استانادا ءوتىپ جاتقان EXPO كورمەسى جوعارى دەڭگەيدە ۇيىمداستىرىلعان. بۇل – گەرمانيانىڭ كورمە يندۋسترياسى قاۋىمداستىعىنىڭ باسشىسى پەتەر نيەۆەننىڭ پىكىرى. ساراپشى ەلورداعا جاساعان جۇمىس ساپارىنان كەيىن كورمەگە وسىنداي باعا بەردى، دەپ حابارلايدى Qamshy.kz اقپارات اگەنتتىگى حابار انارناسىنا سىلتەمە جاساي وتىرىپ.

ول وسىمەن 25 جىل قاتارىنان الەمدەگى ەڭ ءىرى كورمە كەشەندەرىن ارالاپ كورگەن. تاجىريبەلى مامان قازاقستانداعى EXPO ءساتتى ءوتىپ جاتقاندىعىن تىلگە تيەك ەتتى. ايتا كەتەيىك، گەرمانياداعى بارلىق كورمە ۇيىمداستىرۋشىلارىن بىرىكتىرىپ وتىرعان قاۋىمداستىقتىڭ ءجۇزجىلدىق تاريحى بار. ول حالىقارالىق تاجىريبەلەردى جيناقتاپ، رەيتينگ جاساۋمەن اينالىسادى.

«ءبىزدىڭ ساراپشىلار بۇعان دەيىن دە كوپتەگەن ەحرو كورمەسىندە بولعان. سوندىقتان ءبىزدىڭ سالىستىرۋعا تاجىريبەمىز جەتكىلىكتى. مەن الدىمەن قابىلداپ جاتقان ەلدىڭ ۇلتتىق پاۆيلونىنا ءمان بەرەمىن. شىندىقتى مويىنداۋ كەرەك، قازاقستاننىڭ پاۆيلونى تاڭعالارلىقتاي. شار تارىزدەس عيمارات ەحرو-2017 كورمەسىنىڭ بويتۇمارىنا اينالدى، ءارى استانانىڭ كورىكتى نىساندارىنىڭ ءبىرى بولىپ قالا بەرمەك. بۇل – ايماقتاعى ەڭ اۋقىمدى كورمەلەردىڭ ءبىرى. ونىڭ قورىتىندىسىن شىعارۋ ءالى ەرتەرەك. ءبىراق قازاقستان بۇل مۇمكىندىكتى ءساتتى پايدالانا ءبىلدى»،- دەيدى گەرمانيانىڭ كورمە يندۋسترياسى قاۋىمداستىعىنىڭ باسقارۋشى ديرەكتورى پەتەر نيەۆەن.