ەل پرەزيدەنتى ن.نازاربايەۆ ءوزىنىڭ ستراتەگيالىق ماڭىزعا يە «بولاشاققا باعدار: رۋحاني جاڭعىرۋ» باعدارلاماسىندا اۋقىمدى ماسەلەلەرگە نازار اۋدارعانى بەلگىلى. ەلىمىزدىڭ ەرتەڭگى باعىت-باعدارى ايقىندالعان مەملەكەت باسشىسىنىڭ ويتولعامى ەشكىمدى دە بەي-جاي قالدىرماي، ەلىمىزدە «رۋحاني جاڭعىرۋ» قوعامدىق سانانى جاڭعىرتۋ باعدارلاماسىن جۇزەگە اسىرۋ جۇمىستارى كەڭىنەن جۇرگىزىلۋدە. باتىس قازاقستان وبلىسىندا «رۋحاني جاڭعىرۋ» باعدارلاماسىنىڭ وڭىرلىك جوبا كەڭسەسى ءوز جۇمىسىنا كىرىسۋدە.

          وبلىس اكىمدىگى عيماراتىندا ورنالاسقان وڭىرلىك جوبا كەڭسەسى «رۋحاني جاڭعىرۋ» باعدارلاماسى بويىنشا قولعا الىنعان شارالاردى جيناقتاپ، وبلىس كولەمىندە ىسكە اسىرۋدا. كەڭسە جەتەكشىسى – ەڭ جاس وبلىستىق دەپۋتات سالتانات تۇمانبايەۆا. وڭىرلىك جوبالىق كەڭسە ورتالىعى  جەرگىلىكتى اتقارۋشى ورگاندارمەن جۇمىستى ۇيلەستىرۋ جانە باعدارلامانىڭ جوبالارىن ىلگەرىلەتۋ ءۇشىن قۇرىلعان. سونداي-اق، وبلىستا «رۋحاني جاڭعىرۋ» باعدارلاماسىن ىسكە اسىرۋ بويىنشا ساراپشىلار كەڭەسى قۇرىلىپ، اۋدانداردا جۇمىس توبى جاساقتالماق.

«رۋحاني جاڭعىرۋ» باعدارلاماسى اياسىندا جاڭا، تىڭ جوبالار جاساقتاۋ – باستى مىندەت. مەملەكەت باسشىسىنىڭ قويعان ماقسات-مىندەتى دە وسىنداي: «جاڭا جاعدايدا جاڭعىرۋعا دەگەن ىشكى ۇمتىلىس – ءبىزدىڭ دامۋىمىزدىڭ ەڭ باستى قاعيداسى. ءومىر ءسۇرۋ ءۇشىن وزگەرە ءبىلۋ كەرەك. وعان كونبەگەندەر تاريحتىڭ شاڭىنا كومىلىپ قالا بەرەدى» دەگەن بولاتىن ەلباسى ءوز ماقالاسىندا.

وڭىرىمىزدە جانتاس ءسافۋلليننىڭ جەتەكشىلىگىمەن بىرنەشە جىلدار بويى ەپيگرافيكالىق ەسكەرتكىشتەردى زەرتتەپ جۇرگەن «قۇلپىتاس سىرىن اشايىق»، ءوڭىرىمىزدىڭ تاريحي، كيەلى ورىندارى جونىندە بەينەروليكتەر ءتۇسىرىپ جۇرگەن «دەشتى قىپشاق دالاسى»، رەسەي مۇراعاتتارىنداعى تاريحي دەرەكتەردى جيناقتاۋ  جوبالارى وسى باعدارلامانىڭ اياسىنا ءدوپ كەلەدى.

الاشتىڭ 100 جىلدىعىمەن قاتار كەلگەن وبلىستىق «ورال ءوڭىرى» مەن «پريۋرالە» گازەتتەرىنە 100 جىل تولۋىنا وراي «جايىق پرەسس» جشس-دا ءبىراز ءىس تىندىرىلدى. «ورال ءوڭىرى» گازەتىنىڭ باستاۋىندا تۇرعان «قازاقستان»، «ۇران»، «يزۆەستيا-حابار»، «كيرگيزسكايا پراۆدا» - «قازاق دۇرىستىعى»، «دۇرىستىق جولى»، «ۇشقىن» (رەسپۋبليكالىق «ەگەمەن قازاقستان» گازەتىنىڭ باستاۋى) گازەتتەرى دە جيناقتالىپ، جەكە كىتاپ بولىپ جارىق كوردى. سوڭعى بەس جىل ىشىندەگى وبلىستىڭ باسپا ءسوز تاريحى تۋرالى ون كىتاپ جارىق كوردى. وعان قوسا گازەتتەردىڭ 100 جىلدىق تىگىندىسى دە ءباسپاسوزدىڭ قارا شاڭىراعىنا جيناقتالدى. ولاردىڭ ەلەكتروندىق نۇسقالارى ەلباسىنىڭ «سيفرلىق قازاقستان» جوباسىمەن تولىق ۇندەسەدى.

«رۋحاني جاڭعىرۋ» باعدارلاماسىن جۇزەگە اسىرۋعا باعىتتالعان شارالار قاتارىن  «جايىق پرەسس» ج ش س باس ديرەكتورى ج.سافۋللين: «باسپا ءسوز تاريحىنا قاتىستى تۇلعالاردىڭ كونە سۋرەتتەرى جيناقتالۋدا. باشقۇرتستان مۇراعاتتارىندا ءحىح عاسىردا قازاق مەشىتتەرىندە تولتىرىلعان مەتركەلەرى ساقتالعان. بۇل قۇجاتتار سول كەزەڭگە تاريحي ساراپتاما جاساۋعا نەگىز بولدى. ارينە تاريحي ەسكەرتكىشتەردەگى، مۇراعاتتارداعى مالىمەتتەردى جيناۋ وڭاي شارۋا ەمەس. وعان ماماندار تارتىلۋى قاجەت. وسى باستالعان عىلىمي جۇمىستاردى جالعاستىرۋ ءۇشىن «رۋحاني جاڭعىرۋ» باعدارلاماسىنىڭ «تۋعان جەر» باعىتىنا 6 جوبا ۇسىنىلدى»،- دەپ تولىقتىردى.

باتىس قازاقستان وبلىسىنىڭ ىشكى ساياسات باسقارماسى «تۋعان جەر» كىشى باعدارلاماسى اياسىندا وبلىستاعى 12 اۋدانعا پرەسس-تۋرلار ۇيىمداستىرماق. ءاربىر اۋداننىڭ كورىكتى جانە كيەلى جەرلەرى، ءوڭىردىڭ دامۋىنا ۇلەس قوسقان ازاماتتار تۋرالى باق-قا ماتەريالدار شىعارۋ كوزدەلۋدە. سونداي-اق، «جىلدىڭ ۇزدىك مەسەناتى»، «جىلدىڭ ۇزدىك ۆولونتەرى»، «جىلدىڭ ۇزدىك ۇەۇ»، «جومارت جۇرەك» اتتى شارالار مەن «قوعامدىق-پىكىرتالاس كلۋبىنىڭ» وتىرىستارى وتكىزىلىپ، «الەۋمەتتىك-ماڭىزدى جوبالار مەن يدەيالاردىڭ جارمەڭكەسى» جانە ولكەتانۋ بويىنشا ونلاين وقىتۋلارى ۇيىمداستىرىلماق.

شەكارالىق ىنتىماقتاستىقتى نىعايتۋ ماقساتىندا كورشىلەس رەسەي وبلىستارىنىڭ ەتنو-مادەني ورتالىقتارىنىڭ قاتىسۋىمەن «دوستىقتا شەكارا جوق» فەستيۆالى جوسپارلاندى.