الماتىدا ءوتىپ جاتقان حالىقارالىق «International Mountain Sports Festival» فەستيۆالىندە اندورالىق ساراپشى، PGI Management كومپانياسىنىڭ باسقارۋشى ديرەكتورى دجوان ۆيلادومات سۇحباتىندا الماتىنىڭ تاۋ-شاڭعى سپورتىنا 7 ملن تۋريست تارتۋعا بولاتىنىن ايتتى، دەپ حابارلايدى Qamshy.kz اقپارات اگەنتتىگى.

- بۇگىنگى فورۋمعا ءسىز قانداي تاجىريبەڭىزبەن ءبولىسۋ ءۇشىن كەلدىڭىز؟

-ادامدار تاۋ-شاڭعى سپورتى بويىنشا كۋرورتتاردى دامىتۋ بارىسىندا كوپ قاتەلىكتەر جاسايدى. ءبىز سولاردىڭ الدىن الۋعا كومەكتەسەمىز. شىمبۇلاقتىڭ دا قاتەلىگى كوپ بولدى، ءبىراق قازىرگى ۋاقىتتا دۇرىس دامۋ جولىنا تۇسكەن. ءسال تاريحقا شەگىنىس جاسايىن، اندورا وتە كەدەي مەملەكەت بولعان. ءقازىر قاراساڭىز تاۋ-شاڭعى دەمالىس ورىندارى ارقاسىندا ونىڭ ەكونوميكاسى جاقسى دامىعان. اندورادا بالالار 10 جاسىنان تاۋ-شاڭعى سپورتىمەن اينالىسادى. مەنىڭ اكەم اندورادا العاشقى بولىپ، تاۋ-شاڭعى دەمىلىس ورنىن 1953 جىلى اشقان. ول ءقازىر دامىپ ۇلكەن بيزنەسكە اينالدى. قازاقستان ينۆەستيسيا سالىپ، وسى سالانى دامىتۋعا كۇش سالۋى كەرەك، ونىڭ مەحانيزمدەرى وتە كوپ.

- تاۋ-شاڭعى سپورتىنا قانشا ادام تارتۋعا بولادى؟

- اندوراعا جىلىنا 2،5 ملن ادام تاۋ-شاڭعى سپورتىمەن اينالىسۋعا كەلەدى. سول قوناقتاردىڭ 5 پايىزى رەسەيلىكتەر. الماتىدا ەگەر وسى سالا دامىسا، رەسەيدەگى تاۋ-شاڭعى سپورتىمەن اينالىساتىندار ەۆروپاعا بارعاننان گورى وسىندا اعىلار ەدى.

- الماتىداعى تاۋ-شاڭعى سپورتىن دامىتۋ ءۇشىن ءسىزدىڭ ويىڭىزشا نەدەن باستاۋ كەرەك؟

- ينفراقۇرىلىمدى دامىتۋ كەرەك. كۋرورتتاردىڭ سانىن كوبەيتۋ كەرەك. تاۋ-شاڭعى سپورتى بويىنشا قىزمەت قول جەتىمدى بولۋى كەرەك.

- دجوان مىرزا، باياندامىڭىزدا الماتىعا تاۋ-شاڭعى سپورتىنا جىلىنا 7 ملن تۋريست تارتۋعا مۇمكىندىگى بار ەكەنىن ايتتىڭىز، وسىنى تارقاتىپ، ساراپتاماڭىزعا نەگىز بولعان سەبەپتەرىن ايتساڭىز...

-  سىزدەردە ۇسىنىس بولسا، ادامدار مىندەتتى تۇردە كەلەدى. ءۇندىستان، جۇڭگو، رەسەيدىڭ تۋريستەرى ءسوزسىز كەلەدى. ءبىز مۇنى ەسەپتەپ كوردىك. الماتى ءۇندىستان مەن جۇڭگو تۋريستەرىنىڭ قىزىعۋشىلىعىن ارتتىرارى ءسوزسىز. مىسالى ءبىزدىڭ ارگەنتيناداعى كۋرورتىمىزعا قىتايلىقتار كەلەدى، ولار ءۇشىن تاۋ-شاڭعى سپورتى دامىعان الماتىعا كەلۋ تيىمدىرەك بولادى. سول ءۇشىن مىقتى ينفراقۇرىلىم مەن كوبىرەك كۋرورتتار سالۋ كەرەك.

- ءسىز قولىڭىزداعى مالىمەتتەرگە قاراي وتىرىپ، الماتىنىڭ تاۋ-شاڭعى سپورتىنىڭ الەۋەتىن قالاي باعالار ەدىڭىز؟ 

-  بىرىنشىدەن، اۋەجاي قالاعا جاقىن، ول - جاقسى. ەكىنشىدەن، ينۆەستيسيا سالۋ كەرەك قورىقپاي. ءۇندىستان مەن جۇڭگو تۋريستەرىن تارتاتىنداي جارنامانى جاقسارتۋ كەرەك. سىزدەردە كەرەمەت تاۋلار بار، اسەم تابيعات بار، بۇل - ەڭ باستىسى. الماتىداعى كۋرورتتار ەۋروپانىڭ دەڭگەيىن جەتكەن جوق. شىمبۇلاق سالىستىرمالى تۇردە الىپ قاراساق، ۇلكەن كۋرورت ورنى ەمەس. سوندىقتان، ادامداردى بارىنشا مول تارتۋ ءۇشىن تەك تاۋ-شاڭعى سپورتى ەمەس، وزگە دە سپورت تۇرلەرىن كوبەيتۋ قاجەت. مىسالى، گولف كورتىن ۇيىمداستىرۋعا بولادى. سپورت ءتۇرى، كورسەتىلەتىن قىزمەت ءتۇرى سان الۋان بولسا، تۋريستەر تارتىلادى. ءبىزدىڭ كونسالتينگتىك كومپانيامىز ازەربايجاندا قىزمەت ەتىپ جاتىر، 10 ادامىمىز قىزمەت كورسەتۋ، دامىتۋ جاعىنان كومەكتەسۋگە اتتانعان. بۇل ماسەلەدە بىزدە دايىن ستراتەگيا بار.

-قازاقستاندىق كومپانيالارمەن بايلانىس ورناتۋ جاعىنان قاندايدا كەلىسىمشارت جاسالدى ما؟

-جوق، ءبىز، وسى فورۋمعا سونداي ۇمىتپەن كەلدىك. ءبىز شىمبۇلاقپەن بىرگە جۇمىس ىستەيمىز، ءبىراق ارامىزدا ەشقانداي كەلىسىمشارت جوق.

-قىزمەت قۇندارىڭىز قانشالىقتى ەكەنىن بىلۋگە بولادى ما؟

-كۋرورتتان تاباتىن تابىسپەن سالىستىرعاندا ءبىزدىڭ كونسالتينگ قىزمەتىمىزدىڭ قۇنى تومەن بولىپ كورىنەدى.

-ۋاقىت ءبولىپ سۇحباتتاسقانىڭىزعا راحمەت!