بيىل رەسپۋبليكادا 75 جاڭا مەكتەپ اشىلادى. ەلىمىزدە 369 مىڭ بالا  ءبىلىم وشاقتارىنا 1 سىنىپقا بارادى. ال ۇستازدار سانى 325 مىڭدى قۇراسا، جاڭا وقۋ جىلىندا  10 مىڭ جاس مامان مۇعالىمدەر قاتارىنا قوسىلماق دەپ حابارلايدى Qamshy.kz اقپارات اگەنتتىگى. 

بۇل تۋرالى ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسيادا ق ر ءبىلىم جانە عىلىم مينيسترىلىگى مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى  زەينەپ ماقسۇتوۆا مالىمدەدى.

«مەكتەپكە جول» جالپىرەسپۋبليكالىق اكسياسىنىڭ باستالۋىنا ارنالعان جيىندا بيىلعى اكسيانىڭ  «مەنىڭ تاڭداۋىم - بالالارعا كومەك كورسەتۋ!» ۇرانىمەن وتكىزىلەتىنى ايتىلدى. مۇندا  الەۋمەتتىك از قامتىلعان بالالارعا كومەك كورسەتىلىپ قانا قويماي،  مەكتەپكە بارمايتىن بالالاردى رەيدتىك ءىس-شارالار، پاتەرلەردى ارالاۋ ارقىلى انىقتاۋعا، مەكتەپكە دايىنداۋ بويىنشا الەۋمەتتىك قورعالماعان وتباسىدان شىققان بالالارعا كومەك كورسەتۋگە اسا كوڭىل اۋدارىلادى. ۇيىمداستىرۋشىلار ەلىمىزدىڭ بارلىق ازاماتتارىن، كاسىپكەرلەردى، مەسەناتتاردى اكسياعا قوسىلۋعا جانە قيىن جاعدايعا تاپ بولعان بالالارعا، وتباسىلارعا كومەك كورسەتۋگە شاقىردى.