الماتى اكىمى باۋىرجان بايبەك 2017-2024 جىلدارى ءسۇرىلۋى ءتيىس ەسكى ۇيلەرگە قاتىستى جاسالعان جاڭا باعدارلاما اياسىندا قالا اۋماعىنداعى 1 034 ەسكى قۇرىلىستى قايتا جاڭارتۋ بويىنشا كوشپەلى كەڭەس وتكىزدى. قالا باسشىسى جۇمىس ساپارى بارىسىندا جاندوسوۆ كوشەسى بويىنداعى، سۇلەيمەنوۆ كوشەسى مەن ششەپكين كوشەسىنىڭ ورتاسىنا «ەسكى ۇيلەردى ءسۇرۋ» باعدارلاماسى بويىنشا سالىنعان ءۇيدىڭ ساپاسىن سىنعا الدى، دەپ حابارلايدى Qamshy.kz اقپارات اگەنتتىگى.

«قۇرىلىستى بۇلايشا جۇرگىزۋگە بولمايدى. باعاسى تومەن، قولجەتىمدى باسپانالار دا ساپالى سالىنۋى ءتيىس»، - دەپ اتاپ ءوتتى قالا اكىمى. ول ورىن العان بارلىق كەمشىلىكتەردى تۇزەتۋدى، سالىنعان ۇيلەر اينالاسىنا اعاشتتار وتىرعىزۋدى، بالالار جانە سپورت الاڭدارىن سالۋدى، تۇرعىنداردىڭ قوزعالىسى قيىن توپتارى ءۇشىن قولجەتىمدى ورتانى ۇيىمداستىرۋدى جانە باسقا دا ءتيىستى جاعدايلاردى جاساۋدى تاپسىردى.

ايتا كەتەيىك، بۇگىنگى ساپارىندا قالا باسشىسى 10 مىڭ الماتىلىق وتباسىنىڭ 2017-2024 جىلدارى ەسكى ۇيلەردى ءسۇرۋ باعدارلاماسى بويىنشا تۇرعىن ءۇي جاعدايلارىن جاقسارتاتىنىن مالىمدەدى.

مەگاپوليس باسشىسىنىڭ ايتۋىنشا، قولجەتىمدى باعا بويىنشا قوسىمشا 30 مىڭنان استام پاتەر سالىنادى، قالا تۇرعىندارى جاڭا الەۋمەتتىك نىساندارمەن، مەكتەپتەرمەن، بالاباقشالارمەن، ەمحانالارمەن، جاڭارتىلعان ينجەنەرلىك كوممۋنيكاسيالارمەن، اباتتاندىرىلعان اۋماقتارمەن قامتاماسىز ەتىلەدى.

ول ءۇشىن الداعى جەتى جىل ىشىندە قالا ەكونوميكاسىنا جالپى كولەمى 400 ملرد تەڭگە جەكە ينۆەستيسيا تارتىلىپ، 70 مىڭنان استام جۇمىس ورنى قۇرىلادى.

«ءبىزدىڭ باستى ماقساتىمىز - تۇرعىن ۇيلەردى جاڭارتىپ قانا قويماي، ونىڭ باعاسىن تومەندەتۋ، جاڭا جۇمىس ورىندارىن اشىپ، ينۆەستيسيا تارتۋ. مەملەكەت باسشىسى تەك «نۇرلى جەر» باعدارلاماسى بويىنشا عانا ەمەس، سونىمەن قاتار بيۋدجەتتەن تىس قارجى ەسەبىنەن دە قۇرىلىس سالۋدى تاپسىردى. ءبىزدىڭ قالادا بۇل ءۇشىن بارلىق جاعدايلار بار، وسى باعىتتاعى جۇمىستاردى ودان ءارى جالعاستىراتىن بولامىز»، - دەدى باۋىرجان بايبەك.

ول جاڭا ۇيلەردىڭ جوبالارىن جاساعاندا جانە قۇرىلىستى جۇرگىزگەندە كوممۋنيكاسيا مەن جەلىلەرگە تۇسەتىن اۋىرتپالىقتى قاتاڭ ەسكەرۋ قاجەتتىگىن ايتتى.