الماتىدا 600-گە جۋىق تۋريستىك كومپانيا بار. جىل باسىنان بەرى 200 مىڭ ادام الماتىعا قوناققا كەلدى. الماتىلىقتار بيزنەسپەن اينالىسۋعا بارىنشا بەيىم، - دەدى الماتى قالاسى اكىمىنىڭ ورىنباسارى ارمان قىرىقبايەۆ بۇگىن اشىلعان حالىقارالىق «International Mountain Sports Festival» فەستيۆالى اياسىنداعى فورۋمنىڭ اشىلۋىندا، دەپ حابارلايدى Qamshy.kz اقپارات اگەنتتىگى.

ارمان قىرىقبايەۆ قالادا  مەديسينالىق، سپورتتىق، مادەني- تانىمدىق، ەكولوگيالىق، ىسكەرلىك، شوپينگتىك  تۋريزم تۇرلەرى دامىپ كەلە جاتقانىن ايتتى. ول تاۋ تۋريزمىنە ايرىقشا نازار اۋدارىلىپ وتىرعانىن ايتتى.  

«الماتى - قازاقستاننىڭ ەكونوميكالىق لوكوموتيۆى. الماتىلىقتار بيزنەسپەن اينالىسۋعا بەيىم. الماتىدا 600-گە جۋىق تۋريستىك كومپانيا بار. بيىلدىڭ وزىندە جىل باسىنان بەرى 200 مىڭ ادام الماتىعا قوناققا كەلگەن. مەملەكەت باسشىسىنىڭ تۇراقتى قامقورلىعى ارقاسىندا الماتىدا زاماناۋي سپورتتىق ينفراقۇرىلىم قالىپتاستى، سونىڭ ارقاسىندا ءتۇرلى دەڭگەيدەگى سپورتتىق شارالار وتۋدە. بيىل ءبىز قالادا بۇكىلالەمدىك قىسقى ستۋدەنتتىك ويىنداردى وتكىزدىك، بۇل مەگاپوليستى الەم جۇرتىنا قىسقى ءتۋريزمنىڭ حالىقارالىق ورتالىعى رەتىندە كورسەتىپ، بۇقارالىق سپورتتى دامىتۋعا ءارى سپورتتىق  ءىرى جەتىستىكتەرگە جەتۋگە تىڭ سەرپىلىس بەردى»، - دەپ اتاپ ءوتتى قالا اكىمىنىڭ ورىنباسارى.

ارمان قىرىقبايەۆتىڭ ايتۋىنشا، قازىرگى كەزدە قالادا 166 قوناق ءۇي، حوستەل، كەمپينگ، 2 مىڭنان استام ءدامحانا، مەيرامحانا، 19 تەاتر، 20 مۇراجاي، 14 كوركەم گالەرەياسى مەن كورمەلەر جۇمىس ىستەيدى.

«2016 جىلى رەسپۋبليكا بويىنشا شەتەلگە 9 ملن ادام شىقسا، سونىڭ 3 ميلليونعا جۋىعى الماتىلىقتار. الماتىنى دامىتۋدىڭ نەگىزگى درايۆەرىنىڭ ءبىرى تۋريزم بولۋى ءتيىس، ونىڭ ۇستىنە وسى سالادا جاڭا جۇمىس ورىندارىن قۇرۋعا مۇمكىندىك مول»، - دەدى ول.

قالا باسشىلىعىنىڭ ايتۋىنشا، الماتى ءوزىنىڭ تابيعي-گەوگرافيالىق، گەوساياسي ەرەكشەلىگىنە وراي، الەمدىك تاۋ ءتۋريزمىن دامىتۋعا  ايتارلىقتاي ۇلەس قوسىپ كەلەدى. مىسالى، تاياۋدا جاريالانعان «Worldwide Costof Living» رەيتينگتە الماتىنىڭ ءومىر ءسۇرۋ مەن جۇمىس ىستەۋ ءۇشىن بارىنشا جايلى ءارى ارزان قالا ەكەندىگى ايتىلعان.

 ايتا كەتەيىك، بۇگىنگى حالىقارالىق فورۋمعا الەمنىڭ 10 ەلىنەن، سونىڭ ىشىندە يسپانيا، گەرمانيا، گرۋزيا، رەسەي، ۋكراينا، جۇڭگو، اۆستريا جانە باسقا ەلدەردەن سپيكەرلەر قاتىستى. 

«Warth» تاۋ شاڭعىسى كۋرورتى مەن «Warth Holdind GmbH» باسقارماسىنىڭ باس ديرەكتورى، اۆستريالىق گيۋنتەر وبەرحاۋزەر  كۋرورتتىڭ قالا ەكونوميكاسىنا ىقپالى تۋرالى، «PGI Management  باس ديرەكتورى دجوان ۆيلادومات، اندوررا تاجىريبەسى نەگىزىندە قازاقستان تاۋ-شاڭعىسى يندۋسترياسىن دامىتۋ تۋرالى ايتتى. فورۋم بارىسىندا قىسقى سپورت تۇرلەرى بويىنشا جۇڭگو قاۋىمداستىعىنىڭ باس مەنەدجەرى، Beijing Wanda Culture Industry Group باس ديرەكتورىنىڭ ورىنباسارى  بين ۆۋ قىتايداعى تاۋشاڭعىسى يندۋسترياسىنىڭ دامۋى جونىندە اڭگىمە قوزعادى.