الماتىدا قوعامدىق كەڭەس مۇشەلەرى «قالاداعى جولاۋشى تاسىمالداۋ كولىكتەرىندەگى جولاقىسىنىڭ ديففەرەنسيالدى تولەمىن ەنگىزۋ» ماسەلەسىن تالقىلادى، دەپ حابارلايدى Qamshy.kz اقپارات اگەنتتىگى.

كەڭەستىڭ فەيسبۋكتەگى پاراقشاسىندا كورسەتىلگەندەي، جۇمىس توبىنىڭ وتىرىسى بارىسىندا جولاۋشىلار تاسىمالى باسقارماسى مەن «الماتى كولىك حولدينگى» ج ش س ماماندارى قوعامدىق كەڭەس مۇشەلەرىنىڭ ۇسىنىمدارىن تىڭداپ، ساۋالدارىنا جاۋاپ بەردى.

وتىرىستىڭ سوڭىندا قوعامدىق كەڭەس الماتىداعى قوعامدىق كولىكتەردەگى جولاقىسىن قولما-قول اقشا بولعان جاعدايدا 150 تەڭگەگە كوتەرۋ تۋرالى ۇسىنىستى قولدادى.

«الماتى كولىك حولدينگى» اق ديرەكتورىنىڭ ورىنباسارى ب. بەكەشيەۆ الماتى مەتروسىندا سمس ارقىلى نەمەسە بانك كارتالارى ارقىلى تولەنگەن جاعدايدا جولاقىسىن 80 تەڭگە كولەمىندە قالدىرۋ تۋرالى ايتتى.

وتىرىس قورىتىندىسىندا قوعامدىق كولىك جانە اۆتوموبيل جولدارى باسقارماسىنا جولاقىسى جايىندا حالىق اراسىندا كەڭ كولەمدەگى ءتۇسىندىرۋ جۇمىستارىن جۇرگىزۋ تاپسىرىلدى.

سونداي-اق، جۇرگىزۋشىلەردىڭ جۇمىسىن، وڭاي اپپاراتتارىنىڭ دۇرىس جۇمىس جاساۋىن قاداعالاۋ تابىستالدى.

«ەگەر وڭاي اپپاراتى دۇرىس جۇمىس جاساماسا، بارلىق جولاۋشىلار اتالعان كولىكتە تەگىن ءجۇرۋى ءتيىس. بۇل ءوز كەزەگىندە اپپاراتتى قاساقانا ىستەن شىعارۋدى توقتاتادى»، - دەدى ماماندار.

ايتا كەتۋ كەرەك، وسىدان بىرنەشە اپتا بۇرىن الماتىداعى جولاقىسى قىمباتتايتىنى تۋرالى قاۋلى شىعارىلعان بولاتىن. قاۋلى ءقازىر قوعامدىق تالقىلاۋدا جاتىر. قوعام تاراپىنان ماقۇلدانعان جاعدايدا قاۋلى ادىلەت ورگاندارىندا تىركەلىپ، بەكىتىلەدى.