ق ر پرەزيدەنتى اكىمشىلىگىنىڭ جانە الماتى قالاسى ءماسليحاتىنىڭ كەلىسىمىمەن الاتاۋ اۋدانىنىڭ جاڭا اكىمى بولىپ، شاحمەردەن رىسپايەۆ تاعايىندالدى. الماتى اكىمى باۋىرجان بايبەك اۋدان اكىمدىگىنىڭ ۇجىمىنا جاڭا باسشىلارىن تانىستىردى، دەپ حابارلايدى قازاقپارات ءتىلشىسى قالالىق اكىمدىككە سىلتەمە جاساي وتىرىپ، دەپ حابارلايدى Qamshy.kz اقپارات اگەنتتىگى.

شاحمەردەن رىسپايەۆ - جەكە سەكتوردا دا، مەملەكەتتىك باسقارۋ  ىسىندە دە تاجىريبەسى بار. مەملەكەتتىك قىزمەتتى 2001 جىلى الماتى قالاسىنىڭ قورشاعان ورتانى قورعاۋ باسقارماسىنىڭ جەتەكشى مامانى رەتىندە باستاعان.

2002 - 2005 جىلدار  ارالىعىندا «مەدەۋ» مەملەكەتتىك تابيعي پاركىنىڭ اعا كونسۋلتانتى قىزمەتىن اتقارعان.

2010 - 2015 جىلدار ارالىعىندا الماتى قالاسى الاتاۋ اۋدانى اكىمدىگىنىڭ مەملەكەتتىك-قۇقىق ءبولىمىنىڭ باستىعى بولعان.

2015 جىلدان باستاپ الماتى قالاسى الاتاۋ اۋدانى اكىمىنىڭ ورىنباسارى قىزمەتىن اتقارعان.

ەسكە سالا كەتەيىك، بۇرىن اۋدان  اكىمى بولعان باعدات مانزوروۆ الماتى قالاسى مەملەكەتتىك ساۋلەت- قۇرىلىس باقىلاۋ باسقارماسىنىڭ  باسشىسى بولىپ تاعايىندالعان ەدى.

الاتاۋ اۋدانىندا 9 جىل ىشىندە 4 جاڭا ەمحانا، 9 مەكتەپ، 12 مەملەكەتتىك بالاباقشا، اتلەتتەر اۋىلى، «الماتى ارەنا» كەشەنى سالىندى.

«العاباس-6»، «نۇركەنت»، «اقكەنت» ىقشام اۋداندارىندا تۇرعىن كەشەندەرىنىڭ قۇرىلىسى جالعاسۋدا.