بۇگىن الماتى قالاسىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى جانىنداعى الەمدىك ەكونوميكا جانە ساياسات ينستيتۋتىنىڭ (اەسي) ۇيىمداستىرۋىمەن «2017 ج. مامىردا وتكەن «بەلدەۋ مەن جول» فورۋمىنىڭ قورىتىندىسى اياسىندا ورتالىق ازيا ەلدەرى مەن جۇڭگو اراسىنداعى ءوزارا ىقپالداستىقتىڭ بولاشاعى» تاقىرىبى بويىنشا دوڭگەلەك ۇستەل ءوتتى، دەپ حابارلايدى Qamshy.kz اقپارات اگەنتتىگى الەمدىك ەكونوميكا جانە ساياسات ينستيتۋتىنىڭ باسپا ءسوز قىزمەتىنە سىلتەمە جاساپ.

دوڭگەلەك ۇستەل جۇمىسىنا قىرعىزستان، وزبەكستان مەن تاجىكستاننىڭ ساراپشىلارى، اەسي اناليتيكتەرى، سونىمەن قاتار، قازاقستاننىڭ الدىڭعى قاتارلى ماماندارى قاتىستى. ولاردىڭ قاتارىندا: قىرعىز رەسپۋبليكاسى ستراتەگيالىق زەرتتەۋلەر ۇلتتىق ينستيتۋتىنىڭ ديرەكتورى (ق ر سزۇي) ازامات ديكامبايەۆ، تاجىكستان رەسپۋبليكاسىنىڭ پرەزيدەنتى جانىنداعى ستراتەگيالىق زەرتتەۋلەر ورتالىعىنىڭ (سزو) اناليز جانە بولجاۋ باسقارماسىنىڭ باسشىسى ابدۋللو حاكيم، ق ر پرەزيدەنتى جانىنداعى قسزي باس عىلىمي قىزمەتكەرى كونستانتين سىروەجكين، «ChinaCenter» قازاقستان-قىتاي سەرىكتەستىگى حالىقارالىق ورتالىعىنىڭ باس ديرەكتورى ءادىل كاۋكەنوۆ، قوعامدىق ماسەلەلەر ءاناليزى ورتالىعىنىڭ ديرەكتورى مەرۋەرت ماحمۋتوۆا، «ەكسپەرت-كازاحستان» ىسكەرلىك جۋرنالىنىڭ باس رەداكتورى سەرگەي دومنين، الەكساندر كنيازيەۆ، باحتيەر ەرگاشيەۆ (وزبەكستان رەسپۋبليكاسى) جانە ت.ب. تاۋەلسىز ساراپشىلار بار.

اەسي ديرەكتورى ەرجان سالتىبايەۆتىڭ سوزىنشە، بۇگىنگى تاڭدا «بەلدەۋ مەن جول» قىتايلىق باستامانىڭ دامۋى اياسىندا قىتاي-ورتالىق ازيا فورماتىنداعى بايلانىستار كەڭەيتىلۋدە: «ورتالىق ازيا ايماعىنىڭ بارلىق ەلدەرى شىعىستاعى كورشىمەن تىعىس قارىم-قاتىناستا. ايماقتاعى ەلدەر الدىندا ولاردىڭ ەكونوميكالىق جانە كولىك-ينفراقۇرىلىمدىق دامۋىن ارتتىراتىن جاڭا مۇمكىندىكتەر پايدا بولۋدا».

- سونىمەن قاتار، ورتالىق ازيادا اتالمىش باستاما اياسىندا جاڭا گەوەكونوميكالىق جاعدايدىڭ قۇرىلۋى مۇمكىن بولاتىن قاتەرلەرگە باعا بەرۋ جاعىنان ساراپشىلىق ۇعىنۋعا مۇقتاج، - دەدى ە.سالتىبايەۆ.

دوڭگەلەك ۇستەلگە قاتىسۋشىلار ورتاازيالىق ايماقتاعى ءاربىر ەلدىڭ قىتايمەن سەرىكتەستىگى پروسەسىن، ينۆەستيسيالىق سەرىكتەستىكتىڭ قازىرگى احۋالى، ءوڭىر مەملەكەتتەرى مەن قحر اراسىندا ءجيى تۋىندايتىن تۇيتكىلدى ماسەلەلەر، ءوڭىر مەملەكەتتەرى اراسىنداعى سەرىكتەستىكتىڭ جاعدايى، سونىمەن قاتار، قىتايدىڭ «بەلدەۋ مەن جول» باستاماسىنا ارى قاراي قاتىسۋدىڭ بولاشاعى سەكىلدى تاقىرىپتاردى تالقىلادى.