدى.

26 شىلدە كۇنى شامامەن 12 ساعات بۇرىن ءار ەلدەن كەلگەن 100 جولاۋشى، ونىڭ ىشىندە 30-ى قازاقستاندىقتار انتاليادان ىستامبۇل قالاسىنا ۇشۋ كەرەك بولاتىن. ودان ءارى قاراي ءبىزدىڭ وتانداستار الماتى قالاسىنا بەت العان ەدى.

الايدا، بەلگىسىز سەبەپتەرگە بايلانىستى Onur Air اۋە كومپانياسى رەيستى قايتا-قايتا 2 ساعاتقا شەگەرىپ، كەيىننەن ءتۇن اۋا مۇلدەم ۇشپايتىندىعىن ايتقان. بارلىق جولاۋشىلارعا سەبەبىن تۇسىندىرمەستەن دوربالارىن قايتارىپ بەرىپ، ۇشاقتىڭ ىستامبۇلعا ۇشپايتىنىن جەتكىزگەن.

ناتيجەسىندە، تۇركيا اۋە كومپانيالارىنان ناقتى جاۋاپ الا الماعاندىقتان 20 قازاقستاندىق تۋريستەر ءوز بەتىنشە ىستامبۇل قالاسىنا قاراي ۇشىپ كەتكەن، ال قۇرامىندا كىشكەنتاي بالالارى بار 10 تۋريست وزدەرىنىڭ قاراجاتتارى جەتپەگەندىكتەن انتاليا قالاسىنداعى قازاقستان ەلشىلىگىنە بارىپ كومەك سۇراۋعا ءماجبۇر بولدى.

ءتۇن ورتاسىندا قازاقستاندىق ديپلومات ءبىزدىڭ قانداستارىمىزبەن كەزدەسىپ، تۇركيانىڭ تۋريستىك كومپانيالارىنىڭ بىرىمەن كەلىسىمگە كەلىپ، ولاردى دەرەۋ قوناق ۇيگە جاتقىزعان.

اتالمىش اۋە كومپانياسىنىڭ باسشىلىعىنان بولعان جايتقا قاتىستى تۇسىنىكتەمە بەرۋدى تالاپ ەتكەنمەن، ەش ناتيجە بولمادى. اۋە كومپانياسىنىڭ وكىلدەرى دە بۇل ىسكە قاتىستى وزدەرىن كىنالى سەزىنىپ، قانداي دا ءبىر تۇسىنىك بەرۋگە اسىعار ەمەس.

قازىرگى ۋاقىتتا قازاقستان ەلشىسى تۇركياداعى قازاقستاندىق تۋريستەردى ەلگە قايتارۋ قامىن قاراستىرۋدا. ەلشىنىڭ ايتۋىنشا، ولاردىڭ كوپشىلىگى ەلگە ورالا سالىسىمەن تۇركيانىڭ اۋە كومپانياسىنا قارسى سوتقا ارىزدانباق ەكەن»، - دەپ جازادى ءانۋار جايناقوۆ.

ەستەرىڭىزگە سالا كەتسەك، تۇركياداعى جەر سىلكىنىسىنىڭ سالدارىنان سول ەلگە دەمالۋعا بارعان وتانداستارىمىز ەلگە قايتا الماي، بيلىكتەن كومەك سۇراعان بولاتىن.