مىسىردا التى قازاقستاندىق ستۋدەنتتىڭ ۇستالىپ، ولاردىڭ تاعدىرىنا قاتىستى اقپاراتتىڭ بەرىلمەۋىنە بايلانىستى قازاقستان مىسىرعا نارازىلىق نوتاسىن جولدادى، دەپ حابارلايدى Qamshy.kz اقپارات اگەنتتىگى قازاقستان رەسپۋبليكاسى سىرتقى ىستەر مينيسترلىگى باسپا ءسوز قىزمەتى باسشىسى ءانۋار جايناقوۆقا سىلتەمە جاساپ.

«مىسىردا التى قازاقستاندىقتىڭ جوعالىپ كەتكەنىنە ءبىراز ۋاقىت بولدى. ق ر ءسىم مالىمەتىنشە، ولاردى مىسىردىڭ ارنايى قىزمەتكەرلەرى ۇستادى. الايدا مىسىر تاراپىنان ق ر ازاماتتارىنىڭ نە سەبەپتى ۇستالعانىن جانە قازىرگى ۋاقىتتا قايدا ەكەنى جايلى رەسمي اقپارات جوق.  مىسىر ەلىنىڭ  سىرتقى ىستەر مينيسترلىگى بۇعان دەيىن ۇستالعان قازاقستان ازاماتتارىنا قاتىستى جاعدايدى انىقتاۋعا كومەك كورسەتۋ تۋرالى ۋادە بەرگەنىمەن، ازىرگە ول ورىندالمادى. وسىعان بايلانىستى،  مىسىر ەلىنىڭ سىرتقى ىستەر مينيسترلىگىنە رەسمي قارسىلىق نوتاسى جولداندى. مىسىردىڭ  قازاقستانداعى ۋاقىتشا سەنىمدى ۋاكىلىنە دە وسىنداي نوتا تاپسىرىلدى. ءبىز مىسىر  بيلىگىنەن قازاقستان ازاماتتارىنىڭ ۇستالۋ سەبەبىن ءتۇسىندىرۋدى جانە ولارمەن جولىقتىرۋدى تالاپ ەتە بەرەمىز"- دەدى انۋار  جايناقوۆ.

ەسكە سالا كەتەيىك، 24 شىلدەدە  ابىلايحان اتىنداعى ۋنيۆەرسيتەتتىڭ ەكى ستۋدەنتى مىسىر ەلىندە  جوعالىپ كەتكەن ەدى. كەيىن ستۋدەنتتەردى مىسىردىڭ قۇقىق قورعاۋ ورگاندارى ۇستاپ اكەتكەنى بەلگىلى بولدى. ءبىراق نە سەبەپتى ۇستالعاندارى تۋرالى اقپارات جوق.