«تاۋ سپورتىنىڭ الماتىداعى ءتۋريزمدى دامىتۋعا ىقپالى» دەگەن تاقىرىپتى تالقىلاۋعا ارنالعان ءۇش كۇندىك حالىقارالىق «ءىnternational Mountain Sports Festival» فەستيۆالى شىمبۇلاق تاۋ-شاڭعى كۋرورتىندا ءوز جۇمىسىن باستادى، دەپ حابارلايدى Qamshy.kz اقپارات اگەنتتىگى.

فەستيۆالدى رەسمي اشىپ بەرگەن الماتى قالاسى اكىمىنىڭ ورىنباسارى ارمان قىرىقبايەۆ تاۋ سپورتى ءتۋريزمدى دامىتۋدىڭ باستى باعىتتارىنىڭ ءبىرى ەكەنىن ايتتى.

«تاۋ سپورتى - الماتى ءۇشىن ماڭىزدى ماسەلەنىڭ ءبىرى. بۇگىنگى فورۋمنىڭ ماقساتى تاجىريبە الماسۋ. ءبىزدىڭ قوناقتارىمىزدىڭ اراسىندا الەمدىك كومپانيالاردىڭ توپ-مەنەدجەرلەرى شاقىرتىلىپ وتىر. ولار تاۋ كۋرورتى ماسەلەسىن جەتىك بىلەتىندەر. الماتى قازاقستان عانا ەمەس، ورتالىق ازيا بويىنشا تاۋ-شاڭعى كۋرورتىنىڭ ورتالىعى بولۋدى ماقسات تۇتىپ وتىر. الماتى - قازاقستاننىڭ ەكونوميكالىق لوكوموتيۆى. الماتىدا 600-گە جۋىق تۋريستىك كومپانيا بار. جىل باسىنان بەرى 200 مىڭ ادام الماتىعا قوناققا كەلگەن. بۇگىنگى فورۋمدا قوناقتار ءوز تاجىريبەسىن، الەمنىڭ الدىڭعى قاتارلى تاجىريبەسىمەن بولىسەدى دەپ ويلايمىز»، - دەدى ارمان قىرىقبايەۆ.

ايتا كەتەيىك، 28-30 شىلدە ارالىعىندا «شىمبۇلاق» تاۋ-شاڭعى كۋرورتىندا «ءىnternational Mountain Sports Festival» حالىقارالىق تاۋ سپورتى فەستيۆالى وتەدى. فەستيۆال بۇگىن فورۋممەن باستالىپ، ەرتەڭ جالپى حالىققا ارنالعان مەرەكەلىك شارالارعا ۇلاسپاق. فورۋمنىڭ ءۇشىنشى كۇنى الپينيادا وتكىزىلەدى. بۇعان دەيىن ارنايى باسپا ءسوز ءماسليحاتىندا شارانىڭ ماڭىزدىلىعى تۋرالى ءسوز قوزعاعان الماتى قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى ءابىل دوڭبايەۆ بيىل بۇل فەستيۆالدىڭ اياسىن كەڭەيتىپ، بىلتىرعىمەن سالىستىرعاندا مازمۇندىق جاعىنا كوپ ءمان بەرىلىپ وتىرعانىن ايتقان بولاتىن.

«وسى فەستيۆالدىڭ اياسىن كەڭەيتىپ وتىرمىز. بىلتىر ءبىر كۇن عانا بولسا، بيىل تۋريزم سالاسىنداعى ساراپشىلاردى شاقىرتىپ، جان-جاقتى تالقىلاۋدى ويلاستىردىق. ماقساتىمىز - مەدەۋ، شىمبۇلاق شاتقالىنىڭ تولىق مۇمكىندىگىن تانىتۋ»، - دەگەن بولاتىن ول.

بۇل شاراعا وليمپيادا چەمپيوندارى، تانىمال سپورتشىلار شاقىرتىلعان. جەكسەنبى كۇنى الپينيادا تاڭعى ساعات 5-تەن باستالادى. وعان بالالار مەن ەرەسەكتەردى 4000 مەترلىك شىڭعا اپارادى.