الماتى اكىمى باۋىرجان بايبەك الاتاۋ اۋدانىنىڭ اتلەتتەر اۋىلىنداعى كۇنىنە 1،5 مىڭ ادامعا دەيىن قىزمەت كورسەتەتىن جاڭادان اشىلعان حالىققا قىزمەت كورسەتۋ ورتالىعىندا بولدى، دەپ حابارلايدى Qamshy.kz اقپارات اگەنتتىگى.

الاتاۋ اۋدانى تۇرعىندارىنا قىزمەت كورسەتۋ ورتالىعىندا وپەراسيالىق زال، وز-وزىنە قىزمەت كورسەتۋ سەكتورى، جيناقتاۋشى سەكتور، الەۋمەتتىك قىزمەت سەكتورى، قۇجاتتاندىرۋ، ازاماتتاردى تىركەۋ، دايىن قۇجاتتاردى بەرۋ، كونسۋلتاسيا سىندى سەگىز سەكتور جۇمىس ىستەيدى.

الماتى قالاسى بويىنشا حقكو فيليالىنىڭ ديرەكتورى دانيار احمەتوۆ قالالىقتارعا بارىنشا قولايلى بولۋ ءۇشىن «Connection Point» وز-وزىنە قىزمەت كورسەتۋ سەكتورىنىڭ جۇمىس جاسايتىندىعىن، مۇندا قاجەتتى بارلىق ەلەكتروندىق قىزمەتتى، سونىڭ ىشىندە بالا باقشاعا كەزەككە قويۋعا، مەكەنجاي جانە زەينەتاقى انىقتاماسىن الۋعا، نەكەگە تۇرۋعا ءوتىنىش بەرۋگە جانە باسقا دا قىزمەت تۇرلەرىن جۇزەگە اسىرۋعا بولاتىندىعىن ايتتى.

كۇنىنە 1،5 مىڭ ادامعا دەيىن قىزمەت كورسەتەتىن جاڭا نىساننىڭ زالدارى بارىنشا قولايلى ءارى كەڭ، «ۋنيۆەرسيادا مۇراسى» جوباسى اياسىندا جاڭا جيھازدارمەن جابدىقتالعان. عيماراتتا مۇمكىندىگى شەكتەۋلى جاندار ءۇشىن بارلىق جاعدايلار جاسالعان، ولار  ىڭعايلى پاندۋستاردى، ليفتەردى پايدالانىپ، وزدەرىنە قاجەت ءتۇرلى تەتىكتەردى باسا الادى.