الماتى اكىمى باۋىرجان بايبەك ناۋرىزباي اۋدانىنداعى №36 جاڭا ەمحانانىڭ رەسمي اشىلۋىنا قاتىستى، دەپ حابارلايدى Qamshy.kz اقپارات اگەنتتىگى.

جاڭا مەديسينالىق مەكەمە ءبىر ۋاقىتتا 500 ادامعا قىزمەت كورسەتە الادى.

دەنساۋلىق ساقتاۋ نىسانىن «تۋعان جەر» باعدارلاماسى بويىنشا «زاۆود ەلەكتروكابەل» ج ش س كومپانياسى سالدى.

جاڭا ەمحانا العاشقى مەديسينالىق-سانيتارلىق كومەكپەن قاتار دياگنوستيكالىق قۇرىلعىلارمەن جابدىقتالعان.

اتاپ ايتقاندا، تىكىشەك قاتەرلى ىسىگى مەن اسقازان اۋرۋلارىنىڭ بەلگىلەرىن انىقتايتىن سكرينينگتىك زەرتتەۋ اپپاراتتارى، رەنتگەن دياگنوستيكاسى جابدىقتارى بار. وفتالمولوگيا، وتورينولارينگولوگيا كابينەتتەرى اشىلعان.

كۇزدە مۇمكىندىگى شەكتەۋلى ادامدار ءۇشىن ساۋىقتىرۋ كابينەتى جۇمىس ىستەيتىن بولادى. ەمحانادا ەلەكتروندى تىركەۋ، Call-ورتالىق پەن ناۋرىزباي اۋدانىنىڭ تۇرعىندارى ءۇشىن جەدەل مەديسينالىق بريگادا قىزمەت كورسەتەتىن بولادى.

ايتا كەتۋ كەرەك، جاقىندا قالقامان ىقشام ەلدىمەكەنىندە 200 ادامعا ارنالعان تاعى ءبىر ەمدەۋ مەكەمەسى، تاۋسامالى اۋىلىندا 500 ادامعا قىزمەت كورسەتەتىن ەمحانا سالىنادى.

سونىمەن قاتار قالا اكىمى باۋىرجان بايبەك سالىنىپ جاتقان 1200 ورىندى مەكتەپ پەن اۋداندىق اكىمدىك، حقكو، ءاحات، پروكۋراتۋرا، سوت ورنالاساتىن اكىمشىلىك كەشەننىڭ قۇرىلىس بارىسىن تەكسەردى.

مەردىگەر كومپانيا وكىلدەرىنىڭ ايتۋىنشا، بۇل نىسانداردىڭ بارلىعى وسى ايدىڭ اياعىنا تامان دايىن بولماق. قازىرگى كەزدە مۇندا ىشكى ارلەۋ مەن اباتتاندىرۋ جۇمىستارى ءجۇرىپ جاتىر.

بيىل ناۋرىزباي اۋدانىندا ۇزىندىعى 107،5 شاقىرىم بولاتىن سۋ جانە 81،2 شاقىرىم بولاتىن سۋ ايىرۋ جۇيەسى، تاۋسامالى، تاۋجولى، شۇعىلا، تاستىبۇلاق، اكجار، قۇرامىس، قارعالى، جايلاۋ اقساي، قارعالى ەلدى مەكەندەرىن ورتالىقتاندىرىلعان تازا سۋمەن قامتاماسىز ەتەتىن ءارى سۋ تازالايتىن اقساي جانە قارعالى سۋ ستانسالارى سالىنىپ جاتىر. ۇزىندىعى 24،4 شاقىرىم بولاتىن كارىز كوللەكتورىن سالۋ جوسپارلانعان.

اۋداننىڭ جول جەلىسىندە دە قىزۋ جۇمىستار ءجۇرىپ جاتىر.

اباي داڭعىلىن قالقامان ەلدىمەكەنىنىڭ اۋەزوۆ كوشەسىنەن قالا شەكاراسىنا دەيىن جەتكىزۋ، جاندوسوۆ كوشەسىن ساين كوشەسىنەن تاۋسامالى اۋىلىنا دەيىن جاڭارتۋ، قالقامان جانە التى الاش ەلدى مەكەندەرىندە 30 كوشەنى جوندەۋ، 33 جول سالۋ باستالىپ كەتتى.

قارعالى وزەنىنىڭ ارناسىنا ۇزىندىعى 7،7 شاقىرىم بەتون كونسترۋكسيا توسەلگەن سوڭ، ونىڭ اينالاسى اباتتاندىرىلادى. جاسىل جەلەك، گۇلزارلار وتىرعىزىلادى. شاعىن ارحيتەكتۋرالىق فورمالار قويىلىپ، بالالاردىڭ ويىن الاڭدارى جاسالادى، جاياۋ جۇرگىنشى جولى سالىنىپ، جارىق كوزدەرى ورناتىلادى.