الماتى اكىمى باۋىرجان بايبەك جاپونيا - قازاقستان  دوستىعى جاپوندىق پارلامەنت ليگاسىنىڭ ءتوراعاسى، جاپونيا پارلامەنتى وكىلدەرى پالاتاسىنىڭ دەپۋتاتى تاكەو كاۆامۋرامەن كەزدەستى، دەپ حابارلايدى Qamshy.kz اقپارات اگەنتتىگى.

تاراپتار مادەني- گۋمانيتارلىق، پارتياارالىق بايلانىستاردى نىعايتۋ ماسەلەلەرىن تالقىلادى.

الماتى  اكىمى  مەملەكەت باسشىسىنىڭ  سىندارلى ساياساتى ارقاسىندا جاپونيانىڭ قازاقستان ءۇشىن  ستراتەگيالىق سەرىكتەسكە اينالعانىن اتاپ  ءوتتى.

ۇستىمىزدەگى جىلدىڭ تەك 5 ايى ىشىندە مەگاپوليس پەن جاپونيا اراسىنداعى تاۋار اينالىمى  60%-عا ارتتى.  الماتىدا 14 بىرىككەن جانە 21 جاپوندىق كاسىپورىن تىركەلگەن. قالادا جاپون ىسكەرلىك  كلۋبى مەن جاپون يندۋستريالدى پارك قۇرىلىپ، «Tokyo Rope Almaty» جوباسىنىڭ ەكىنشى كەزەگى جۇزەگە اسۋدا.

توكيو مەن الماتى اراسىندا تىعىز بايلانىس ورنىققان. ويتكەنى ەكى قالادا دا بارلىق تۇرعىندار ءۇشىن قاۋىپسىزدىك پەن جايلىلىقتى قامتاماسىز ەتەتىن 2020 جىلعا دەيىنگى  دامۋ باعدارلاماسى جۇزەگە اسۋدا. 

ءوز كەزەگىندە تاكەو كاۆامۋرا ەكىجاقتى ەكونوميكالىق بايلانىس تەحنولوگيا، ءبىلىم، قارجى ترانسفەرتتەرىن  عانا ەمەس، سونىمەن قاتار ەكى  ەل مادەنيەتىن دە جاقىنداستىرا تۇسەتىنىن اتاپ ءوتتى.

«ءوزىنىڭ باستامالارىمەن قازاقستان  پرەزيدەنتى حالىقارالىق ارەنادا  ۇلكەن ابىروي مەن بەدەلگە يە، ونىڭ كەمەڭگەر باسشىلىعى  ارقاسىندا قازاقستان جەدەل قارقىنمەن دامۋدا.  مەن 1993 جىلى الماتىدا بولعانمىن. سودان بەرى قاراي قالا  تانىماستاي وزگەرىپ كەتىپتى، بۇرىنعىدان دا سۇلۋ جانە اسەم مەگاپوليسكە اينالىپتى. الماتى  مىڭجىلدىق مەرەيجاسىن اتاپ ءوتىپتى،  قالا بۇرىنعىدان دا تانىمال بولىپ، شەتەلدىك تۋريستەردىڭ، سونىڭ ىشىندە جاپوندىقتاردىڭ  قىزىعۋشىلىعىن ارتتىرۋدا، - دەدى جاپونيا پارلامەنتى وكىلدەرى پالاتاسىنىڭ  دەپۋتاتى.

كەزدەسۋ بارىسىندا تاكەو كاۆامۋرا  استاناداعى «ەكسپو - 2017»  كورمەسىنىڭ  ويداعىداي ءوتىپ جاتقانىن، جاپونيا دا 2025 جىلى وساكا قالاسىندا وسىناۋ ماڭىزدى حالىقارالىق كورمەنى وتكىزۋگە ۇمىتكەر ەكەنىن جەتكىزدى.  

ق ر پرەزيدەنتى ن. ءا. نازاربايەۆتىڭ 1994 جىلى كۇنشىعىس ەلىنە العاشقى ساپارى بارىسىندا قۇرىلعان جاپونيا- قازاقستان دوستىعىنىڭ جاپوندىق پارلامەنت ليگاسى ءتۇرلى پارتيالاردىڭ باسىن بىرىكتىرەتىن جاپونيا پارلامەنتى دەپۋتاتتارىنىڭ  قازاقستانعا دەگەن دوستىق يگى نيەتىن ۇشتاي تۇسەدى. ليگا مۇشەلەرى ەكىجاقتى  ىنتىماقتاستىقتى ودان ءارى نىعايتۋ ءۇشىن ءجيى جينالىپ تۇرادى.