الماتىدا بالالار مەن جاسوسپىرىمدەرگە ارنالعان حالىقارالىق «مەنىڭ قالام- الماتى» تۋريستىك ەكسپەديسياسى وتەدى، دەپ حابارلايدى Qamshy.kz اقپارات اگەنتتىگى.

«الماتاۋ» تۋريستىك  بازاسى اۋماعىندا  2017 جىلدىڭ 25 شىلدەسىنەن 6 تامىز ارالىعىندا «رۋحاني جاڭعىرۋ»  باعدارلاماسى مەن «مەنىڭ وتانىم - قازاقستان» رەسپۋبليكالىق ەكسپەديسياسى اياسىندا الماتى قالاسىنىڭ  تۋريزم جانە  سىرتقى بايلانىس باسقارماسى سپورتتىق تۋريزم جانە تۋريستىك كوپسايىس فەدەراسياسىمەن بىرگە بالالار مەن جاسوسپىرىمدەردىڭ «مەنىڭ قالام - الماتى» حالىقارالىق» تۋريستىك ەكسپەديسياسىن وتكىزەدى.

«شارانىڭ ماقساتى - تۋريستىك قىزمەتتى جانداندىرۋ،  وقۋشىلار مەن كوللەدجدەر، جوعارى وقۋ ورىندارى ستۋدەنتتەرىنىڭ اراسىندا سپورت پەن سالاۋاتتى ءومىر سالتىنىڭ نەگىزى رەتىندە ءتۋريزمدى كەڭىنەن ناسيحاتتاۋ»، دەلىنگەن حابارلامادا.

ەكسپەديسيا شاراعا قاتىسۋشى كوماندالار اراسىندا تۋريستىك جورىقتار دارەجەسى نەگىزىندە وتەدى.

ەكسپەديسيا باعدارلاماسىندا تاۋ بوكتەرلەرىندەگى جارىستار، تۋرنيرلەر مەن ولكە تانۋ شارالارى قاراستىرىلعان. بيىل  ەكسپەديسيانىڭ بازالىق لاگەرى ىلە الاتاۋى ۇلتتىق پاركى اۋماعىنداعى «الماتاۋ» تۋريستىك بازاسى.

ەكسپەديسياعا قاتىسۋعا مەكتەپ وقۋشىلارى، كوللەدجدەر مەن جوعارى وقۋ ورىندارىنىڭ ستۋدەنتتەرى، قوسىمشا ءبىلىم جۇيەسىنىڭ، سپورت مەكتەپتەرىنىڭ قازاقستاننىڭ ءتۇرلى وڭىرلەرىنىڭ قوعامدىق تۋريستىك بىرلەستىكتەرىنىڭ جانە تمد ەلدەرى مەن شەتەلدىك تۋريستىك ۇيىمداردىڭ وكىلدەرى شاقىرىلعان. بۇلاردىڭ بارلىعى دارىگەرلىك باقىلاۋدان وتكەندەر جانە تۋريستىك تاجىريبە جيناقتاعاندار.

قاتىسۋشى كوماندالارعا ءتيىستى  سەرتيفيكاتتار، جەڭىمپازدارعا ديپلومدار مەن گراموتالار تابىستالادى. ەكسپەديسيالىق جورىقتى ويداعىداي جۇزەگە اسىرعاندار دا ماراپاتتالادى.

تۋريستىك شارا «الماتاۋ» تۋريستىك بازاسىندا 26 شىلدەدە ساعات 18.00-دە اشىلادى. سالتاناتتى جابىلۋى 6 تامىزدا وتەدى.