الماتى اكىمى باۋىرجان بايبەك جاياۋ جۇرگىنشىلەرگە كوبىرەك ورىن بەرىلگەن قالا كوشەلەرىن قايتا جاساۋ جۇمىستارىنىڭ بارىسىن تەكسەردى، دەپ حابارلايدى Qamshy.kz اقپارات اگەنتتىگى.

باۋىرجان بايبەك جۇمىس بارىسىندا جاياۋ جۇرگىنشىلەرگە كوبىرەك ورىن بەرىلگەن پانفيلوۆ، جىبەك جولى، گوگول، قابانباي باتىر كوشەلەرى مەن «استانا» الاڭىنىڭ قايتا جاسالۋىن تەكسەردى. اكىم مەردىگەر ۇيىمدارعا جۇمىستىڭ ساپاسى مەن بەلگىلەنگەن مەرزىمدە اياقتالۋىن تاپسىردى. 

جيىندا قازىرگى كەزدە جىلۋ جۇيەلەرىن اۋىستىرۋ جۇمىستارىنىڭ اياقتالعانى جانە ارىق لوتوكتارىنىڭ توسەلگەنى، كوشە جارىعى جەلىلەرىنىڭ تارتىلىپ، قۇرعاق سۋبۇرقاقتارىنىڭ ىسكە قوسىلعانى ايتىلدى. كەلەسى اپتادان باستاپ، جوعارىدا اتالعان كوشەلەردە ءبىرىڭعاي ارحيتەكتۋرالىق ستيل قالىپتاستىرۋ ءۇشىن نىسانداردىڭ سىرتقى بەتتەرىن جاڭارتۋ جۇمىستارى باستالادى.

بۇرىننان بار جاسىل جەلەكتەر سول بويى ساقتالادى. كولەڭكە كوبەيتۋ ماقساتىندا ەڭسەلى اعاشتار، قايىڭ، ەمەن وتىرعىزۋ قاراستىرىلعان.

قالالىق اكىمدىكتىڭ باسپا ءسوز قىزمەتى تاراتقان مالىمەتكە سۇيەنسەك، قالادا 330 مىڭ شارشى مەتر جەرگە جاسىل جەلەك وتىرعىزىلادى. جىبەك جولى كوشەسىن قونايەۆ كوشەسىنەن جەلتوقسان كوشەسىنە دەيىن قايتا جاساۋ بارىسىندا «اربات» بۇرىنعى كەلبەتىن ساقتايدى، تولىق اباتتاندىرىلادى جانە جەكە فۋنكسيونالدى ايماقتارعا بولىنەدى. دەمالىس ورىندارى ارتادى، بۇرىننان بار فونتاندار قايتا جاسالادى، سپورت جانە بالالار الاڭدارى پايدا بولىپ، كەسپە تاستىڭ ورنىنا جوعارى ساپالى گرانيت توسەلەدى.

پانفيلوۆ كوشەسى بويىمەن قابانباي باتىر كوشەسىنەن باستاپ، جىبەك جولىنا دەيىنگى ارالىقتاعى جاياۋ جۇرگىنشى جولىنا دا گرانيت توسەلەدى، مۇندا دا دەمالاتىن ورىندار، سپورت جانە بالالار الاڭدارى، اباتتاندىرىلعان ۆەلوجولدار بولادى.

اتاپ وتەرلىك جايت، جوندەۋ جۇمىستارى باستالعان كەزدە كونە قالانىڭ ەسكى كەسپە تاستارى تابىلعان ەدى، جوبانىڭ جالپى كومپوزيسياسىندا ولار دا پايداعا اسادى. 

«استانا» الاڭىندا كولىك قوزعالىسى جولاعى قىسقارادى، بوساعان كەڭىستىكتەرگە قوسىمشا اعاشتار وتىرعىزىلادى، ەكى سۋبۇرقاق پايدا بولادى. وسىلايشا، جاياۋ جۇرگىنشىلەر مەن كولىك لەگى ەكىگە بولىنەدى، اۆتوتۇراق ايماعى شەكتەلەدى. الاڭنىڭ سولتۇستىك بولىگىنە  ەكولوگيالىق تازا گرانيت تاستار توسەلەدى. 

«قابانباي باتىر مەن گوگول كوشەلەرىندە قوزعالىس بولىگىن شەكتەۋ قاراستىرىلماعان، ءبىراق جاياۋ جۇرگىنشى جولىنىڭ تۇگەل بويىنا كولىك قويۋعا تىيىم سالىنادى، ءاۆتوموبيلدى تەك ارنايى جابدىقتالعان  ورىنداردا عانا قالدىرۋعا بولادى»، دەلىنگەن قالالىق اكىمدىك تاراتقان حابارلامادا.