الماتى اۋەجايىندا ءبىرىنشى ۇشۋ-قونۋ جولى كۇردەلى جوندەۋدەن وتكىزىلىپ جاتىر. جاڭا نىساننىڭ ساپاسى يكاو ستاندارتى بويىنشا 3ۆ ساناتىنا دەيىن جەتكىزىلمەك، دەپ حابارلايدى Qamshy.kz اقپارات اگەنتتىگى.

قازاقپارات ءتىلشىسىنىڭ ارنايى ساۋالىنا «الماتى حالىقارالىق اۋەجايى» جەدەل باسقارۋ بويىنشا اتقارۋشى ديرەكتورى ابدراسيلوۆ باقىتحان جاۋاپ بەردى.

ونىڭ ايتۋىنشا، ساپالى ۇشۋ-قونۋ جولاعىن جاساۋعا 6 ملرد تەڭگە كەتەدى.

«الماتى اۋەجايىنداعى ءبىرىنشى ۇشۋ-قونۋ جولىن كۇردەلى جوندەۋدەن وتكىزۋ كاسىپورىننىڭ باستى ماقساتتارىنىڭ ءبىرى بولىپ وتىر. وعان 6 ملرد تەڭگە جۇمسالادى. وسىنىڭ ارقاسىندا اۋەجايدىڭ ءبىرىنشى جولاعى ساعاتىنا 27 ۇشاقتى ۇشىرىپ-قوندىرا الاتىن بولادى. بۇعان دەيىن تەك 13 ۇشاققا قىزمەت كورسەتۋ مۇمكىن بولاتىن. كۇردەلى جوندەۋ 1 قاراشاعا دەيىن جالعاسادى»، - دەدى باقىتحان ابدراسيلوۆ.

جاڭا نىسان زاماناۋي جارىق دابىلىمەن، راديوتەحنيكالىق قۇرالدارمەن جابدىقتالادى. 75 مەتر قاشىقتىق كورىنەتىن تۇمان كەزىندە دە ۇشاقتاردى قيىندىقسىز قابىلدايتىن بولادى.

ماماننىڭ ايتۋىنشا، جوندەۋ جۇمىستارى ۇشاقتاردىڭ كەستەسىنە ىقپال ەتە قويمايدى.

«اۋەجاي باسشىلىعى وسى ماسەلەنى ەسكەردى. ۇشاقتاردىڭ جاز-كوكتەمگى قوزعالىسىنىڭ كەستەسى وسى جوندەۋ جۇمىستارىن ەسكەرە وتىرىپ جاسالدى. ءبىرىنشى ۇشۋ-قونۋ جولى ءار بەيسەنبى سايىن 4 ساعاتقا 10:40-تان 14:40-قا دەيىن جابىق بولادى. بۇل ءوز كەزەگىندە رەيستەردىڭ كەستەسىنە ەلەۋلى اسەر ەتپەيدى»، - دەدى ول.

ايتا كەتۋ كەرەك، سونداي-اق، ەكىنشى ۇشۋ-قونۋ جولاعى دا پروفيلاكتيكالىق جوندەۋدەن وتكىزىلەدى.