رۋحاني جاڭعىرۋ باعدارلاماسى اياسىندا سىرىم اۋدانى ورتالىعى جىمپيتى اۋىلىندا الاش ۇكىمەتىنىڭ 100 جىلدىعىنا ارنالعان قازاق كۇرەسىنەن «الاش بارىسى» رەسپۋبليكالىق ءتۋرنيرى مارەگە جەتتى. سىرىم ەلىندە العاش ۇيىمداستىرىلعان جارىستىڭ اشىلۋ راسىمىندە اۋدان اكىمى تولەگەن تورەعالييەۆ، بقو دەنە شىنىقتىرۋ جانە سپورت باسقارماسىنىڭ باسشىسى ءاسيا امانبايەۆا جانە قازاق كۇرەسىنەن «قازاقستان بارىسى - 2017» رەسپۋبليكالىق ءتۋرنيرىنىڭ جەڭىمپازى ەلامان ەرعالييەۆ جينالعانداردى قۇتتىقتاپ، ايتۋلى دوداعا قاتىسۋشىلارعا ساتتىلىك تىلەدى. جۋرناليست، ايتىسكەر اقىن باۋىرجان شيرمەدين ۇلىنىڭ ءمالىم ەتكەنىندەي، تۋرنيرگە استانا قالاسىنان، اقتوبە جانە باتىس قازاقستان وبلىستارىنان قىرىقتان استام پالۋان قاتىسىپ، ولار 90 كەلىگە دەيىن جانە 90 كەلىدەن جوعارى سالماق دارەجەلەرى بويىنشا ەكى توپقا ءبولىنىپ، ب ا ق سىنادى. الدىمەن سالماعى 90 كەلىگە دەيىنگىلەر اراسىندا مىقتىلار بەلگىلى بولدى. بۇل ورايدا سىرىم اۋدانىنىڭ پالۋاندارى ەشكىمگە دەس بەرمەدى. فينالدا نۇرىمجان عابباسوۆ پەن ايبول ورازعالييەۆتىڭ بەلدەسۋى تارتىستى بولدى. ورايلى ءساتتى قۇر جىبەرمەگەن نۇرىمجان جەڭىمپاز اتاندى. ال ءۇشىنشى ورىنعا ايبەك عابدەشيەۆ كوتەرىلدى. سالماعى 90 كەلىدەن اساتىندار اراسىندا 15 پالۋان كىلەمگە شىقسا، سونىڭ تەڭ جارتىسىنا جۋىعى ق ر پرەزيدەنتىنىڭ جۇلدەسى ءۇشىن ءداستۇرلى تۇردە ءوتىپ كەلە جاتقان «قازاقستان بارىسى» رەسپۋبليكالىق تۋرنيرىنە قاتىسىپ ۇلگەرگەن. سونىڭ ءبىرى - جانىبەك اۋدانىنىڭ اتىنان شىعىپ جۇرگەن، نەگىزى قازتالوۆتىڭ اقپاتەرىندە تۋىپ-وسكەن ەرنازار حامزين. بيىل استانادا وتكەن «قازاقستان بارىسىنا» العاش رەت قاتىسىپ كەلگەن ەرنازاردىڭ سالماعى توقسان كەلىدەن ءسال اساتىن بولار. ءبىراق بۇل جولى سالماعى وزىنەن الدەقايدا جوعارى پالۋانداردى بۇيىم قۇرلى كورگەن جوق. فينالدىق سىندا قاراتوبەلىك دارحان تەمىرحانوۆتى قاپى قالدىرىپ، جاۋىرىنىن جەر يىسكەتكەن ە.حامزين تۋرنير جەڭىمپازى اتانىپ، 1 ملن تەڭگە كولەمىندەگى جۇلدەگە يە بولدى. ونىڭ باپكەرى - جەڭىس ستامعازييەۆ. د.تەمىرحانوۆ ەكىنشى، بورلىلىك، بيىل «قازاقستان بارىسى» رەسپۋبليكالىق تۋرنيرىندە ب ا ق سىناپ قايتقان تەمىرلان كولباي ءۇشىنشى ورىنعا كوتەرىلدى. ايتا كەتەيىك، ۇلتتىق دارەجەدەگى تورەشى، بقو قازاق كۇرەسى فەدەراسياسىنىڭ ۆيسە-پرەزيدەنتى ارتۋر شەرعالييەۆ باستاعان قازىلار بارىنشا ءادىل تورەلىك جاسادى. تۋرنير بارىسىندا بەينەقايتالاۋ ءادىسى دە قولدانىلدى. داۋ تۋدىرعان تۇستاردى تورەشىلەر LED-ەكراننان قايتالاپ قاراپ، قورىتىندى شىعارىپ وتىردى. بقو دەنە شىنىقتىرۋ جانە سپورت باسقارماسىنىڭ باسشىسى ءا.امانبايەۆا دا جارىستىڭ جوعارى دەڭگەيدە ۇيىمداستىرىلعاندىعىن جەتكىزدى.

رۋحاني جاڭعىرۋ باعدارلاماسىنىڭ ءتول تاريحىمىز بەن ۇلتتىق رۋحىمىزدى بويىمىزعا ماڭگى ساقتاۋعا باعىتتالعانىن ەسكەرسەك، سىرىم اۋدانىندا وتكىزىلگەن شارانىڭ ۇلتتىق پاتريوتيزمدى دامىتۋعا قوسار ۇلەسى مول ەكەنى ءسوزسىز.