الماتىدا جولاقىسىنىڭ ديففەرەنسيالدى ءتاريفىن ەنگىزۋ تۋرالى باسپا ءسوز ءماسليحاتى ءوتتى، دەپ حابارلايدى Qamshy.kz اقپارات اگەنتتىگى.
وسىدان بىرنەشە اپتا بۇرىن اكىمدىك الماتىدا جولاقىسى قىمباتتايتىنى تۋرالى قاۋلى شىعارعان بولاتىن. قاۋلى ءقازىر قوعامدىق تالقىلاۋدا جاتىر. قوعام تاراپىنان ماقۇلدانعان جاعدايدا قاۋلى ادىلەت ورگاندارىندا تىركەلىپ، بەكىتىلەدى.
بۇگىن قالالىق جولاۋشىلار تاسىمالى كولىگى مەن اۆتوموبيل جولدارى باسقارماسىنىڭ وكىلدەرى اتالعان ماسەلەگە بايلانىستى تۇسىنىكتەمە بەردى.
«ديففەرەنسيالدى تاريف ەنگىزۋگە 1 جىلدان استام ۋاقىت جۇمسادىق. پارلامەنتتە قۇجات ماقۇلداندى، پرەزيدەنت قول قويدى. مۇنداي ءتاريفتىڭ ءوز ارتىقشىلىقتارى بار. اۆتوبۋسپەن سيرەك جۇرەتىن ادامدار 10، 20 رەت جۇرۋگە جارايتىن كارتوچكا الا الادى. تۇراقتى جولاۋشىلارعا ديسكونت ەنگىزبەكپىز. بولاشاقتا وبلىستان ادام تاسىمالدايتىن اۆتوبۋستار دا وسى تاريفكە كوشەدى. ءبىر ساعاتتىڭ ىشىندە باسقا كولىككە وتىرسا، جولاقىسى تەگىن بولاتىن بولادى. ەلەكتروندى بيلەتكە كوشۋ تاسىمالداۋشى كاسىپورىنداردىڭ تابىسىن ناقتىلاۋعا كومەكتەسەدى. بۇل ءوز كەزەگىندە دەمەۋقارجىنى دۇرىس ەسەپتەۋگە سەپتىگىن تيگىزەدى»، - دەدى باسقارما باسشىسى ماقسۇت يساحوۆ.
جاڭا جۇيەگە سايكەس ەندى جولاۋشىلار ءبىر مارتە جول ءجۇرىسى ءۇشىن قولما-قول اقشا تولەسە، 150 تەڭگە بەرەتىن بولادى، ال ەگەر «وڭاي» كارتاسىمەن بولسا 80 تەڭگە كولەمىندە قالادى. ايلىق جول ءجۇرۋ بيلەتى مەن جەڭىلدىكتەر دە ساقتالادى.
تەك مەترودا عانا جول اقىسى 80 تەڭگە بولىپ قالادى.
مامانداردىڭ ايتۋىنشا، كەي كەزدەرى «وڭاي» اپپاراتتارى دا ىستەن شىعىپ قالادى.
«ستاتيستيكا بويىنشا ىستەن شىققان تەرمينالدار تۋرالى اقپاراتتىڭ 15-25 پايىزى راستالماي شىعادى. جۇرگىزۋشىلەر وزدەرى ءوشىرىپ تاستايدى نەمەسە قاساقانا ىستەن شىعارادى. ەگەر اپپارات جۇمىس جاساماسا، جولاۋشى تەگىن جۇرۋگە قۇقىلى. سمس تولەمگە كەلسەك، ۇيالى وپەراتورلار دا تۇراقتى جۇمىس جاسامايدى، ءبىراق ونىڭ ءبارىن قالپىنا كەلتىرىپ جاتىرمىز»، - دەدى «الماتى كولىك حولدينگى» ج ش س ديرەكتورى سادير حامرايەۆ.
ونىڭ ايتۋىنشا، كارتالاردى كاراۆان، داۋىس، ازبۋكا سۆيازي جەلىسى دۇڭگىرشەكتەرىندە، مەترو كاسسالارىندا ساتىپ الۋعا بولادى.
ءقازىر قاۋلى بارلىق ارنايى پروسەدۋرالاردان ءوتتى. ءماسليحات شەشىمىمەن، قوعامدىق كەڭەستىڭ ۇسىنىسىمەن بەكىتىلدى.
پىكىر قالدىرۋ