استانا قالاسىنىڭ جاس اقىندارىنا ءمۇشايرا جاريالاندى دەپ حابارلايدى Qamshy.kz اقپارات اگەنتتىگى. جىر بايقاۋى − قازاقستان رەسپۋبليكاسى مەملەكەتتىك رامىزدەرىنىڭ 25 جىلدىعىنا ارنالادى. «ماڭگىلىك ەل – مۇراتىم!» جانە  «مەملەكەتتىك رامىزدەر ماقتانىشىم!»  تاقىرىپتارىنا جازىلعان شىعارمالار وسى جىلدىڭ 5 تامىزى مەن 5 قىركۇيەك ارالىعىندا قابىلدانادى. ءمۇشايرانىڭ جالپى جۇلدە قورى 1 200 000 تەڭگە كولەمىندە. 

بايقاۋدىڭ ۇيىمداستىرۋشىلارى ورتالىق كوممۋنيكاسيالار قىزمەتى الاڭىندا باسپا ءسوز كونفەرەنسيا وتكىزدى. ءمۇشايرانىڭ ماقساتى مەن مىندەتتەرى تۋرالى اقىن قالقامان سارين مەن استانا قالاسى اكىمدىگىنىڭ جاستار ساياساتى ماسەلەلەرى باسقارماسىنىڭ باسشىسى اسحات ورالوۆ بايانداپ بەردى.

ەلباسى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋ شەڭبەرىندە جاستار اراسىندا ۇلتتىق بىرەگەيلىك پەن ۇلتتىق قۇندىلىقتارىمىزدى ناسيحاتتاۋ ماقساتىندا وتەتىن ءمۇشايراعا استانانىڭ جاس اقىندارىن قاتىسۋعا شاقىرامىن. بيىل قالالىق دەڭگەيدە وتەتىن ءمۇشايرانى بولاشاقتا، رەسپۋبليكالىق، ءتىپتى حالىقارالىق جىر بايگەسىنە اينالدىرۋدى جوسپارلاپ وتىرمىز دەدى،- اسحات ورالوۆ

ءۇش كەزەڭنەن تۇراتىن ءمۇشايراعا 14 – 29 ارالىعىنداعى جاس اقىندار قاتىسا الادى. ءبىرىنشى كەزەڭدە: «ماڭگىلىك ەل مۇراتىم»  مەن «مەملەكەتتىك رامىزدەر مارتەبەم» تاقىرىپتارىنداعى شىعارمالاردى قابىلداۋ جۇرگىزىلەدى. ەكىنشى جانە ءۇشىنشى كەزەڭدە: وتىنىمدەردى قاراستىرۋ مەن ۇزدىك اقىندار ورنىن انىقتاپ، ءمۇشايرانىڭ ءادىل قازىلار القاسىنىڭ وتىرىسى وتكىزىلەدى. ماراپاتتاۋ ءراسىمى قىركۇيەك ايىندا استانا قالاسىندا سالتاناتتى تۇردە وتەدى.

قابىلدانعان ماتەريالدار رەسەنزيالانبايدى جانە قايتارىلمايدى. ءمۇشايرا جۇمىستارى ەرەجە شارتتارىنا سايكەس كەلمەسە، ۇيىمداستىرۋشىلار ولاردى قابىلداماۋعا قۇقى بار. بۇل تۋرالى ءوتىنىم ۇسىنىلعان كۇننەن باستاپ ءتورت جۇمىس كۇنى ىشىندە ءمۇشايراعا قاتىسۋشىلارىنا حابارلانۋى ءتيىس،- دەدى بەلگىلى اقىن قالقامان سارين

استانا قالاسىنىڭ جاستار ساياساتى ماسەلەلەرى باسقارماسى قاتىسۋشىلارعا 

1 ورىن - 1 ادام (300 000 تگ)؛

2 ورىن- 2 ادام (200 000 تگ)؛

3 ورىن - 3ادام (100 000 تگ)؛

نوميناسيا: 4 «ۇزدىك اقىن» (50 000 تگ) جۇلدە تاعايىنداپ وتىر.